قۇرىلىمدىق رەفورمالار الداعى بەلەستەردى ەڭسەرۋگە مۇمكىندىك بەرەدى - ك. ءماسىموۆ
«مەملەكەت باسشىسى بىرنەشە كۇن بۇرىن قازاقستان حالقىنا جولداۋىن جاسادى. بۇرىنعىعا قاراعاندا ەلباسىنىڭ بۇل جولداۋى ەرتەرەك جاريا ەتىلدى. بۇل ءبىرىنشى كەزەكتە اعىمداعى احۋالعا جانە گەوساياسي، گەوەكونوميكالىق كەڭىستىكتە بولىپ جاتقان جاعدايعا بايلانىستى. پرەزيدەنت ءوزىنىڭ تاپسىرماسىن نەگىزدەگەن تاقىرىپتاردىڭ ءبىرى قۇرىلىمدىق رەفورمالاردى، اكىمشىلىك رەفورمالاردى جالعاستىرۋ ماسەلەلەرىنە قاتىستى»، - دەپ توقتالدى ۇكىمەت باسشىسى.
وسى ورايدا ك. ءماسىموۆ اكىمشىلىك باسقارۋ جۇيەسى ءتيىستى دەڭگەيدە قالىپتاسپاسا، وندا العا قويىلعان يدەيالار جۇزەگە اسپايتىندىعىن اتاپ ءوتتى.
ۇكىمەت باسشىسى وسىعان بايلانىستى بيىلدىڭ ورتا كەزىندە مەملەكەت باسشىسى ۇكىمەتتىڭ رەفورماسىن جۇرگىزۋ، وراتالىق پەن وڭىرلەر اراسىندا كەيبىر قىزمەتتەردىڭ قايتا ءبولۋ شەشىمىن جاساعاندىعىن، قازىرگى جولداۋ قولايلى دەڭگەيدە جۇزەگە اسۋى ءۇشىن ءتيىستى زاڭنامالىق وزگەرىستەر قابىلدانعانىن جەتكىزدى.
پرەمەر-مينيستر اعىمداعى قۇبىلمالى جاعدايدا، ياعني الەمدىك ەكونوميكا تەڭسەلە باستاعان ۋاقىتتا، كوپتەگەن شيكىزاتتىق رەسۋرستارعا باعانىڭ قۇلدىراۋى كەزەڭىندە كونترتسيكلدىك ساياساتتى، كونترتسيكلدىك بيۋجەتتىك ساياساتتى جۇرگىزۋ كەرەكتىگىن اتاپ ءوتتى. بۇل تۇرعىدا قازاقستاننىڭ ەكونوميكاسىن ىنتالاندىرۋ ءۇشىن قوسىمشا رەسۋرستار ءبولىنىپ وتىر.
«ەكىنشى باعىت قۇرىلىمدىق رەفورمالاردى جالعاستىرۋعا قاتىستى. ءبىز ونى حالىقارالىق قارجىلىق ينستيتۋتتارمەن بىرگە ىسكە اسىرۋدامىز، ياعني دۇنيەجۇزىلىك بانكپەن، ەۋروپالىق قايتا قۇرۋ جانە دامۋ بانكىمەن، ازيا بانكىمەن، يسلام بانكىمەن، سونداي-اق ەكونوميكالىق ىنتىماقتاستىق جانە دامۋ ۇيىمىمەن بىرلەسە اتقارۋدامىز»، - دەدى ك. ءماسىموۆ.
ۇكىمەت باسشىسىنىڭ پايىمىنشا، بۇل باعىتتاعى شارالار قازاقستانعا قيىندىقتاردى ەڭسەرۋگە، ەلدەگى جەكە ينۆەستيتسيالاردى دامىتۋ ءۇشىن قاجەتتى جاعدايدى جاساۋعا مۇمكىندىك بەرەدى.
اۆتور: رۋسلان عابباسوۆ
