حالىقارالىق «دالا داۋىسى» راديوفەستيۆالى استانا تورىندە وتەدى
قازاق راديوسىنىڭ باستاماسىمەن ءۇشىنشى رەت وتكىزىلىپ وتىرعان قازاقتىڭ ءداستۇرلى جانە زاماناۋي اندەرىن اسقاقتاتاتىن بۇل ءان بايقاۋىندا «ءداستۇرلى ءان»، «اكادەميالىق ورىنداۋشى»، «ەسترادا»، «ەتنو ەسترادا»، «جاڭا ەسىمدەر» اتالىمدارى بويىنشا باق سىناپ، جەڭىمپاز اتانعان ورىنداۋشىلار سالتاناتتى تۇردە ماراپاتتالادى، دەپ حابارلادى daladauysy.kaztrk.kz.
«كەزىندە اسەم داۋىسىمەن قازاقتىڭ ءداستۇرلى ءانىن شىرقاپ، ونى الەمگە مويىنداتقان امىرە قاشاۋبايەۆ، قالي بايجانوۆ، ماناربەك ەرجانوۆ، كۇلاش بايسەيىتوۆا، جۇسىپبەك ەلەبەكوۆ، دانەش راقىشيەۆ، جامال وماروۆا سىندى كۇمىس كومەي انشىلەرىنىڭ سالىپ كەتكەن سارا جولىن ۇزبەي، قازاقتىڭ ءان ونەرىنىڭ الەۋەتىن اسقاقتاتۋ ماقساتىندا 2012 - جىلى قازاق راديوسىنىڭ باستاماسىمەن «دالا داۋىسى» جوباسى اشىلدى. بۇل - قازاق مۋزىكاسى ارقىلى انا ءتىلىمىزدى الەم حالىقتارىنىڭ اراسىندا بارىنشا ناسيحاتتايتىن ەلىمىزدەگى ءبىرىنشى ءارى، جالعىز راديوفەستيۆال.
باستى تالاپ - فەستيۆالعا قاتىسۋشىلاردىڭ، ءتىپتى ول شەت ەلدىك ۇمىتكەرلەر بولسا دا، قازاق ءانىن ناقىشىنا كەلتىرىپ ورىنداۋ. سول سەبەپتى دە وسى از عانا ۋاقىت ىشىندە بۇل جوبا راديوفەستيۆال شەڭبەرىنەن اسىپ، بەدەلدى مۋزىكالىق شەرۋگە اينالىپ وتىر»، دەلىنگەن حابارلامادا.
كاسىبي ورىنداۋشىلار اراسىندا اتالعان شارانىڭ جىلدان- جىلعا بەدەلى ءوسىپ، شەت ەلدىك ورىنداۋشىلاردىڭ قىزىعۋشىلىعىن ارتتىرۋدا. وتكەن جىلى «دالا داۋىسى» روديوفەستيۆالىنە قاتىسۋعا وتاندىق انشىلەرمەن قوسا، رەسەي، تۇركيا، قىتاي، موڭعوليا جانە قىرعىزستاننان دا ۇمىتكەرلەر نيەت بىلدىرگەن بولاتىن.
ال بيىلعى جىلى ءوتىنىش قىتاي، رەسەي، ۋكراينا، بەلورۋسيا، تاتارستان، قىرعىزستان، لاتۆيالىق ورىنداۋشىلاردان دا كەلىپ ءتۇستى. «دالا داۋىسىنىڭ» ىرىكتەۋ تۋرىنان وتكەن ءاربىر شىعارما ميلليونداعان تىڭدارمانعا قازاق راديوسىنىڭ ەفيرى مەن عالامتور ارقىلى تارادى. وسىلايشا حالىقتىڭ كوڭىلىنەن شىعىپ، 100 پايىز داۋىس جيناعان ۇزدىك ورىنداۋشى بايقاۋ فينالىنا جولداما الدى. ال، اقتىق سايىستا «دالا داۋىسى» سىيلىعىنىڭ يەگەرلەرى 40 پايىز تىڭدارماننىڭ داۋىس بەرۋىمەن، 40 پايىز مامانداردىڭ ساراپتاۋىمەن، 20 پايىز جوبا ۇيىمداستىرۋشىلارىنىڭ ۇسىنىسى بويىنشا انىقتالادى. ولاردىڭ ەسىمدەرى III حالىقارالىق «دالا داۋىسى» راديوفەستيۆالىنىڭ گالا- كونسەرتىندە جاريالانىپ، سالتاناتتى تۇردە ارنايى ديپلوم جانە «دالا داۋىسىنىڭ» ەكسكليۋزيۆتى ستاتۋەتكاسىمەن ماراپاتتالادى.
