جەمقورلىقپەن قوعام بولىپ كۇرەسۋىمىز قاجەت - م. سابىر
بۇل تۋرالى باتىس قازاقستان ينجەنەرلىك گۋمانيتارلىق ۋنيۆەرسيتەتىنىڭ پرورەكتورى، فيلولوگيا عىلىمدارىنىڭ دوكتورى، پروفەسسور مۇرات سابىر ءمالىم ەتتى.
ونىڭ ايتۋىنشا، «نۇر وتان» پارتياسىنىڭ 2015-2025 - جىلدارعا ارنالعان سىبايلاس جەمقورلىققا قارسى كۇرەستىڭ جاڭا جوباسىن ازىرلەپ، ونى حالىقتىڭ تالقىلاۋىنا ۇسىنۋى - وتە وزەكتى ماسەلە.
قاي قوعامدا بولماسىن، ونىڭ كەيبىر كەمشىن تۇستارى تابىلىپ تۇرادى. سوناۋ Ⅺ عاسىردا ماحمۇد قاشعاري: «تۇركىلەر كوركەمدىك، ادەمىلىك، مارتتىك، ادالدىق، كىسى اقىسىن جەمەۋ، ۇلكەندى قۇرمەتتەۋ، كىشىنى قادىرلەۋ سياقتى قاسيەتتەرگە يە» دەپ جازعان ەكەن. بۇگىن ءبىز سول تۇركى جۇرتىنىڭ ەگەمەن قازاقستان دەگەن ءبىر تارماعى بولساق، «اتالعان قاسيەتتەر ءبىزدىڭ بويىمىزدا قالدى ما؟» دەگەن سۇراق تۋادى.
«ارينە، ءبىزدىڭ مەملەكەتتىگىمىزدىڭ، ۇلتتىعىمىزدىڭ تامىرى تەرەڭدە. سوندىقتان جوعارىدا ءسوز بولعان تۇركىلەردىڭ اسىل قاسيەتتەرى ءبىزدىڭ قانىمىزدان جوعالعان جوق. دەگەنمەن قازىرگى قوعامدا ورىن الىپ وتىرعان كىسى اقىسىن جەۋ، جەمقورلىق، اينالىپ كەلگەندە، ۇلت اقىسىن جەۋ - بەلەڭ الىپ وتىرعان قاسىرەت.
وسىعان وراي ەلباسى دا «قازاقستان-2050» ستراتەگياسى: قالىپتاسقان مەملەكەتتىڭ جاڭا ساياسي باعىتى» اتتى تاريحي جولداۋىندا جەمقورلىقپەن قوعام بولىپ كۇرەسۋدى مىندەت قىلعان. بۇل جوبانىڭ ماقساتى - سىبايلاس جەمقورلىقپەن قوعام بولىپ كۇرەسۋ.
ارينە، زاماننىڭ جامانى بولمايدى. زاماندى دا، قوعامدى دا جامان قىلاتىن - ادام بالاسى. كەزىندە اباي اتامىز: «اركىمدى زامان سۇيرەمەك، زاماندى قاي جان بيلەمەك؟ زامانعا جامان كۇيلەمەك، زامانا ونى يلەمەك» دەپتى. ۇلى اقىن مۇنى ءوز زامانىنان تۇڭىلگەندىكتەن ايتىپ وتىر.
ءبىراق كەلەڭسىزدىكتىڭ ءبارىن زاماننان كورۋگە بولمايدى. اباي اتامىزدىڭ «ەگەر كىمدە-كىم جامان بولسا، وعان زامانداستارى ۆينوۆات» دەگەن تاعى ءبىر ءسوزى بار. ياعني كىمدە-كىم جەمقور بولسا، كىسى اقىسىن جەسە، وعان قوعام كىنالى. قازاق قوعامىنداعى وسى ءبىر اۋىر دەرتپەن ەل بولىپ كۇرەسۋدىڭ جۇيەلى جولدارىن بۇگىنگى باعدارلامانىڭ اياسىنان ايقىن كورىپ وتىرمىز»، - دەدى م. سابىر.
اۆتور: ەلجان ەرالى
