كاسپي ءوڭىرى مۇناي- گاز سالاسىندا سەرۆيستىك قىزمەت كورسەتۋ بويىنشا بارلىق باسىمدىقتارعا يە - ا. ايداربايەۆ

 بۇگىن استاناداعى ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگ بارىسىندا ماڭعىستاۋ وبلىسىنىڭ اكىمى اليك ايداربايەۆ وسىلاي ءمالىم ەتتى.

 اكىمنىڭ ايتۋىنا قاراعاندا، ماڭعىستاۋ وبلىسىندا ءوڭىردى دامىتۋدىڭ بەس ستراتەگيالىق باعىتى ايقىندالدى. بۇلار: ءداستۇرلى سالا مۇناي- گاز ءوندىرۋ، مۇناي سەرۆيز كلاستەرىن قۇرۋ، كولىك جانە لوگيستيكا، تۋريزم جانە قۇرىلىس.

 «مۇناي جانە گاز ءوندىرۋ سالاسىندا ءبىز جۇمىس ىستەپ تۇرعان كەن ورىندارىنىڭ تيىمدىلىگىن ارتتىرىپ جاتىرمىز. بيىل وبلىس العاش رەت سوڭعى بىرنەشە جىلدا مۇناي ءوندىرىسىن ارتتىرۋعا قول جەتكىزدى. 9 ايدا مۇناي ءونىمى 13,8 ميلليون توننانى قۇراپ، 2,7 پايىزعا جوسپار ورىندالعان. بۇل رەتتە مۇناي ءوندىرۋ نەگىزىنەن ەسكى كەن ورىندارىنان، اتاپ ايتقاندا، جەتىباي، قالامقاس، قاراجانباس سەكىلدى كەندەردەن الىندى. سونىمەن قاتار، مۇناي ءونىمىنىڭ ءوسىمى جاڭا تەحنولوگيالار ەنگىزۋ ەسەبىنەن ورىن الدى» ، - دەيدى اليك ايداربايەۆ.

بۇدان بولەك، وبلىس اكىمى وڭىرلىك ەكونوميكانى دامىتۋ اياسىندا جاڭا كەن ورىندارىنا گەولوگيالىق بارلاۋ جانە ەسكى كەندەرگە بارلاۋ جۇمىستارىن بارلاۋ بەلسەندى تۇردە جۇرگىزىلەتىنىن اتاپ ءوتتى. بۇل رەتتە تەڭىز كەن ورىندارىنىڭ پەرسپەكتيۆاسى جوعارى.

 «ۇلتتىق مۇناي كلاستەرى اياسىندا جاڭا مۇناي سەرۆيز كلاستەرى قۇرىلادى. بۇل جوبا ماڭعىستاۋ، اتىراۋ جانە باتىس قازاقستان وبلىستارىندا جۇزەگە اسپاق. تۇتاستاي العاندا كاسپيي ءوڭىرى مۇناي- گاز سالاسىندا سەرۆيستىك قىزمەت كورسەتۋ بويىنشا ءبىرىنشى ورىنعا شىعۋدىڭ بارلىق باسىمدىقتارىنا يە. ءبىز كاسپي تەڭىزىندە وڭتايلى گەوگرافيالىق اۋماقتا ورنالاسقانبىز، مۇزقاتپايتىن اقتاۋ جانە قورىق تەڭىز پورتى بار، ماشينا قۇرىلىسىنىڭ قۋاتى زور، دايىن ينفراقۇرىلىم مەن جاڭا تەمىرجول جانە اۆتوكولىك قاتىناستارى اشىلماق. ترانسپورت پەن لوگيستيكا تۇرعىسىنان الساق، ماڭعىستاۋ باسقا وڭىرلەرگە دە جاقىن بولا باستادى جانە وڭىرلىك كولىكتىك توراپقا اينالۋدا» ، - دەدى ا. ايداربايەۆ.  

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى