ەلباسى جولداۋىنا سايكەس جاستاردىڭ باسپانالى بولۋى بولاشاققا دەگەن سەنىمدى ارتتىرادى - ق. ءمادىر
بۇل تۋرالى «ونەر» قوعامدىق قورىنىڭ ديرەكتورى، م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ دوتسەنتى قۋاندىق ءمادىر ءمالىم ەتتى.
ونىڭ ايتۋىنشا، دۇنيەنى داعدارىس جايلاعان ۋاقىتتا ەلىمىزدىڭ كۇن ساناپ دامۋى، بەلگىلى ءبىر اسۋدى باعىندىرىپ، كەلەسى ءبىر بەلگە ەركىن بەت تۇزەۋى، ارينە، ەلباسىنىڭ كورەگەندى ساياساتىنىڭ ناتيجەسى.
جولداۋدىڭ مازمۇنى تەرەڭ، باعىتى ايقىن، ستراتەگيالىق ءمانى ۇلكەن، ەلىمىزدىڭ قۇرىلىمدىق رەفورمالارىن ودان ءارى جۇزەگە اسىرۋعا باعىتتالعان.
«الدىمىزداعى 2-3 جىل بۇكىل دۇنيەگە دە، ەلىمىزگە دە وڭاي بولمايدى»، - دەپ ءسوز باستاعان پرەزيدەنت ەلىمىزدە اۋەجاي، ۇشۋ-قونۋ الاڭدارى، تەڭىز ينفراقۇرىلىمى جاپپاي جوندەلىپ، جاڭادان جول توسەلىپ، تەمىرجول جەلىسى تارتىلاتىندىعىن جەتكىزدى. ەلوردا استانادان باستاۋ الاتىن كۇرەتامىر جولدار - ەلدىڭ ەكونوميكاسىن دۇرىستاپ، حالىقتىڭ ءال-اۋقاتىن ارتتىرۋعا قىزمەت ەتەتىن بىردەن- ءبىر نەگىز.
جولداۋداعى تاعى ءبىر كوڭىل توركىنىنەن ورىن العان سالا - الەۋمەتتىك احۋال ەدى: جاعدايى ناشار مەكتەپ پەن ءۇش اۋىسىمدىق وقۋ ماسەلەسى شەشىلىپ، وعان 70 ميلليارد، بالاباقشا سالۋعا 20 ميلليارد، توزىعى جەتكەن تۇرعىن جايلاردى جوندەۋگە 200 ميلليارد، ارەندالىق نەگىزدەگى باسپانا سالۋعا 180 ميلليارد تەڭگە قاراستىرىلماق. وسى جەردە «جاڭا تۇرعىن ءۇي باعدارلاماسى بويىنشا، پاتەر دەلدالسىز جانە يپوتەكا تومەن پايىزبەن بەرىلەتىن بولادى. 1-2 پايىز جەتكىلىكتى شىعار. جانە العاشقى تولەمسىز بەرەمىز. ول الەۋمەتتىك جاعىنان از قامتىلعان وتباسىلارعا قولجەتىمدى بولادى»، - دەگەن مەملەكەت باسشىسى العاشقى تولەمسىز جالدامالى پاتەر الۋعا مۇمكىندىك تۋاتىنىن مالىمدەدى.
بۇل باسپانادان كۇدەر ۇزە باستاعان جاستارعا، سونىڭ ىشىندە ماردىمسىز جالاقى الاتىن وقىتۋشىلار مەن مادەنيەت قىزمەتكەرلەرىنە ۇلكەن قامقورلىق ەكەنىن باسا ايتقىم كەلەدى.
«ءسوزىنىڭ سوڭىندا نۇرسۇلتان ءابىش ۇلى تونىكوك بابامىزدىڭ وسيەتىن تىلگە تيەك ەتە كەلىپ «جالپىۇلتتىق يدەيانى ومىرشەڭ ەتەتىن - ەلدىڭ بىرلىگى. اۋىزبىرشىلىك قاشقان، الاۋىزدىق تاسقان جەردە ەشقاشان دا جالپىۇلتتىق يدەيالار جۇزەگە اسقان ەمەس. قازاقستاننىڭ شىققان شىڭى مەن باعىندىرعان بيىكتەرىنىڭ ەڭ باستى سەبەبى - بىرلىك، بەرەكەسى»، - دەپ ءسوزىن تۇيىندەدى. تاۋەلسىز ەلىمىزدىڭ جارقىن بولاشاعى ءۇشىن ءار قازاقستاندىق ازامات ەلىنىڭ پاتريوتى بولىپ، ەلباسى سالىپ بەرگەن جالپى ۇلتتىق يدەيا - ماڭگىلىك ەلدى باسشىلىققا الا وتىرىپ، ايانباي ەڭبەك ەتۋىمىز كەرەك»، - دەدى ق. ءمادىر.
