قازاقستان ۆەلوسيپەد فابريكاسىن اشپاق
بۇل تۋرالى استانا قالاسىندا «قازسپورتينۆەست» ا ق ۇيىمداستىرعان تۇركيادان كەلگەن الەۋەتتى ينۆەستورلارمەن وتكەن رەسمي كەزدەسۋدە ايتىلدى، دەپ حابارلايدى ق ر مادەنيەت جانە سپورت مينيسترلىگىنەن.
تۇركيادا ۆەلوسيپەد وندىرەتىن «Salcano» جانە سپورتتىق كيىم تىگەتىن «Inka Sportif» اتتى ءىرى وندىرۋشىلەر قازاقستاندا ۆەلوسيپەد فابريكاسىن اشۋدى جوسپارلاۋدا، سونداي-اق ولار «قازسپورتينۆەست» ا ق بازاسىندا يننوۆاتسيالىق تەحنولوگيالاردى پايدالانا وتىرىپ، سپورتتىق كيىم مەن جابدىقتار تىگەتىن فابريكا اشۋعا دايىن.
كەزدەسۋ بارىسىندا تاراپتار ىنتىماقتاستىق تۋرالى مەموراندۋمعا قول قويىپ، 20 ميلليون ا ق ش دوللارىنا دەيىن تىكەلەي ينۆەستيتسيا تارتا وتىرىپ، 2015 - جىلدىڭ ءبىرىنشى توقسانىندا جوعارىدا ايتىلعان ينۆەستيتسيالىق جوبالاردى ىسكە اسىرۋدى باستاۋ جونىندە كەلىسىمگە كەلدى.
ايتا كەتەيىك، بۇعان دەيىن «قازسپورتينۆەست» ا ق پرەزيدەنتى ارنابول باقىت باستاعان قازاقستاندىق دەلەگاتسيا تۇركياعا ءىسساپارى بارىسىندا تۇركيا رەسپۋبليكاسىنىڭ سپورت يندۋسترياسىنداعى باسشىلارمەن جانە بيزنەسمەندەرمەن ءبىرقاتار كەلىسسوزدەر جۇرگىزگەن، سونىمەن قاتار قازاقستاندا سپورت يندۋسترياسىن دامىتۋعا ءىرى كومپانيالار تارتۋ ماسەلەسىن تىلگە تيەك ەتكەن ەدى.
ارنابول باقىت تۇركيانىڭ جاستار ءىسى جانە سپورت مينيسترلىگى سپورت ىستەرى كوميتەتىنىڭ باس ديرەكتورى مەحمەت بايكانمەن كەزدەسىپ، ينۆەستيتسيا تارتۋ جانە جاڭا سپورتتىق تەحنولوگيا مەن سپورتتىق اكىمشىلىك سالاسىندا تاجىريبە الماسۋ، سونداي-اق بىرلەسكەن سپورتتىق ءىس-شارالار وتكىزۋ جونىندە ەكىجاقتى ىنتىماقتاستىقتى دامىتۋ تۋرالى كەلىسىمگە قول جەتكىزدى.
