ن. نازاربايەۆ: ەلوردادا ت م د- دا بالاماسى جوق اسكەري قالاشىق سالىندى - فوتو
قالاشىقتى اشۋ بارىسىندا مەملەكەت باسشىسى ۇلتتىق ۇلاننىڭ جەدەل بريگاداسىنىڭ جەكە قۇرامىنا ايبىن مەن داڭقتىڭ سيمۆولى - اسكەري تۋدى تاپسىردى.
ەلباسى وفيتسەرلەر مەن اسكەري قىزمەتشىلەر ءۇشىن بۇگىن ەرەكشە كۇن ەكەنىن، ويتكەنى ەلوردادا ت م د- دا بالاماسى جوق اسكەري قالاشىق سالىنعانىن ايتتى.
- مۇندا اسكەري قىزمەتشىلەردىڭ وتباسىمەن تۇرۋىنا، قىزمەت اتقارۋىنا، اسكەري دايىندىعىن شىڭداۋعا بارلىق جاعداي جاسالعان. وسىنىڭ ءبارى مەملەكەتتىڭ قامقورلىعىن كورسەتەدى. سىزدەردىڭ مىندەتتەرىڭىز - ەلدەگى تاتۋلىق پەن تىنىشتىقتى ساقتاۋ، قازاقستان ازاماتتارى قۇقىقتارىنىڭ قورعالۋىن قامتاماسىز ەتۋ، قىلمىسپەن كۇرەس جۇرگىزۋ. رەسپۋبليكانىڭ قارۋلى كۇشتەرىنىڭ ءبىر بولىگى بولعاندىقتان، سىزدەر سونداي- اق تاۋەلسىز ەلدى قورعاۋعا، شەكاراسىنىڭ بۇتىندىگىن قامتاماسىز ەتۋگە دايىن بولۋعا تيىسسىزدەر. مەملەكەتتىڭ قامقورلىعىنا سىزدەر لايىقتى ەرەن ەڭبەكپەن جانە جوعارى ماشىقپەن جاۋاپ بەرەتىندەرىڭىزگە سەنىمدىمىن، - دەدى نۇرسۇلتان نازاربايەۆ.
قازاقستان پرەزيدەنتى اسكەري قىزمەتشىلەر مەن وفيتسەرلەردى اسكەري قالاشىقتىڭ اشىلۋىمەن تاعى دا قۇتتىقتاپ، ولارعا تابىس پەن مىقتى دەنساۋلىق تىلەدى.
سونىمەن قاتار، اسكەري قالاشىقتى ارالاپ كورۋ بارىسىندا مەملەكەت باسشىسىنا ايرىقشا ايىرىم بەلگىسى - «بەدەرلى بەرەت» جانە «بۇركىت» ارنايى ماقساتتاعى جاساعىنىڭ توسبەلگىسى تاپسىرىلدى.
***
جاڭا اسكەري قالاشىقتا جالپى الاڭى 64 مىڭ شارشى مەتر بولاتىن 53 عيمارات پەن قۇرىلىس ءبىر مەزگىلدە پايدالانۋعا بەرىلدى.
اسكەري قالاشىقتىڭ ينفراقۇرىلىمى جەكە قۇرامنىڭ جاۋىنگەرلىك شەبەرلىگىن جەتىلدىرۋگە، جەدەل بريگادانىڭ جاۋىنگەرلىك دايىندىعىن شىڭداۋعا، استانا قالاسىنداعى قوعامدىق قاۋىپسىزدىك پەن قۇقىق ءتارتىبىن ساقتاۋ جونىندەگى كۇندەلىكتى تاپسىرمانى ساپالى ورىنداۋعا مۇمكىندىك بەرەدى.
قالاشىقتىڭ اۋماعىندا شتاب پەن ءۇش كازارما عيماراتىنان بولەك، اۆتوكولىك پاركى، ءتۇرلى زالدارى مەن مۋلتيمەديالىق اتىس تيرى بار سپورت كەشەنى، ستاديون، سپورت جانە وقۋ قالاشىقتارى، مادەني- ساۋىق ورتالىعى، زاماناۋي مەديتسينالىق جابدىقتارمەن جابدىقتالعان لازارەت بار.
وفيتسەرلەر مەن كەلىسىمشارت بويىنشا جۇمىس ىستەيتىن وتباسىلى اسكەري قىزمەتشىلەر ءۇشىن 104 پاتەرلى تۇرعىن ءۇي سالىنعان.
