زاماناۋي عارىش سالاسىن قالىپتاستىرۋ ەل قاۋىپسىزدىگى ءۇشىن دە بەرىك نەگىز بولماق - ت. مۇسابايەۆ
بۇگىن «قازاقستانداعى عارىش كۇندەرى» حالىقارالىق سەمينارىن اشىپ ءسوز سويلەگەن ينۆەستيتسيالار جانە دامۋ مينيسترلىگى ايروعارىش كوميتەتىنىڭ ءتوراعاسى تالعات مۇسابايەۆ وسىلاي مالىمدەدى.
«قازىرگى تاڭدا قازاقستان ءبىرقاتار جوعارى عارىش تەحنولوگيالارىنا، زاماناۋي جەر ءۇستى عارىشتىق ينفراقۇرىلىمدارعا يە. سوسىن قازاقستاننىڭ الەۋمەتتىك- ەكونوميكالىق مۇددەسى ءۇشىن عارىش قىزمەتىنىڭ ناتيجەلەرىن ءتيىمدى پايدالانۋدى جۇزەگە اسىرا الاتىن ماماندار دا بىزدە بارشىلىق. سوندىقتان دا، ەلىمىزدە الداعى ۋاقىتتا زاماناۋي عارىش سالاسىن قالىپتاستىرا ءتۇسۋ جانە وسى سالانى ودان سايىن دامىتۋ عىلىمي- تەحنيكالىق پروگرەسس قانا ەمەس، ەل قاۋىپسىزدىگى ءۇشىن دە بەرىك نەگىزگە اينالاتىندىعىنا سەنىمدىمىن» ، - دەدى القالى جيىندى اشۋ بارىسىندا كوميتەت باسشىسى ت. مۇسابايەۆ.
ەسكە سالا كەتەيىك، حالىقارالىق شاراعا قازاقستاندىق مامانداردان بولەك فرانسيا، گەرمانيا، ۇلى بريتانيا، شۆەيساريا، يسپانيا، نورۆەگيا، رەسەي، ا ق ش، ءۇندىستان، كورەيا، ۋكراينا، قىرعىزستان مەن بەلارۋس ەلىنەن 300 گە تارتا وكىلدەر قاتىسۋدا.
ەكى كۇنگە ۇلاساتىن سەمينار اياسىندا ساراپشىلار عارىش سالاسى بويىنشا جەر رەسۋرستارىن باسقارۋ، اۋىل شاۋراشىلىعى جانە قورشاعان ورتانى قورعاۋ، گەواقپاراتىق جۇيەلەر جانە قازاقستانداعى جەردى قاشىقتىقتان زوندتاۋ، تابيعي رەسۋرستار، كارتوگرافيا، قورعانىس جانە قاۋىپسىزدىك باعىتتارى بويىنشا پىكىر الماسادى.
اۆتور: قانات مامەتقازى ۇلى
