ق ر مەملەكەتتىك حاتشىسى گ. ءابدىقالىقوۆا: «نۇرلى جول» - الەمدەگى تەرەڭ وزگەرىستەرمەن ءبىر قاتارعا قوياتىن ساياسات
قازاقستان رەسپۋبليكاسى الەمدىك كەڭىستىكتەگى ماڭىزدى گەوساياسي ويىنشى رەتىندە، البەتتە، اتالعان ۇدەرىستەردىڭ بەلسەندى قاتىسۋشىسىنا اينالۋدا، دەيدى قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا.
«ەلباسى نۇرسۇلتان ءابىش ۇلى نازاربايەۆ «نۇرلى جول - بولاشاققا باستار جول» جولداۋىن حالىققا جاريالاي وتىرىپ، ءوزىنىڭ ستراتەگيالىق كورەگەندىگىن تاعى دا ايرىقشا پاش ەتتى. پرەزيدەنت الدىمىزدا الەمدەگى احۋالدى تۇبەگەيلى وزگەرتەتىن جاھاندىق سىناقتار كۇتىپ تۇرعانىن الدىن الا سەزەدى.
اتالعان قاۋىپ-قاتەرلەردىڭ الدىن الۋ ماقساتىندا مەملەكەت باسشىسى قولدا بار رەسۋرستاردى، تەتىكتەردى جانە مۇمكىندىكتەردى شۇعىل جاساقتاۋعا جاعداي تۋعىزاتىن جاڭا ەكونوميكالىق ساياساتتى العا تارتتى. بۇل شەشىمدى مەن امەريكانى ۇلى كۇيزەلىستەن الىپ شىعۋعا مۇمكىندىك بەرگەن ءوزىنىڭ ايگىلى جاڭا باعىتىن ۇسىنعان اقش پرەزيدەنتى فرانكلين دەلانو رۋزۆەلتتىڭ پراگماتيكالىق ساياساتىمەن جانە بەلگىلى رەفورماتور دىڭ شياۋپيڭنىڭ تەرەڭ باستامالارىمەن تۇپكى ناتيجەسىندە ەلدى الەمنىڭ ەكىنشى ەكونوميكاسى مارتەبەسىنە كوتەرگەن قىتايداعى تەرەڭ وزگەرىستەرمەن عانا ءبىر قاتارعا قويا الامىن»، - دەيدى گ. ءابدىقالىقوۆا.
سونداي-اق جولداۋدىڭ باستى باعىتتارىنا توقتالعان مەملەكەتتىك حاتشى: «الەۋمەتتىك سالادا قىزمەت ەتكەن ادام رەتىندە جولداۋدىڭ الەۋمەتتىك جان-جاقتى باعدارلىلىعىن اتاپ كورسەتكىم كەلەدى. جولداۋدىڭ «نۇرلى جول» دەپ اتالۋىنىڭ دا وزىندىك ءمانى بار. پرەزيدەنت ءبىزدىڭ بارشامىزعا جارىق، شۇعىلالى ءارى اشىق جول نۇسقاپ وتىر. حالىقتىڭ ەڭبەكپەن قامتىلۋ دەڭگەيىن وسىرۋگە جول اشاتىن ينفراقۇرىلىمدى دامىتۋعا، جاڭا جۇمىس ورىندارىن اشۋعا ەكپىن بەرىلدى. ناتيجەسىندە، ءبىز وتاندىق ەكونوميكانىڭ دامۋىنىڭ قوزعاۋشىسىنا اينالاتىن اۋە جولىنان باستاپ اۆتوموبيلگە دەيىنگى كولىك ماگيسترالىنىڭ تۇتاستاي جۇيەسىن قۇرامىز.
تەك جول قۇرىلىسىنىڭ وزىنەن 200 مىڭ جاڭا جۇمىس ورنى اشىلماق. جولداۋدا باستى ورىن ادامدارعا جان- جاقتى قامقورلىق جاساۋعا، ءومىر ساپاسىن جاقسارتۋعا، تۇتاستاي العاندا، قازاقستاندىقتاردىڭ ءال- اۋقاتىن نىعايتۋعا بەرىلىپ وتىر. وسىعان وراي، جولداۋداعى جالعا بەرىلەتىن الەۋمەتتىك تۇرعىن ءۇيدى دامىتۋ تۋرالى ەرەجەنى ايرىقشا اتاپ وتكىم كەلەدى. بۇل قادام بۇگىندە ەل حالقىنىڭ شيرەگىنەن استامىن قۇرايتىن قازاقستاننىڭ بولاشاعى - جاستارعا دەگەن قامقورلىققا باعىتتالعان. بۇل قازىرگى الەمدە تەڭدەسى جوق ەرەكشە مەملەكەتتىك شەشىم. جاھاندىق ەكونوميكالىق ءوسىم باسەڭ تارتىپ، جۇمىس ورىندارى قىسقارىپ جاتقان قازىرگى جاعدايدا ءبىزدىڭ ەلىمىزدە مەملەكەت باسشىسىنىڭ ستراتەگيالىق كورەگەندىگىنىڭ ارقاسىندا دامۋ مەن وركەندەۋدىڭ بۇرىن-سوڭدى بولماعان باعدارلاماسى - جاڭا ەكونوميكالىق ساياسات قارقىن الماق»، - دەگەن ويىن جەتكىزدى.
«بۇل باعدارلامانىڭ ماقساتتارى، مىندەتتەرى مەن مازمۇندىق دەڭگەيى ەڭ دامىعان ەلدەردەگى وسى تاقىلەتتەس قۇجاتتار ولشەمىمەن تولىق ساي كەلەتىنىن اتاپ وتكەن ورىندى. مەن «نۇرلى جول» باعدارلاماسى قازاقستاننىڭ الدا كۇتىلەتىن «ەكونوميكالىق ماريان شۇڭعىماسىن» باعىندىرۋعا مۇمكىندىك تۋعىزاتىنىنا سەنىمدىمىن. «نۇرلى جول - بولاشاققا باستار جول» جولداۋىن ىسكە اسىرۋ، ءسوزسىز، يندۋستريالىق- يننوۆاتسيالىق ەكونوميكانى ودان ءارى تەرەڭدەتۋگە، الەۋمەتتىك ينفراقۇرىلىمدى ساپالىق جاعىنان ودان ءارى دامىتۋعا، وسى ارقىلى قازاقستاندىقتاردىڭ ءومىر ءسۇرۋ ساپاسىن تۇپكىلىكتى جاقسارتىپ، ەلباسىمىز العا قويعان الەمنىڭ دامىعان 30 مەملەكەتىنىڭ قاتارىنا قوسىلۋ تۋرالى باستى ماقساتتى جۇزەگە اسىرۋعا بارىنشا جاعداي تۋعىزاتىنىن دا قوسا ايتقىم كەلەدى» ، - دەيدى گۇلشارا ءابدىقالىقوۆا «ەگەمەن قازاقستان» باسىلىمىنىڭ بەتىندە بىلدىرگەن پىكىرىندە.
