ورالماندار ازاماتتىق كۋالىكتى ىقتيار حات العاننان كەيىن دە بىردەن الۋىنا بولادى - ت. دۇيسەنوۆا
بۇگىن ءماجىلىستىڭ الەۋمەتتىك-مادەني دامۋ كوميتەتىنىڭ ۇيىمداستىرۋىمەن ءوتىپ جاتقان كوشى-قون ۇدەرىستەرىنە ارنالعان دوڭگەلەك ۇستەل بارىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا وسىلاي مالىمدەدى.
«ەل اۋماعى بويىنشا ورالمانداردى قونىستاندىرۋ ساياساتى، ورالمان مارتەبەسى تۋرالى ماسەلەلەردى، ولاردى الەۋمەتتىك قامسىزداندىرۋ جانە ازاماتتىق الۋ قۇقىعىن قايتا قاراستىرۋ قاجەت. بۇل رەتتە قازاقستان رەسپۋبليكاسىنىڭ اۋماعىنا كەلگەن بارلىق ەتنيكالىق قازاقتارعا ورالمان مارتەبەسىن بەرۋ قونىستاندىرۋ وڭىرىنە قاراماستان جۇزەگە اسۋى شارت.
قازىرگى تاڭدا ورالمان مارتەبەسى ۇكىمەت ايقىنداعان وڭىرلەرگە كەلگەن ەتنيكالىق قازاقتارعا عانا بەرىلىپ كەلەدى. ەكىنشىدەن، جۇمىسپەن قامتۋدىڭ بەلسەندى شارالارى شەڭبەرىندە الەۋمەتتىك كومەكتى ۇكىمەت ايقىنداعان وڭىرلەرگە كوشىپ كەلگەن ورالماندارعا كورسەتۋ. سونىڭ ىشىندە ورالمان مارتەبەسىن العان كۇننەن باستاپ ءبىر جىلدىڭ ىشىندە باسقا وڭىرلەردەن كوشىپ كەلگەندەرگە وسىنى قاراستىرۋ كەرەك»، - دەدى مينيستر تامارا دۇيسەنوۆا.
بۇل رەتتە الەۋمەتتىك كومەكتى ۇكىمەت بەلگىلەگەن قونىستانۋ ايماقتارىنا ەلدەگى باسقا ايماقتاردان كوشىپ كەلگەن ورالمان الا الادى. الايدا، بۇل ايماقتاردان بەس جىل تولماي شىعىپ كەتكەن جاعدايدا الەۋمەتتىك پاكەت مەملەكەت پايداسىنا قايتارىلاتىن بولادى.
«ازاماتتىق الۋ قۇقىعى تۋىندايتىن مەرزىمدى بارىنشا قىسقارتۋ، ياعني ىقتيار حات العاننان كەيىن بىردەن بەرۋ ۇسىنىلادى. بۇگىنگى كۇنى ول ىقتيار حات العاننان كەيىنگى ءتورت جىلدان سوڭ دەپ قاراستىرىلعان. سونىمەن قاتار، ورالمان مارتەبەسىن بەرۋ جەتى جىلدان ءبىر جىلعا قىسقارتىلادى»، - دەدى ت. دۇيسەنوۆا.
ونىڭ سوزىنە قاراعاندا، ورالمان مارتەبەسىن العان كۇننەن باستاپ ءبىر جىلدىڭ ىشىندە ازاماتتىق الۋعا ءوتىنىش بەرمەگەن جاعدايدا، ولاردىڭ ەلىمىزدە بولۋى شەتەلدىك ازاماتتاردىڭ ەلىمىزدە بولۋىنا ۇقساس قاراستىرىلادى.
اۆتور: قانات مامەتقازى ۇلى
