قازاقستاننىڭ قىتايداعى ەلشىلىگىن وتاندىق مەردىگەرلەر سالۋى ءتيىس - سەناتور
بۇل تۋرالى بۇگىن ق ر پارلامەنتى سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا قازاقستان مەن ق ح ر اراسىنداعى ەلشىلىك سالۋ ماسەلەلەرىن تالقىلاۋ بارىسىندا كوميتەت ءتوراعاسى يكرام ادىربەكوۆ ايتتى.
«مەنىڭ ويىمشا، بەيجىڭدە ءبىزدىڭ ەلشىلىكتىڭ عيماراتىن سالعان كەزدە ونىڭ قۇرىلىس جۇمىستارىنا وتاندىق مەردىگەرلەردى تارتۋ كەرەك. قانشا دەگەنمەن قۇپيالىلىق جاعدايى بار. وندا ءتۇرلى پيعىلداعى ادامدار بولۋى مۇمكىن. سونداي كەلەڭسىزدىكتەردى بولدىرماۋ ءۇشىن ءوزىمىزدىڭ مەردىگەرلەردىڭ كومەگىمەن سالساق، دۇرىس بولار ەدى. وسى باعىتتا قانداي مۇمكىندىكتەر بار؟» - دەپ سۇرادى ول ق ر سىرتقى ىستەر ۆيتسە-ءمينيسترى اسقار مۋسينوۆتان.
«ارينە، مۇمكىندىك بار. الايدا ءبىز قازىر اشىق نارىق زامانىندا ءومىر ءسۇرىپ جاتىرمىز. سوندىقتان ءبىز ۇكىمەت بولگەن قاراجاتقا، جۇمىستى ورىنداۋ ساپاسىنا، مەرزىمىنە قاراپ، ەڭ وڭتايلى مەردىگەردى تاڭدايمىز. ءبىراق نەگىزگى باس مەردىگەرلىك ءوزىمىزدىڭ جەرگىلىكتى كومپانياعا بەرىلەدى دەپ ويلايمىن»، - دەپ جاۋاپ بەردى ۆيتسە-مينيستر.
ايتا كەتەيىك، اتالعان كەلىسىم بويىنشا قىتاي تاراپىنا استانانىڭ تاۋەلسىزدىك داڭعىلى بويىنان 3 گەكتار جەر ءبولىنىپ، وندا ق ح ر ەلشىلىگى سالىنادى. ال قازاقستان تاراپىنا بەيجىڭنەن 1,23 گەكتار جەر ءبولىنىپ، وعان 1994 - جىلى 0,53 گەكتار جەرگە سالىنعان ق ر ەلشىلىگىنە قوسىمشا عيماراتتار سالىنادى.
«ءبىز قىتاي تاراپىنا ءبىر جەردە ورنالاسقان 3 گەكتار جەردى بەرەمىز. ال قىتاي جاعى بىزگە بەيجىڭنىڭ ءار جەرىنەن ءۇش جەر تەلىمىن بولەدى. ءبىزدىڭ بۇرىننان كەلە جاتقان 0,3 گەكتار جەرىمىزدە ەلشىلىگىمىزدىڭ عيماراتى تۇر. وعان قوسىمشا بولىنگەن 0,23 گ ا جەردە بەيجىڭ قالاسىنىڭ قاق ورتاسىنداعى مالايزيا، جاپونيا، فرانسيا ەلشىلىكتەرى ورنالاسقان جاسىل ايماقتا ەلشىنىڭ رەزيدەنسياسى سالىناتىن بولادى. جانە وسى كەلىسىمگە سايكەس بەيجىڭنىڭ قارقىندى دامىپ كەلە جاتقان جاڭا ديپلوماتيالىق اۋدانىنان 1 گەكتار جەر تەلىمى بولىنەدى»، - دەپ ءتۇسىندىردى ۆيتسە-مينيستر.
ونىڭ اتاپ وتۋىنشە، جەر كولەمىندە ايىرماشىلىق بولسا دا، قۇنى جاعىنان كەلىسىم ەكى جاققا بىردەي.
اۆتور: ءابۋ-اسقار مەكەش ۇلى
