قازاقستاننىڭ ۇلتتىق ۆاليۋتاسى ءتۇرلى بايقاۋلاردا جۇلدەلى ورىندار يەلەنىپ ءجۇر - فوتو
وسى ورايدا اتالعان ۋاقىتتان بەرى ۇلتتىق ۆاليۋتامىز جانە مونەتالار ءبىرقاتار حالىقارالىق بايقاۋلاردا جۇلدەلى ورىنداردى يەلەندى. «قازاقپارات» اگەنتتىگى ق ر ۇلتتىق بانكىنىڭ مالىمەتتەرىنە سۇيەنە وتىرىپ، اتاۋلى ماراپاتتار جايىندا اقپاراتتى كوپشىلىك نازارىنا ۇسىنۋدى ءجون كوردى.
«ۆيچەنتسا نۋميزماتيكا - 2014» حالىقارالىق جۇلدەسى» ەسكەرتكىش مونەتالاردىڭ حالىقارالىق كونكۋرسىنىڭ قورىتىندىسى بويىنشا ق ر ۇلتتىق بانكىنىڭ «رەسپۋبليكا يگىلىگى» سەرياسىنداعى «بايقوڭىر» ەسكەرتكىش كۇمىس مونەتاسى 2012 - جىلى سوعىلعان ەڭ ۇزدىك مونەتا رەتىندە وسى بەدەلدى كونكۋرستا ەكىنشى جۇلدەگە يە بولدى. مۇنداي جوعارى ماراپات سيمۆولدىق نىسانداردىڭ بىرەگەي ازىرلەگەنى جانە جوعارى تەحنولوگيالىق وندىرىستە بىرەگەي تۇرعىدان قولدانىلاتىن كۇمىس پەن تانتالدى شەبەر ۇيلەستىرگەنى ءۇشىن بەرىلدى. بۇل مونەتا عارىشتى جانە الەمدەگى ەڭ ايگىلى عارىش الاڭدارىنىڭ ءبىرى «بايقوڭىر» عارىش ايلاعىن زەرتتەۋدەگى ماڭىزدى جەتىستىكتەردى پاش ەتەدى.
«مونەتا جۇلدىزدارى-2013» بايقاۋىنىڭ ناتيجەسىندە 2013 - جىلعى 26 - قىركۇيەكتە ماسكەۋ قالاسىندا «جىل مونەتاسى» اتالىمىندا ءۇشىنشى ورىندى ق ر ۇلتتىق بانكى ۇسىنعان التىن جالاتىلعان «تامعالى پەتروگليفتەرى» كۇمىس مونەتاسى جەڭىپ الدى. ۇيىمداستىرۋ كوميتەتىمەن ق ر ۇلتتىق بانكىنە «رەسپۋبليكا يگىلىگى» مونەتالار سەرياسى ءۇشىن ارنايى جۇلدە بەرىلدى. بۇل سەرياعا ءتورت مونەتالار كىرەدى: «ەسىك كوسەمى»، «بايقوڭىر»، جانە «تامعالى پەتروگليفتەرى» ەكى كۇمىس مونەتاسى.
حالىقارالىق بانكنوت قاۋىمداستىعى (IBNS) كونكۋرسىنىڭ قورىتىندىلارى بويىنشا قازاقستان رەسپۋبليكاسى تاۋەلسىزدىگىنىڭ 20 -جىلدىعىنا ارنالعان نومينالى 10000 تەڭگەلىك قازاقستاندىق بانكنوت «2011 - جىلدىڭ ەڭ ۇزدىك بانكنوتى» اتالىمىندا جەڭىپ شىقتى. بانكنوتتىڭ ديزاينىن ق ر ۇلتتىق بانكىنىڭ ديزاينەرلەرى جاسادى.
2012 - جىلعى 25 - قىركۇيەكتە ۆيچەنتسا قالاسىنداعى (يتاليا) «Vicenza Numismatica-2012» مونەتا ءونىمىنىڭ حالىقارالىق كونكۋرسىنىڭ قورىتىندىلارى بويىنشا سالتاناتتى ماراپاتتاۋ ءراسىمى ءوتتى. ق ر ۇلتتىق بانكىنىڭ «عارىش» سەرياسىنداعى «تۇڭعىش عارىشكەر» ەسكەرتكىش كۇمىس مونەتاسى «ەرەكشە پىكىر» اتالىمىندا جۇلدە الدى.
بۇدان بولەك، 2011 - جىلعى 29 - قاڭتاردا بەرليندە «World Money Fair» حالىقارالىق كورمەسىندە Krause Publications وتكىزگەن كونكۋرستىڭ قورىتىندىلارى شىعارىلدى. ق ر ۇلتتىق بانكىنىڭ «ۇلى قولباسشىلار» سەرياسىنان «اتيللا» ەسكەرتكىش كۇمىس مونەتاسىنا «تاريحي تاقىرىپ بويىنشا ەڭ ۇزدىك مونەتا» اتالىمىندا «جىلدىڭ ەڭ ۇزدىك مونەتاسى» ناگراداسى بەرىلدى.
اتاپ ايتقاندا، 2010 - جىلعى 26 - قىركۇيەك- 3- قازان ارالىعىندا اۆستراليانىڭ استاناسى كانبەررا قالاسىندا مونەتا سارايلارى ديرەكتورلارىنىڭ 26- كونفەرەنتسياسى ءوتىپ، وندا مونەتالار كونكۋرسى وتكىزىلدى. مونەتا سارايلارى ديرەكتورلارىنىڭ كونفەرەنتسياسىنا مۇشەلەردىڭ (50 داۋىستىڭ 47 سى) جاسىرىن داۋىس بەرۋىمەن شىعارىلعان شەشىمىمەن قازاقستاننىڭ «جولبارىس» كوللەكتسيالىق كۇمىس مونەتاسىنا اۆستراليادا ەكى باس جۇلدە بەرىلدى: «ەڭ ادەمى مونەتا» جانە «ەڭ تەحنولوگيالىق تۇرعىدان تابىستى جاسالعان مونەتا» .
«مونەتا جۇلدىزدارى-2010» ەسكەرتكىش مونەتالاردىڭ ءتورتىنشى حالىقارالىق كونكۋرسىنىڭ قازىلار القاسىنىڭ شەشىمىمەن «اتيللا» ەسكەرتكىش كۇمىس مونەتاسى «جىل مونەتاسى» نوميناتسياسىندا ديپلوممەن ماراپاتتالدى. ماراپاتتاۋ ءراسىمى 2010 - جىلعى 10- ماۋسىمدا سانكت- پەتەربور قالاسىندا ءوتتى.
بەرليندە «World Money Fair» حالىقارالىق كورمەسىندە وتكىزەتىن «Krause Publications» مونەتالار بايقاۋىنىڭ قورىتىندىلارى بويىنشا «شىڭعىس حان» ەسكەرتكىش كۇمىس مونەتاسى «تاريحي تاقىرىپ بويىنشا ەڭ ۇزدىك مونەتا» اتالىمىندا «جىل مونەتاسى-2010» ماراپاتىن الدى. ماراپاتتاۋ ءراسىمى 2010 - جىلعى 30 - قاڭتاردا بەرليندە دۇنيەجۇزىلىك اقشا كورمەسىندە ءوتتى.
2009 - جىلعى 1 قاراشادا ۆيچەنتسا قالاسىندا (يتاليا) «Vicenza Numismatica-2009» مونەتا ءونىمىنىڭ حالىقارالىق كونكۋرسىنىڭ قورىتىندىلارى بويىنشا سالتاناتتى ماراپاتتاۋ ءراسىمى بولدى. «شىڭعىس حان» مونەتاسىنا «مونەتانىڭ بەت جاعىندا قولدانىلعان وزىندىك ەرەكشەلىگى سىرت جاعىنداعى شىڭعىس حاننىڭ ساپالى ورىندالعان بەينەسى ءۇشىن» Ⅱورىن بەرىلدى.
2009 - جىلعى 24 - قىركۇيەكتە سانكت- پەتەربور قالاسىندا «مونەتا جۇلدىزدارى-2009» ەسكەرتكىش مونەتالاردىڭ ءۇشىنشى حالىقارالىق كونكۋرسىنىڭ قورىتىندىلارى شىعارىلدى. «مونەتا جۇلدىزدارى-2009» كونكۋرسىنا قاتىسۋعا الەمنىڭ 21 ەلىنەن 176 مونەتا ۇسىنىلدى. ق ر ۇلتتىق بانكىنىڭ «ديادەما بولىگى» ەسكەرتكىش كۇمىس مونەتاسى «بىرەگەي يدەيالىق شەشىم» نوميناتسياسىندا II ورىندى يەلەندى جانە «مونەتا جۇلدىزدارى-2009» ەسكەرتكىش مونەتالاردىڭ ءۇشىنشى حالىقارالىق كونكۋرسى ءادىلقازىلار القاسىنىڭ شەشىمىمەن ءتيىستى ديپلوممەن ماراپاتتالدى.
ال 2007 - جىلى سۋزدال قالاسىندا (رەسەي) ت م د جانە بالتىق ەلدەرىنىڭ ەڭ ۇزدىك مونەتاسىنا ارنالعان «مونەتا جۇلدىزدارى-2007» اتتى ءبىرىنشى كونكۋرستاعى جەڭىمپازداردى ماراپاتتاۋ راسىمىندە قازاقستاندىق مونەتالار ءۇش نوميناتسيادا جەڭىسكە جەتتى: «شاباندوز» كۇمىس مونەتاسى «جىلدىڭ كۇمىس مونەتاسى» نوميناتسياسىندا ءبىرىنشى ورىنعا يە بولدى. «رەگەل قىزعالداعى» مونەتاسى «مونەتا - ەڭ جاقسى سىيلىق» جانە «كورەرمەندەر كوزايىمى» اتالىمىندا جەڭىسكە جەتتى. بۇدان بولەك، 2007 - جىلعى 19 - قازاندا «Vicenza Numismatica-2007» مونەتا ءونىمىنىڭ حالىقارالىق كونكۋرسىنىڭ قورىتىندىلارى بويىنشا سالتاناتتى ماراپاتتاۋ ءراسىمى ءوتتى. ق ر ۇلتتىق بانكىنىڭ تانتال قوسىلعان «عارىش» ەسكەرتكىش كۇمىس مونەتاسى 2006 - جىلى سوعىلعان الەمدەگى ەڭ ۇزدىك مونەتا رەتىندە ءبىرىنشى ورىنعا يە بولدى. ماراپات ەستەتيكالىق اسپەكتىلەرى مەن مونەتانىڭ مانىنە بەرىلدى.
2007 - جىلى قازاقستان رەسپۋبليكاسىنىڭ ۇلتتىق بانكى «حالىقارالىق ۆيچەنزا نۋميزماتيكا جۇلدەسى» (يتاليا) اتتى مونەتالىق ونىمدەردىڭ بايقاۋىنا قاتىستى. ءبىرىنشى جۇلدە ەستەتيكالىق اسپەكتىلەرى مەن مونەتانىڭ ءمان- ماعىناسىنا بەرىلەدى. قازاقستان ۇلتتىق بانكى وسى بايقاۋدا «عارىش» مونەتاسىمەن جەڭىپ شىقتى.
ايتپاقشى، بانكنوتتاردى جاساۋ، قولدان جاساۋدان قورعاۋ جانە اينالىسقا ەنگىزۋ ماسەلەلەرىنە ارنالعان جانە IACA (International Association of Currency Affairs) - ۆاليۋتالىق ماسەلەلەر جونىندەگى حالىقارالىق ۇكىمەتتىك ەمەس ۇيىم وتكىزىپ وتىرعان «Currency Conference-2007» حالىقارالىق ۆاليۋتا كونفەرەنتسياسىنىڭ شەڭبەرىندە كونكۋرس ۇيىمداستىرىلعان بولاتىن. وعان قازاقستان رەسپۋبليكاسىنىڭ ۇلتتىق بانكى 2006 - جىلعى ۇلگىدەگى بانكنوتتارمەن قاتىستى. «ەڭ ۇزدىك جاڭا بانكنوت» اتالىمىندا ءبىرىنشى ورىن قازاقستاندىق 10000 تەڭگەلىك بانكنوتىنا بەرىلدى. وندا 2006 - جىلعى قاراشادا شىعارىلعان جاڭا سەريالى بانكنوتتاردىڭ بىرەگەي ديزاينى، كۇردەلى جانە جوعارى قورعالۋ دەڭگەيى اتاپ ءوتىلدى.
اۆتور: رۋسلان عابباسوۆ
