ەۋروپا ەلدەرىنىڭ نارىعىنا قازاقستاندىق بيدايدى شىعارۋ ءتيىمسىز - ا. مامىتبەكوۆ
«قازاقستاننىڭ گەوگرافيالىق جاعدايى دا، ونىڭ تەرەڭ كونتينەنتالدى ورنالاسۋ ورنى دا استىق تاسىمالىنىڭ، ونىڭ باعاسىنىڭ باسەكەسىنە اسەر ەتپەي قويمايدى.
ماسەلەن، قازاقستاننان ءبىر توننا بيدايدى قارا تەڭىز بەن بالتىق تەڭىز جاعالاۋىنا دەيىن تاسىمالداۋداعى كولىكتىك شىعىن ءجۇز دوللاردان اسادى. سوندىقتان دا، جوعارى پروتەيندى، ورگانيكالىق استىقتى قوسپاعاندا، قارا تەڭىز بەن بالتىق تەڭىزى پورتتارى ارقىلى ەۋروپالىق ەلدەردىڭ نارىعىنا، سولتۇستىك افريكا، تاياۋ شىعىس ەلدەرىنە قازاقستاندىق استىقتى ەكسپورتتاۋ ەكونوميكالىق تۇرعىدان ەش ءتيىمسىز»، - دەدى اسىلجان مامىتبەكوۆ.
بۇل رەتتە مينيستر جوعارى كولىكتىك شىعىندارىن بيۋدجەتتەن وتەۋ ىشكى نارىقتاعى باعانىڭ قۇلدىراۋىنا اكەپ سوعاتىنىن اتاپ ءوتتى. ۆەدومستۆو باسشىسىنىڭ سوزىنە قاراعاندا، وسىنداي تاجىريبەنىڭ ناتيجەسىندە 2009-2011 - جىلدارى الەمدىك باعا مەن قازاقستاننىڭ ىشكى نارىعىنداعى باعانىڭ ايىرماشىلىعى ايتارلىقتاي بولىپ كەتكەن. «بۇنىڭ ءبارى استىق ءوندىرىسىنىڭ شىعىندى بولۋىنا سوقتىردى، شارۋالار جوعارى دەڭگەيدە ەگىن الىپ، سودان شىعىنعا باتىپ جاتتى. ءتىپتى، شارۋالار عانا ەمەس، بيۋدجەتتەن دە شىعىن ارتتى، ماسەلەن وسىنداي جىلدارى قويمالار جەتىسپەۋشىلىگىنەن ىشكى تاسىمالدارعا قوماقتى قاراجات شىعىنداۋعا تۋرا كەلدى»، - دەدى ا. مامىتبەكوۆ.
اۆتور: قانات مامەتقازى ۇلى
