استانادا ون ساۋساعىنان ونەرى تامعان زەرگەردىڭ كورمەسى اشىلدى
كورمەنىڭ اشىلۋ سالتاناتىنا قر مادەنيەت جانە سپورت ءمينيسترى ارىستانبەك مۇحامەدي ۇلى، ق ر تۇڭعىش پرەزيدەنتى مۋزەيى ديرەكتورىنىڭ ورىنباسارى كۇلايشا اقتايەۆا، سۋرەتشى-زەرگەر ەستاي داۋبايەۆ، ق ر مادەنيەت قايراتكەرى جەڭىس كاكەن ۇلى جانە باسقا دا ونەر يەلەرى قاتىستى.
«بەرىك ءالىبايدىڭ بۇكىل ءومىر جولى وسى ونەر سالاسىندا ءوتىپ كەلەدى. ول ءوزىنىڭ ەڭبەگىمەن، تالانتىمەن، ەلگە دەگەن ەرەكشە ىنتاسىمەن ءبىرقاتار جەتىستىككە جەتىپ جۇرگەن ازامات. ونىڭ شەبەرحاناسىنا كىرگەن ادام قايتىپ شىققىسى كەلمەي قالادى. نەگە دەسەڭىز، قول ونەر بۇيىمدارى مەن زەرگەرلىك بۇيىمداردىڭ كوزدىڭ جاۋىن الاتىن نەشە ءتۇرلىسى وسىندا. بۇگىنگى كورمەگە دە وسى شەبەرىمىزدىڭ قولىنان شىققان قۇندى بۇيىمدار قويىلىپ وتىر. سوندىقتان ولاردى تاماشالايمىن دەگەن ءار ادامعا ەرەكشە اسەر ەتەتىنى ءسوزسىز»، - دەپ اتاپ ءوتتى كورمەنى اشىپ بەرگەن مينيستر ا. مۇحامەدي ۇلى.
كورمەدە ب. ءالىبايدىڭ اۆتورلىق زەرگەرلىك جۇمىستارى ەكى كورمە زالىنا قويىلعان. ونلا قازاق باتىرلارىنىڭ قارۋ- جاراقتارىن، سونداي-اق ءداستۇرلى قازاق قوعامىنا ءتان حانداردىڭ بيلىك نىشانى بولىپ تابىلاتىن اساتاياقتاردى كورۋگە بولادى.
سونىمەن قاتار قازاق قىزدارىنىڭ اشەكەي بۇيىمدارى، قوس بىلەزىكتەر، سىرعالار، بويتۇمارلار، وڭىرجيەكتەر، جۇزىكتەر قويىلعان. ەكسپوناتتاردىڭ بارلىعى كوبىنە مارجان، مالاحيت، لاعىل، اقىق سىندى اسىل تاستارمەن بەزەندىرىلگەن.
«كورمەگە سوڭعى ون شاقتى جىلداعى قولىمنان شىققان ەڭبەكتەرىم قويىلىپ وتىر. ولاردىڭ كەيبىرى ون شاقتى جىل بويى وسى مۋزەيدە تۇرعان ەكسپوناتتار. ماسەلەن استانانىڭ العاشقى تويىندا ەلباسىعا سىيلانعان اساتاياعىم دا بۇگىنگى كورمەدە تۇر»، - دەيدى كورمە اۆتورى ب. ءالىباي.
ايتا كەتەيىك، زەرگەردىڭ قولىنان شىققان بۇيىمدار «تاۋەلسىزدىك سارايىنداعى» ەتنوگرافيا جانە قولدانبالى ونەر گالەرەياسىندا، ق ر تۇڭعىش پرەزيدەنتى مۋزەيىندە، ق ر ورتالىق مەملەكەتتىك مۋزەيىندە جانە قر ۇلتتىق مۋزەيى قورلارىندا، سونداي-اق جەكە كوللەكتسيونەرلەر مەن شەتەلدىك گالەرەيالاردا ساقتاۋلى.
ب. ءالىباي 2013 - جىلى سانكت-پەتەربور قالاسىندا كارل فابەرجە حالىقارالىق مەموريالدىق قورىنىڭ «ەڭبەگى سىڭگەن زەرگەر» گاۋھار تاستى وردەنىمەن جانە 2014 - جىلى «مۇسىلمان الەمىنىڭ قۇرمەتتى زەرگەرى» وردەندىك بەلگىسىمەن ماراپاتتالعان.
كورمە 15 - جەلتوقسانعا دەيىن جالعاسادى.
اۆتور: ءابۋ-اسقار مەكەش ۇلى
