ەلدى ەلەڭ ەتكىزگەن تاعى ءبىر سوراقى جارناما روليك ءتۇسىرىلدى - كەسكىن
«پەتروپاۆل تاريحىنداعى مۋزىكا-قۇرىلىس ۆيدەوروليگى» دەپ اتالعان بەينەكليپتە سىمباتتى ەر ادامدار مەن تەلەجۇرگىزۋشى كەيپىندەگى قىزدار قۇرىلىس كومپانياسىنىڭ ونىمدەرى تۋرالى ايتادى. جارتىلاي جالاڭاش بويجەتكەن توسەكتە جاتىپ «مەن - جاڭا ءۇيمىن. مەنى قالايتىندار كومپانيا كەڭسەسىنە تەلەفون سوقسىن» دەيدى. ۆيدەو سيپاتتاماسىندا 2015-جىلى «قىزىل-جار» 12 قاباتتى تۇرعىن ءۇي كەشەنى بەرىلەتىنى ايتىلادى. جارناما روليگىن كورگەن ينتەرنەت قولدانۋشىلار ەكىگە ءبولىندى. ونىڭ ءبىرى قۇرىلىس كومپانياسىنىڭ بۇل جوباسىن ءساتتى دەپ اتاسا، ال ەكىنشىسى وتە ناشار ءارى ۇياتسىز ەكەنىن ايتىپ جاتىر. AKADEMIKS260985 نيگىندەگى ءبىر قولدانۋشى «بۇل قالامىزدى ماسقارالادى!» دەيدى.
مۋزىكا-قۇرىلىس جارناماسى تۋرالى ەكى ۆيدەوروليك YouTube رەسۋرسىنا وسى جىلدىڭ جازىندا جۇكتەلگەن. ەكى روليكتە دە ءاندى پەتروپاۆل قالاسىنىڭ ءانشىسى - الەكساندر زايبەرت ورىندايدى.
ايتا كەتەيىك، بۇل ەلىمىزدە كوپشىلىكتىڭ نارازىلىعىن تۋعىزعان جالعىز جارناما ەمەس. بۇعان دەيىن «ستۋديا 69» كلۋبىن جارنامالايتىن پوستەردە قۇرمانعازى مەن پۋشكيننىڭ ءسۇيىسىپ تۇرعانى بەينەلەنگەن بولاتىن. جارناما وسى جىلدىڭ 24- تامىز كۇنى الەۋمەتتىك جەلىلەردە تارالا باستادى. بۇل جۇمىس قوعام مۇشەلەرىنىڭ نارازىلىعىن تۋعىزدى، ولار پوستەر اۆتورلارىن جاۋاپكەرشىلىككە تارتۋدى سۇراپ، پوليتسياعا شاعىمداندى. بۇدان كەيىن Havas Worldwide Kazakhstan جارناما اگەنتتىگى سوت ۇكىمى بويىنشا قۇرمانعازى كونسەرۆاتورياسىنىڭ 34 وكىلىنە 34 ميلليون تەڭگە كولەمىندە مورالدىق شىعىن تولەپ بەرۋى كەرەك بولدى.
