ءبىر ارىس ءوتتى ومىردەن

اقتىق ساپارعا شىعارىپ سالۋ ءراسىمى 19- قاراشا كۇنى الماتى قالاسىنداعى ع. مۇسىرەپوۆ اتىنداعى مەملەكەتتىك اكادەميالىق بالالار جانە جاسوسپىرىمدەر تەاترىندا تاڭعى ساعات 10:00-دە وتەدى.

قوعاباي سارسەكەيەۆ 1939-جىلى 1- ساۋىردە قوستاناي وبلىسىنىڭ جانكەلدين اۋدانى، تورعاي اۋىلىندا تۋعان. 1963-جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن سوڭ، 1963-1967-جىلدارى رەسپۋبليكالىق «قازاقستان پيونەرى» («ۇلان»)، «سوتسياليستىك قازاقستان» (قازىرگى «ەگەمەن قازاقستان») گازەتتەرىندە ادەبي قىزمەتكەر، 1967-1982-جىلدارى «قازاق ادەبيەتى» گازەتىندە ءبولىم مەڭگەرۋشىسى، جاۋاپتى حاتشى، 1983-1986-جىلدارى «كىتاپ جارشىسى» - «درۋگ چيتاتەليا» گازەتىنىڭ رەداكتورى، 1986-1990-جىلدارى «جالىن» باسپاسىنىڭ باس رەداكتورى، رەسپۋبليكالىق «قازاق كىتاپ» بىرلەستىگىنىڭ باس رەداكتورى، رەسپۋبليكالىق كىتاپ تاراتۋشىلار قاۋىمداستىعىنىڭ پرەزيدەنتى، 1990-2006-جىلدارى «س ا ق» ا ق-نىڭ پرەزيدەنتى قىزمەتتەرىن اتقارعان. كۇنى بۇگىنگە دەيىن «قازاق» ۇلت گازەتىنىڭ باس رەداكتورى قىزمەتىن اتقارىپ كەلدى.

العاشقى اڭگىمەلەرى 1950-جىلداردىڭ ورتاسىنان باستاپ شىعا باستادى. «كىلت» (1967)، «قاراشا قازدار» (1974) دەپ اتالاتىن اڭگىمە-پوۆەستەر جيناعى جارىق كوردى. «قول مەرگەن»، «كەستە ورامال»، «ىبىراي التىنسارين»، «مۇڭلىق-زارلىق»، «فاتيما»، «اشۋداس»، «ساربازدار» سياقتى پەسالارى رەسپۋبليكالىق تەاترلاردا قويىلعان. حالىق باتىرى ا. يمانوۆ تۋرالى رومانىنىڭ العاشقى بولىگى 1979-جىلى، جالعاسى سانالاتىن «زاماناقىر» كىتابى 1990-جىلى «جازۋشى» باسپاسىنان، ورىس تىلىندە «سمۋتا» دەگەن اتپەن «جالىن» باسپاسىنان جارىق كوردى. «1937-جىل» دەيتىن اڭگىمەسى 1998-جىلى قازاق، ورىس، اعىلشىن تىلدەرىندە جەكە كىتاپ بولىپ شىقتى. «جول ۇستىندەگى اڭگىمە»، «ۇلى ۇستاز نەمەسە - احمەت بايتۇرسىنوۆ جايلى وي ءتۇيىن»، «پورترەتتەر»، «ءۇش ارىس»، «ءۇش تانىم»، «وزگە ەمەس ءوزىم ايتام ءوز جايىمدى» دەپ اتالاتىن اڭگىمە-ەسسەلەرى مەن ەكى تومدىق تاڭدامالى جيناعى (1999) جارىق كوردى.

قوعاباي سارسەكەيەۆ قازاقستاننىڭ ەڭبەك سىڭىرگەن قايراتكەرى، جازۋشى. حالىقارالىق «الاش» ادەبي سىيلىعىنىڭ جانە ب. مايلين اتىنداعى ادەبي سىيلىقتىڭ لاۋرەاتى جانە فرانتيانىڭ «SPІ» التىن مەدالى مەن حالىقارالىق اقپاراتتانۋ اكادەمياسى التىن مەدالىنىڭ يەگەرى بولعان.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى