قازاقستاندىقتار تالعات بيگەلدينوۆتى باقيلىق ساپارعا شىعارىپ سالدى - فوتو
باتىردى سوڭعى ساپارعا شىعارىپ سالۋعا كەلگەن قالا اكىمى احمەتجان ەسىموۆ ق ر پرەزيدەنتى نۇرسۇلتان نازاربايەۆتىڭ كوڭىل ايتۋ جەدەلحاتىن وقىپ بەردى.
«ۇ و س- نىڭ اتى اڭىزعا اينالعان قاھارمانى، كەڭەس وداعىنىڭ باتىرى اتاعىنىڭ ەكى مارتە يەگەرى، داڭقتى ۇشقىش تالعات بيگەلدينوۆ اعامىز ومىردەن ءوتتى. بارشا قازاق حالقىنا كوڭىل ايتامىن. وزدەرىڭىز جاقسى بىلەسىزدەر، تالعات جاقىپبەك ۇلى ەل باسىنا كۇن تۋعان شاقتا ەرلىك پەن شەبەرلىكتىڭ تاڭعاجايىپ ۇلگىسىن كورسەتىپ ەدى. سونىسىمەن ءوزىن دە، حالقىمىزدى دا وشپەس داڭققا بولەگەن بولاتىن. ول كىسى بەيبىت ومىرگە ورالعاننان كەيىن دە ازاماتتىق اۆياتسيا جانە قۇرىلىس سالالارىندا جەمىستى ەڭبەك ەتىپ، قاراپايىمدىلىعىمەن، زور ۇيىمداستىرۋشىلىق قابىلەتىمەن، جاقسى ادامگەرشىلىك قاسيەتتەرىمەن وزگەگە ۇلگى بولا ءبىلدى. وزدەرىڭىز بىلەسىزدەر، حالقىمىز ول كىسىنى ەرەكشە ماقتان تۇتتى. دۇنيە ەسىگىن اشقان مىڭداعان سابيلەرگە ول كىسىنىڭ ەسىمىن بەردى. ولاردىڭ كوبى باتىر اعاسىنا ەلىكتەپ، بىلىكتى مامان، جاقسى ازامات بولىپ ءوستى. قازاقستاندىقتار قاھارمان وتانداسىمىزدىڭ ەسىمى مەن ەڭبەگىن ەش ۇمىتپايدى دەپ سەنەمىن. مارقۇمنىڭ توپىراعى تورقا، جانى ءجانناتتا بولسىن»، - دەدى ەل پرەزيدەنتى نۇرسۇلتان نازاربايەۆ ءوزىنىڭ كوڭىل ايتۋ جەدەلحاتىندا.
ماسكەۋدە ماڭىزدى ءىسساپاردا جۇرۋىنە بايلانىستى ق ر قورعانىس ءمينيسترى يمانعالي تاسماعانبەتوۆ قارالى جيىنعا قاتىسا المادى. ونىڭ كوڭىل ايتۋ جەدەلحاتىن ءمينيستردىڭ ورىنباسارى تالعات مۇحتاروۆ وقىپ بەردى.
«ەلىمىزدىڭ داڭقتى ازاماتى، ەكى مارتە كەڭەس وداعىنىڭ باتىرى تالعات بيگەلدينوۆ اعامىز ومىردەن وزدى. جاقىندارى مەن تۋىستارىنا قايعىلارىنا ورتاقتاسىپ، كوڭىل ايتامىن. سوناۋ ات اۋىزدىعىمەن سۋ ءىشىپ، ەر ەتىگىمەن قان كەشكەن سۇراپىل سوعىس جىلدارى نەبىر قاھارماندىق ۇلگى كورسەتىپ تالعات اعامىز 2 مارتە باتىر اتاعىنا يە بولدى. ودان كەيىن دە ماڭداي تەرىن ەل تىنىشتىعىنا ارنادى. قازاقستاننىڭ باتىر ۇلى رەتىندە مەملەكەتىمىزدىڭ تاۋەلسىزدىگىن تاباندى، ەگەمەندىگىن باياندى ەتۋگە زور ۇلەس قوستى. ءوزىنىڭ باعا جەتپەس ەرلىگىمەن جاس ۇرپاققا تۇلعا رەتىندە ۇلگى بولا ءبىلدى»، - دەدى ق ر قورعانىس ءمينيسترى ي. تاسماعانبەتوۆ.
305 جاۋىنگەرلىك تاپسىرمامەن اۋە شايقاسىنا قاتىسىپ، جاۋدىڭ جويعىش ۇشاقتارىنىڭ كوزىن قۇرتقان اتاقتى باتىردىڭ اتى قازاق تاريحىندا التىن ارىپپەن جازىلارى ءسوزسىز. بۇكىل كەڭەس اسكەرىنىڭ ىشىنەن بەرلينگە ءبىرىنشى بولىپ ۇشىپ كىرىپ، جاۋ ۇياسىنا بومبا تاستاعان قازاق باتىرىنىڭ ەرلىگى ەكىنشى دۇنيەجۇزىلىك سوعىس كەزىندە ۇلكەن قۇبىلىسقا اينالعان. ايتا كەتۋ كەرەك، تالعات بيگەلدينوۆ - بارلىق ت م د ەلدەرى بويىنشا كوزى ءتىرى جالعىز كەڭەس وداعىنىڭ ەكى مارتە باتىرى بولاتىن.
«ومىردەن ۇلى تۇلعا كەتتى. ونىڭ قازاسى بىزدەر، ۇشقىشتار ءۇشىن ۇلكەن قايعى. ول اڭىز ادام ءبىزدىڭ ۇستازىمىز بولعانىن وتە ماقتان تۇتامىز. ودان اۋەدە ۇشۋ تۇرعىسىنان بولسىن، ومىرلىك بولسىن، ولشەۋسىز تاجىريبە الدىق. سوعىستان كەيىنگى جىلدارى تۋعان بالالاردىڭ كوبىنە تالعات ەسىمى بەرىلدى. سول ازاماتتاي ەلىن قورعايتىن ەر بولسىن دەپ. مەن دە سولاردىڭ ءبىرىمىن»، - دەدى تالعات مۇسابايەۆ.
باتىردىڭ دەنەسى كەڭساي-1 زيراتىندا جەرلەندى. ەرتەڭ الماتىدا باتىردىڭ قازا بولۋىنا بايلانىستى اس بەرىلەدى.
