ماڭعىستاۋلىق جۇمىسسىزدار مۇنايدان باسقا سەكتورعا بارماي وتىر - ا. ايداربايەۆ

باستى سەبەپ - جالاقى تومەن. بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگ بارىسىندا ماڭعىستاۋ وبلىسىنىڭ اكىمى اليك ايداربايەۆ وسىلاي ءمالىم ەتتى.

وبلىس باسشىسىنىڭ سوزىنە قاراعاندا، وڭىردە جۇمىسپەن قامتۋ جاعدايى دا جاعىمدى كورسەتكىشكە ۇلاسىپ وتىر. ونىڭ ايتۋىنشا، وڭىردە حالىقتىڭ جۇمىسپەن قامتىلۋ كورسەتكىشى 266 مىڭ ادامدى قۇرايدى، بۇل وتكەن جىلعى كورسەتكىشكە قاراعاندا 3 پايىزعا ارتىق.

«جۇمىسسىزدار سانى ازايىپ وتىر، ولاردىڭ سانى قازىر 15 مىڭعا جەتپەيدى. جالپىلاما الساق، بىزدەگى جۇمىسسىزداردىڭ باسىم بولىگى مۇناي سەكتورىنان جۇمىس ىزدەيدى. ولاردىڭ ءارقايسىسىنا دەرلىك باسقا سالالاردا جۇمىس ورىندارى ۇسىنىلعانىمەن، جالاقىنىڭ تومەندىگىنە وراي جۇمىسسىز 10 ادامنىڭ التاۋى ودان باس تارتادى. سوندىقتان دا ءبىز ماڭعىستاۋلىقتار ءۇشىن جاڭا مۇمكىندىكتەردى قامتيتىن «جاڭا سەرپىن» اتتى باعدارلامانى جۇزەگە اسىرا باستادىق. اتالمىش باعدارلاما جاقىن 3 جىلدا 9 مىڭنان استام جۇمىس ورىندارىنىڭ اشىلۋى بولجاناتىن 32 جوبا ءۇشىن ماماندار دايارلايدى»، - دەيدى ا. ايداربايەۆ.

 بۇدان بولەك، وبلىس اكىمى وڭىردەگى دەنساۋلىق ساقتاۋ ماسەلەسىنە دە توقتالدى. ونىڭ ايتۋىنشا، وبلىستاعى ءومىر ءسۇرۋدىڭ ورتاشا ۇزاقتىعى 71,7 جاستى قۇرايدى.

«ماڭعىستاۋ وبلىسىندا بالا مەن انا ءولىمى ايتارلىقتاي ازايدى، تۇرعىندار اراسىندا قان اينالىمى جۇيەسىنىڭ اۋرۋىنان بولاتىن ءولىم- ءجىتىم ەداۋىر تومەندەدى. تۋبەركۋلەز اۋرۋىنا شالدىققاندار مەن وسى اۋرۋ سالدارىنان كوز جۇمعاندار قاتارى ازايدى. مۇنى ۇلكەن جەتىستىك دەپ ايتۋعا بولادى»، - دەدى اليك ايداربايەۆ.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى