تەلەارنالارداعى جۋرناليستەر ءانشى، ارتيستەردىڭ قولبالاسىنا اينالىپ بارا جاتىر
نەبىر تالانتتى تەلەجۋرناليستەردىڭ كوبى بۇگىندە جۇمىسسىز ءجۇر.
ال جۇمىستا جۇرگەندەرى كادر تاساسىنان شىقپايدى. ولاردىڭ ورنىن ءانشى، اكتەرلەر نەمەسە باسقا تانىمال ساياساتكەرلەر باسۋدا.
مۇنداعى نيەت، بالكىم، تانىمال ادامدار ارقىلى تەلەارنالاردىڭ رەيتينگىن كوتەرۋ شىعار.
ەگەر وسى وي ءوز ۇدەسىنەن شىعىپ، ولار وزدەرىنە تاپسىرىلعان جۇمىستى تالاپقا ساي اتقارىپ جاتسا، اڭگىمە باسقا.
الايدا كورىپ جۇرگەنىمىزدەي، كوبى جۋرناليستەردىڭ دايىنداپ بەرگەن ماتىندەرىن دۇرىس جەتكىزە الماي وتىرادى. ءسوز بولىپ وتىرعان ماسەلەلەر - ولارعا مۇلدە بەيمالىم، زەرتتەمەگەن، وي-سانادان وتكىزىپ، زەردەلەمەگەن جايتتار.
اڭگىمەنىڭ وربۋىنە قاراي ساۋالدار قويىپ، تاقىرىپتى اشا المايدى. ەشقانداي سەزىمسىز، ەموتسياسىز، سىرت كەلبەتىنىڭ قالاي بولىپ تۇرعانىن عانا ويلاپ، دايىن سۇراقتاردى تاق-تۇق قويۋمەن حاباردى جۇرگىزگەن بولىپ شىعادى.
تەلەۆيزيا - اينا، ودان ەشنارسەنى جاسىرۋ مۇمكىن بولماعاندىقتان، مۇنىڭ ءبارى كورەرمەنگە انىق بايقالىپ تۇرادى. شىن مانىندە، سول حابارلاردى ماسەلەنى جان-جاقتى زەرتتەپ، سەناري جازعان جۋرناليستىڭ ءوزى ەفيرگە شىعارسا، باعدارلاما الدەقايدا مازمۇندى، ديناميكالى بولار ەدى. وكىنىشكە قاراي، ولار ەفيرگە جىبەرىلمەيدى. بۇدان ەڭ كوپ زارداپ شەگىپ جاتقان كورەرمەن ەكەنى ءبىلىنىپ تۇرسا دا، بۇل ءۇردىس بۇرىنعىدان بەتەر ەتەك الۋدا.
ءسوزدىڭ شىنى كەرەك، تەلەارنالارداعى جۋرناليستەر بۇگىندە ءانشى، ارتيستەردىڭ قولبالاسىنا اينالىپ بارا جاتىر. بۇل ماسەلە ءوز كەزەگىندە تەلەجۋرناليستەردىڭ دۇرىس دۇنيە، ياعني ساپالى سەناري جازۋعا دەگەن ىنتاسىن دا تومەندەتەتىنى ءسوزسىز.
«بىرەۋدىڭ جوعىن بىرەۋ ولەڭ ايتىپ ءجۇرىپ ىزدەيدى» دەگەن ماقال بۇل جەردە كەلىڭكىرەمەيدى. دەگەنمەن كىم وزگەنىڭ اسىن جانىن سالىپ شايناپ بەرۋگە قۇشتار دەيسىز؟ جۋرناليستەردىڭ ءوز جۇمىستارىنان بۇلايشا تىقسىرىلۋى - ولاردىڭ وزدەرىنەن بۇرىن سول تەلەارنالارعا تەسىلگەن مىڭ سان كورەرمەندەر ءۇشىن قاۋىپتى ءۇردىس.
اقيقاتىندا، تەلەارنالار بۇگىندە ەلدىكتىڭ بەسىگى بولسا، بىزدە ونى قازىر بۇل سالاعا ەش قاتىسى جوقتار تەربەتىپ جاتىر. «شىمشىق سويسا دا قاساپشى سويسىن» دەگەندەي، اركىمنىڭ ءوز كاسىبىمەن اينالىسۋى كەرەكتىگى باعزىدان ايتىلىپ كەلەدى. بۇگىندە سوزدەن ىسكە كوشەتىن كەز كەلگەن سياقتى. بالكىم، جۋرناليستەردى قولداۋ ءۇشىن الەۋمەتتىك جەلىلەردە قوزعالىس قۇرۋىمىز قاجەت شىعار. ويتكەنى ءوز مۇددەمىزدى ءوزىمىز قورعاماساق، باسقالاردىڭ مۇددەسىن قايتىپ قورعاماقپىز؟ جۋرناليستيكا بۇل «جۇرت ايتسا - بولدى، كوپ ايتسا - كوندى» دەيتىن كوشەدەگى بىرەۋ ەمەس.
ول - «حالىقتىڭ كوزى ءھام قۇلاعى جانە ءۇنى» دەيتىن ۇلى ميسسيانى اتقاراتىن كاسىپ يەسى. ال وسى قۇلاقتىڭ دۇرىس ەستىپ، كوزدىڭ ايقىن كورىپ، ءۇننىڭ اشىق شىعۋى بۇگىنگى جاھاندانعان، ءتۇرلى قاتەرلەر قاۋپى كوبەيىپ، ەلدىگىمىز سىنعا ءتۇسىپ تۇرعان ۋاقىتتا وتە قاجەت. دەمەك، جۋرناليستەردىڭ ەكىنشى پلاندا قالماي، ولاردىڭ قوعام ومىرىندە ءوز بيىگىنە كوتەرىلۋى وتە ماڭىزدى.
ايشا قۇرمانعالي، جۋرناليست
«ايقىن»
