جۇدىرىقتاي جۇمىلىپ بىرىككەندە عانا كۇشتىمىز - ر. باكيروۆ
«مەرزىمىنەن بۇرىن جولدانعان 2015-جىلعا ارنالعان جولداۋدا قازاقستان رەسپۋبليكاسىنىڭ پرەزيدەنتى ن. نازاربايەۆ ەلدىڭ جاڭاشا ەكونوميكالىق ساياساتىنىڭ بولجامىن ۇسىندى، - دەدى م. ح. دۋلاتي اتىنداعى ت ا ر م ۋ پروفەسسورى، جامبىل وبلىسى بويىنشا جاستار «گۋونلەن» دۇڭعان ەتنو بىرلەستىگىنىڭ باسشىسى راشيد باكيروۆ. - نۇرسۇلتان ءابىش ۇلى تاياۋ جىلدار كۇللى ادامزات ءۇشىن جاھاندىق سىناق ۋاقىتى بولاتىنىن، وسى كۇردەلى كەزەڭنەن جۇدىرىقتاي جۇمىلعان مىقتى ەل عانا لايىقتى وتە الاتىنىن باسا ايتتى.
وسى جاعدايدا كەلەڭسىز ۇدەرىستەردى جويۋ ءۇشىن بارلىق ىقتيمال شارالاردى قابىلداۋ قاجەت. پرەزيدەنت ۇكىمەت الدىنا ناقتى مىندەت قويدى، ول - بارلىق الەۋمەتتىك مىندەتتەمەلەردى تولىق كولەمدە قامتاماسىز ەتۋ، دەدى ر. باكيروۆ.
جولداۋدا اپاتتى مەكتەپتەر مەن ءۇش اۋىسىمدا وقىتۋ ماسەلەلەرىن شەشۋگە ەلەۋلى قاراجات ءبولۋ جايى دا ءسوز بولدى. تۇرعىن ءۇي-كوممۋنالدىق سالانى نىعايتۋ، الەۋمەتتىك ينفراقۇرىلىمدى، شاعىن جانە ورتا بيزنەستى، دامىتۋ، جۇمىسپەن قامتۋ، حالىق تابىسىنىڭ ءوسۋى، جاڭا ماگيسترالدار سالۋ ماسەلەلەرى قوزعالدى. ولار وتاندىق ەكونوميكانى جاڭارتادى»، - دەدى سپيكەر.
«الدا جاۋاپتى دا ماڭىزدى جۇمىس كۇتىپ تۇر. سوندىقتان پرەزيدەنت قازاقستاندىقتاردى بىرىگۋگە، سەنىمدى كۇشەيتۋگە شاقىردى. بىزدە، قازاقستاندىقتاردا ۇلتارالىق، كونفەسسياارالىق كەلىسىم، حالىق اراسىندا بەيبىت ءومىر بار. ەكونوميكاسى مىقتى دەگەن ەلدەردە ورىن العان ءتۇرلى جاعدايلار بىزگە ساباق بولۋى ءتيىس. بۇل شەپتەن تەك مىقتى مەملەكەتتەر، جۇدىرىقتاي جۇمىلعان حالىقتار عانا وتەتىن بولادى! ەلباسىنىڭ سەنىمىن اقتاۋىمىز قاجەت. جاھاندىق مىندەتتەردى شەشۋگە ءوز ۇلەسىمىزدى قوسىپ، الدىمىزداعى سىن-قاتەردى لايىقتى ەڭسەرىپ، ءبىر-بىرىمىزگە تولەرانتتى بولۋىمىز قاجەت»، - دەپ ءسوزىن تۇيىندەدى ر. باكيروۆ.
