ءسىزدى كىم باقىتتى ەتە الادى؟
سونىمەن «باقىت» دەگەن نە؟ بىرەۋ دەنساۋلىعىندا اقاۋ بولماعاندى باقىت دەسە، ەكىنشىسى بايلىقتى باقىت سانايدى، ۇشىنشىلەرى «ول ماعان ماشينا سىيلاسا» دەپ ارماندايدى.
مەنىڭشە، ءاربىر جان ءوزىن-ءوزى باقىتتى ەتە الادى: تاڭەرتەڭ ۇيقىدان كۇلىپ ويانىپ، كەشكە ۇيقىعا جاتقاندا سول كوڭىل كۇيدى ساقتاي العان ادام. ول ءۇشىن ەرتەڭگى كۇندى ءوزىڭىز جوسپارلاپ الاسىز. مىسالى، جانىڭىز نەنى قالايدى: جۇمساق حالات، تاڭعى ءدامدى اس، جاعىمدى مۋزىكا، ت. ب.
ءارى قاراي كەشەگى دايىنداپ قويعان كيىمدەرىڭىزدى كيىپ، ايناعا سۇيسىنە كوز تاستايسىز. «مەنىڭ كوزىم جازيرانىكىندەي بوتاكوز ەمەس نەمەسە اينۇردىڭ بەلىندەي قيىلىپ تۇرعان جوق» دەگەن سەكىلدى ۋايىم-قايعىنىڭ ءبارىن قوقىس جاشىگىنە لاقتىرىپ (ويتكەنى اركىم ءوزىنىڭ دەنە ءبىتىمىن سىمباتتى ەتەتىن كيىم تۇرلەرىن عانا تاڭداي ءبىلۋى قاجەت)، ايناعا سۇيسىنە كوز تاستايمىز. قوعامدىق كولىكتە نە ءوز كولىگىڭىزدە جان-جاقتاعى كىسىلەرمەن ىلىنىسە كەتۋدەن اۋلاق بولۋ دا پوزيتيۆتى كوڭىل-كۇيدى ساقتاۋعا كەپىلدىك بەرەدى.
ەگەر بىرەۋ ءسىز تۋرالى سىن ايتسا، قولعا باقاندى الا سالىپ، دەرەۋ قارسى شابۋىلعا شىقپاي، «دوس جىلاتىپ ايتادى» دەگەن ماقالدى ەسكە ءتۇسىرىپ، ويلانىڭىز. تەرەڭ تىنىس الىڭىز. بۇل - ءبىر بەلەس، ءسۇرىنىپ-جىعىلىپ، ارەڭ شىقتىڭىز. ءارى قاراي جازىق دالا كوسىلىپ جاتىر، قيىن بەلەس ارتتا قالدى. مۇنداي وي-شۇڭقىرى كوپ، قيىن اسۋلار كەزدەسسە دە، ەندى تاجىريبەڭىز بار، ابايلاپ وتە الاسىز.
مىنە، ەندى ۇيىڭىزگە كەلدىڭىز. ءوزىڭىزدىڭ سۇيىكتى اسىڭىزدى ءىشىپ، دەم الاسىز. ءۇي شارۋاسىن رەتتەپ بولىپ، ەرتەڭگى باقىتتى كۇنىڭىزدى جوسپارلايسىز. ءتاتتى قيالدىڭ جەتەگىندە قالىڭ ۇيقىعا بەرىلەسىز.
باقىتتى بولىڭىزدار!
اۆتور: فاريزا ءابىلوۆا
massaget.kz
