شىنايى ماحاببات
اشۋلانبادى دا، قارسى ءسوز دە ايتپادى. سەبەبىن سۇرادى. ەشنارسە ايتا الماعانىما اشۋلاندى. باسقا بىرەۋدى جاقسى كورەتىنىمدى قالاي ايتاتىنىمدى بىلمەدىم. سول كۇنى باسقا ەشنارسە سويلەسپەدىك.
ول بولسا تۇنىمەن جىلاپ شىقتى. بىرگە وتكىزگەن 10 جىلدان كەيىن اجىراسۋ قيىن بولاتىنى تۇسىنىكتى. ونىڭ الدىندا ءوزىمدى كىنالى سەزىنگەنىم ءۇشىن، وعان كولىك، ءۇي، كومپانيامنىڭ %30 ۇلەسىن بەرەتىنىمدى راسىمدەيتىن كەلىسىم شارت دايىنداپ قويدىم. ءبىراق ول وعان ءبىر قارادى دا، جىرتىپ تاستادى. ءبىر بىرىمىزگە بەيتانىس بولدىق. ونىڭ ماعان جۇمساعان ۋاقىت پەن كۇش جىگەرىنە جانىم اشىدى. ءبىراق جۇرەككە ءامىر جۇرمەيدى، قازىر باسقا كىسىنى جاقسى كورەمىن.
كەلەسى كۇنى كەشكىسىن ۇيگە كەش كەلدىم. ايەلىم ۇستەل باسىندا ءبىر نارسەلەر جازىپ وتىر ەكەن. ەشنارسە ايتپاي بولمەمە بارىپ ۇيىقتادىم. ەرتەڭىنە ماعان ءوز شارتتارىن ۇسىندى. مەنەن ەشقانداي ماتەريالدىق زات قالامايتىنىن، تەك اجىراساتىنىمىزدى 1 ايعا دەيىن ەشكىمگە ايتپاي جاسىرىن ۇستاۋىن سۇرادى. وسى ۋاقىت ىشىندە جاقسى وتباسىنا ۇقساپ ءومىر ءسۇرۋىمىزدى سۇرادى. بۇعان سەبەپ جالعىز ۇلىمىزدىڭ 1 ايدان كەيىن ۋنيۆەرسيتەتكە تۇسەتىندىكتەن، قابىلداۋ ەمتيحاندارى كەزىندە وتباسى ىشىندەگى ماسەلەلەر وعان كەدەرگى بولماسىن دەگەن نيەت ەكەن.
كەلىستىم، ەكىنشى شارتى دا بار بولاتىن. ۇيلەنگەن كۇنى ەسىكتەن ۇيگە ونى قولىما الىپ كىرگەنىمىزدى ەسىنە ءتۇسىرىپ، 1 اي بويى ونى قولىما الىپ بولمەمىزدەن ەسىككە دەيىن اپارۋىمدى سۇرادى. باسىندا ەسىنەن اۋىسقان با دەپ ويلادىم، ءبىراق وتكەن جىلداردىڭ قۇرمەتىنە كەلىستىم.
سول كۇنى سۇيىكتىم رەبەككاعا ايەلىمنىڭ وسى شارتتارى تۋرالى ايتىپ ەدىم، كۇلىپ جىبەردى دە، ايەلىڭ ءبىر قيالي ەكەن دەپ ايتتى. اقىرى ايەلىممەن اجىراساتىنىما سەنىمدى بولعاندىقتان ول دا كەلىستى.
ءبىرىنشى كۇنى ەشبىر سەزىمىم قالماعان ايەلىمدى قۇشاعىما الۋ قيىن بولدى ماعان، كوتەرگەنىمدە ارتىمىزدا تۇرعان ۇلىمىز بىزگە قاراپ قۋانىشىن جاسىرا المادى «ءبىر-بىرىڭىزگە دەگەن سەزىمدەرىڭىز قانداي كۇشتى» دەپ كۇلىمدەپ تۇردى، سوزدەرى ءىشىمدى كۇيدىرسە دە، كەلىسكەنىمىزدەي ايەلىمدى ءۇيدىڭ ەسىگىنە دەيىن 10 مەتردەي قاشىقتىقتى قۇشاعىمدا اپاردىم. ول بولسا كوزدەرىن جۇمىپ قويىپ، قۇلاعىما «ۇلىمىزعا اجىراساتىنىمىزدى ايتۋشى بولما» - دەدى. مەن دە وعان قاراپ، جارايدى دەدىم. ونى ەسىككە دەيىن اپارىپ، ۇيدەن بىرگە شىقتىق. ول اۆتوبۋس ايالداماسىنا بارىپ، جۇمىسىنا باراتىن اۆتوبۋسىن كۇتتى. مەن ءوز جۇمىسىما كەتتىم.
2- كۇنى بۇل ويىنىمىزدى ويناۋ وڭايىراق بولدى. وعان كوپتەن بەرى نازار اۋدارماعان مەن ونىڭ بەتىنە تۇسكەن مايدا اجىمدەردى ەندى بايقادىم. شاشتارىندا دا اق شاشتار پايدا بولىپتى. وتكەن جىلداردىڭ ىزدەرىن كورۋ ويلاندىردى.
4- كۇنى ونى قۇشاعىما العانىمدا ءبىر سەنىمدىلىك سەزىمى ۇيالادى ىشىمدە. ماعان ءومىرىنىڭ 10 جىلىن سىيلاعان ايەلگە دەگەن كەرەمەت ءبىر سەزىم.
5- كۇنى ىشىمدەگى سەزىمدەر كۇشەيە باستادى. رەبەككاعا بۇل تۋرالى ايتپادىم. ايەلىمدى كۇننەن كۇنگە كوتەرىپ ەسىككە دەيىن اپارۋ ەكەۋمىزدى دە باقىتقا بولەي باستادى.
ءبىر كۇنى ونىڭ نە كيىم كيەتىنىن ويلاپ تۇرعانىن كوردىم، بۇرىنعى كيىمدەرىنىڭ ءبارى ۇلكەن بولعانىن ايتتى. راسىندا دا سوڭعى كۇندەرى قاتتى ارىقتاپ كەتكەنىن سوندا بايقادىم. اجىراساتىنىمىزدى ويلاپ، سونىڭ ۋايىمىمەن ارىقتاعانىن ءتۇسىندىم. ەرىكسىز باسىنان سيپادىم. وسى كەزدە كەلىپ قالعان ۇلىمىز «اكە، انامدى قۇشاعىڭدا تاسۋىڭ كەرەك» دەدى. اكەسىنىڭ اناسىن بولمەلەرىنەن ەسىككە دەيىن تاسۋى ءومىرىمىزدىڭ ءبىر ءداستۇرى بولدى. ايەلىم ۇلىمدى قاسىنا شاقىرىپ، كۇلىمسىرەپ قۇشاقتادى. ول كۇنى ونى قۇشاعىما الىپ تاسىعانىمدا تۋرا ۇيلەنگەن جىلدارىمىزداعىداي سەزىمدەر كەشتىم.
سەزىمدەرىم ەرىكسىز وزگەرە باستادى. سوڭعى ياعني وتىزىنشى كۇنى ونى ەسىككە دەيىن اپارعانىمدا، ودان بارلىق كورسەتكەن قيىنشىلىقتارىم ءۇشىن كەشىرىم سۇرادىم جانە سول كۇنى رەبەككاعا بارىپ، اجىراسپايتىنىمدى ايتتىم. وتباسىمىزدىڭ السىرەگەنى، سەزىمدەردىڭ جوقتىعىنان ەمەس، ءبىر-ءبىرىمىزدىڭ قادىرىمىزدى ۇمىتا باستاعاندىعىمىزدان ەكەنىن ءتۇسىندىم. ۇيگە قايتا جەتۋگە اسىقتىم. جولدان گۇلدەر ساتىپ الىپ، ارالارىنا «سەنى ءومىرىمنىڭ سوڭىنا دەيىن قۇشاعىمدا تاسيتىن بولامىن» - دەپ جازدىم.
ۇيگە بارا سالىپ، بولمەمىزگە قاراي جۇگىردىم. ايەلىم توسەكتە جاتىر ەكەن. قاسىنا باردىم ايەلىم دەمالماي جاتىر ەكەن. دارىگەرلەردى شاقىردىم. دارىگەردەن ايەلىمنىڭ ءبىرازدان وبىر اۋرۋىمەن اۋىرعانىن جانە سودان قايتىس بولعانىن ەستىدىم. قاتتى وكىندىم. رەبەككامەن ءجۇرىپ، ايەلىمنىڭ سوڭعى ايلار بويى وبىر اۋرۋىمەن ارپالاسقانىن بىلمەي دە قالىپپىن. ال ول مەنىڭ قامىمدى ويلاپ ومىرىنە ساناۋلى كۇندەر قالعانىن بىلگەنى ءۇشىن، ۇلىمىزدىڭ الدىندا مەنى اناسىن تاستاپ كەتكەن جامان اكە رەتىندە كورسەتپەۋگە تىرىسىپتى. ەڭ بولماعاندا ۇلىمىزدىڭ ەسىندە مەنىڭ جاقسى اكە، جاقسى جۇباي بولىپ قالۋىمدى قالاپتى.
عيبراتناما: قاسىمىزداعى ادامداردىڭ قادىرىن جوعالتقاندا عانا تۇسىنبەي، بارىندا باعالاي بىلەيىك.
gibrat.kz
