وقۋشىعا ءۇي تاپسىرماسىن بەرۋ قاجەت پە؟

بۇل باستاماعا قىرىن قاراۋشىلار دا كەرىسىنشە، جاقتاۋشىلار دا كوپ.

اسىرەسە، اتا - انالار. ولار مۇعالىمدەردىڭ ساباقتى ءۇيىپ بەرەتىنىن، سالدارىنان ۇل-قىزدارىنىڭ اۋىرتپالىقتى كوتەرە المايتىنىن ايتىپ شاعىنۋدا. الايدا ءبىلىم مينيسترلىگى ۇسىنىسقا ءۇزىلدى-كەسىلدى قارسى شىقتى. ويتكەنى، ءۇي تاپسىرماسىن ورىنداۋدىڭ ۋاقىتى ءتيىستى نورمادا تايعا تاڭبا باسقانداي جازىلعان.

مەكتەپ وقۋشىسىنا ءۇي تاپسىرماسىنىڭ بەرۋ بەرمەۋدىڭ سوڭى داۋعا ۇلاستى. بۇل ۇسىنىستى كوتەرىپ جۇرگەندەردى ءبىلىم مينيسترلىگى جاقتىرىپ وتىرعان جوق. ءتىپتى سوعان بولا، بۇرىننان بار تالاپتى وزگەرتپەيتىنىن شەگەلەپ ايتتى. ويتكەنى مۇعالىمنىڭ وقۋشىلارعا ءۇي تاپسىرماسىن بەرۋى ءتيىستى ەرەجەدە جازىلعان ەكەن.

تالعات شاكەنوۆ، ق ر ءبىلىم جانە عىلىم مينيسترلىگىنىڭ باسقارما باسشىسى:

- ءۇي تاپسىرماسى بەرىلگەندە ءار جاس ەرەكشەلىگىنە قاراي بەرىلەدى. مىسالعا 1 مەن 2 سىنىپتاردا ۇيدە ورىندالاتىن تاپسىرما 1 ساعاتتان اسپاۋى كەرەك. 3 پەن 4 - سىنىپتاردا 2 ساعاتتان، سولاي-سولاي. ال، جوعارعى سىنىپتاردا 4 ساعاتتان اسپاۋى كەرەك. جالپى، ۇيگە بەرىلەتىن تاپسىرمالاردىڭ كولەمى سىنىپتا ورىندالاتىن تاپسىرمادان اسپاۋى كەرەك.

الايدا بۇل تەك سانيتارلىق نورمادا كورسەتىلگەن بولىپ شىقتى. سوندىقتان ۇلتتىق ەكونوميكا مينيسترلىگىنە قاراستى سانيتار-دارىگەرلەر ءۇي تاپسىرماسىن مۇلدەم الىپ تاستاۋ باستاماسىنا قىرىن قاراپ وتىرعان ارىپتەستەرىن تۇسىنبەي دال.

مارال راقىمجانوۆا، ق ر ۇلتتىق ەكونوميكا مينيسترلىگى تۇتىنۋشىلار قۇقىعىن قورعاۋ كوميتەتى باسقارماسىنىڭ باسشىسى:

- بالالاردىڭ ءۇي تاپسىرماسىنا جۇمسايتىن اۋىرتپالىقتارى بىردە-ءبىر زاڭدا كورسەتىلمەگەن. كورسەتىلگەنى - تەك ولاردىڭ ساباققا قانشا ۋاقىتتارىن بولۋلەرى ءتيىس، وسى جاعى عانا قۇجاتپەن بەكىتىلگەن.

وسىلايشا، قوس مينيسترلىك ءبىر-بىرىمەن تۇسىنىسپەي جاتقاندا، ەكى ورتادا قاراپايىم وقۋشىلار زارداپ شەگىپ وتىر. 30 -جىل ۇستاز بولعان راۋتاي تورەگەلدى قىزى مۇعالىمدەردىڭ ءۇي تاپسىرماسىن ءۇيىپ بەرەتىنىنە وكپەلى. ايتۋىنشا، نەمەرەلەرى مەكتەپتەن ميى اشىپ ونسىزدا شارشاپ كەلەدى. سوندىقتان ۇيدەن ساباق ورىنداۋدى الىپ تاستاۋدى تالاپ ەتىپ وتىر.

راۋتاي توبىقبايەۆا، زەينەتكەر ۇستاز:

- بالالاردىڭ ميىن اعىزىپ جىبەردى. 8-12 ساعاتتان وقىتادى، بالالار شارشايدى. تەلەديدارلار بار، اقپارات كوپ. بالانىڭ ساباق وقۋعا ەش مۇمكىندىگى جوق.

راۋتاي تولىقبايەۆانى تاۋەلسىز ساراپشىلار دا قوس قولداپ قولدايدى. بار كۇش-قۋاتىن مەكتەپكە جۇمساپ كەلگەن بالانى اتا-انا ۇيىندە قيناپ ساباق وقىتا المايدى دەگەن پىكىردە. الايدا، ءبىلىم مينيسترلىگى ايتقانىنان قايتپاق ەمەس. ءتىپتى، ءۇي تاپسىرماسىن قايتا قاراماق.

ءسويتىپ وقۋشىلاردىڭ شىعارماشىلىعىن دامىتىپ، تانىمىن كەڭەيتەتىن وڭاي ساباقتاردىڭ بەرىلۋىن ەنگىزبەك.

«Ktk»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى