قازاق ونەرنىڭ ساڭلاقتارى: ماڭعىتايەۆ مىڭجاسار
ماڭعىتايەۆتىڭ شىعارماشىلىعىنىڭ جانرى ءارقيلى، اشىق اۋەزدىلىگىمەن ايرىقشالانادى، ونىڭ ۇلتتىق - بوياۋلى مانەرىنە ۆوكالدىق جانە حالىقتىق - اسپاپتىق ەرەكشەلىكتەردى بىرىكتىرۋ ءتان. ماڭعىتايەۆتىڭ مانەرى اسىرەسە، «قوزى مەن بايان» بالەتىندە، «ارمان»، «قۇلاگەر» سيمفونيالىق پوەمالارىندا «شەكسىز ماحاببات» وراتورياسىندا، «اقساق قۇلان»، «جايلاۋدا»، «قاراتاۋ اۋەندەرى» سياقتى حورعا ارنالعان پوەمالارىندا ، اندەرىندە انىق ءىز سالعان. ۇلى ابايدىڭ ولەڭىنە جازىلعان «نە ىزدەيسىڭ كوڭىلىم»، «قالقام- اي، مەن ۇندەمەي جۇرەمىن كوپ»، «ولسە ولەر تابيعات، ادام ولمەس.. .» ولەڭدەرىنە ءان- رومانستار جازدى. سازگەر جالپى سانى ءۇش جۇزگە تاياۋ ءان شىعاردى. ونىڭ ۆوكالدىق- حور، اسپاپتىق، سيمفونيالىق وراتوريا- كانتاتالارى، وركەسترلىك پوەما- سيۋيتالارى، كينوفيلمدەر مەن سپەكتاكلدەرگە جازعان شىعارمالارى زامان تىنىسىن، ءومىر شىندىعىن، دۇنيە سۇلۋلىعىن جىرلايدى.
اقان سەرىنىڭ «قاراتورعاي» انىنە جازعان ۆارياتسيالارى مەن «ارمان»" اتتى سيمف. پوەماسىندا، ءى. جانسۇگىروۆتىڭ «قۇلاگەر» پوەماسىنىڭ جەلىسىنە جازعان سيمفونياسى مەن «دو- ماجور» سيمفونياسىندا، «قوزى كورپەش- بايان سۇلۋ»، «اقتولعاي» سيمفونيالىق سيۋيتالارىندا حالىق اۋەندەرىن شەبەر پايدالانعان. ال حالىق وركەسترىنە ارناپ جازعان «كوكتەم» پوەماسى مەن «كونتسەرتتىك كۇي»، «ىرعاقتى»، «توگىلمەلى» اتتى كۇيلەرى، ءتورت ءبولىمدى «اققۋدىڭ ايرىلۋى» دەگەن توپتاماسى ونىڭ كومپوزيتورلىق مۇمكىندىگىنىڭ جاڭا قىرىن اشتى. «قاراتاۋ اۋەندەرى»، «دالا داۋىسى»، «جايلاۋدا» حور پوەمالارى مەن حور سيۋيتالارى، «اۋىل تويى»، «ەلىم مەنىڭ» ۆوكالدىق- حورەوگرافيالىق كومپوزيتسياسىن تىڭداۋشى قاۋىم جىلى قابىلدادى. «اقان سەرى - اقتوقتى»، «ستالينگە حات»، «نەكە قيار»، « ءبىزدىڭ ءۇيدىڭ جۇلدىزدارى» سپەكتاكلدەرىنە، «بايشەشەك»، «كوكجيەك» كينوفيلمدەرى مەن ق. ساتبايەۆ تۋرالى دەرەكتى فيلمگە، «قوجاناسىر ساۋلەتشى»، «اۋليە ەسەك»، « ءۇش تۇلەك»، ت. ب. مۋلتفيلمدەرگە مۋزىكا جازدى.
