تارازدا وتەتىن «ەۋرازيا بارىسىنا» قىتاي بالۋاندارى دا قاتىسادى
ماۋسىم ايىنىڭ سوڭىندا قازاق كۇرەسىنىڭ ماۋسىمىن «قازاقستان بارىسى» سەكىلدى ءىرى جوباسى باستاپ، ودان كەيىن تۇڭعىش رەت ۇيىمداستىرىلعان «الەم بارىسى» حالىقارالىق ءتۋرنيرى، سودان سوڭ «جاس بارىس» ءتۋرنيرى ءوتتى. ۇلتتىق سپورت تۇرىنەن ەكىنشى رەت ۇيىمداستىرىلىپ وتىرعان تاراز توپىراعىنداعى جارىس وسى جىلعا جوسپارلانعان ءىرى دودالاردى قورىتىندىلاماق.
«ەۋرازيا بارىسى» حالىقارالىق تۋرنيرىنە 12 ەلدىڭ اتىنان 60 بالۋان سىنعا تۇسەدى. بەلدەسۋلەر جارىس جۇيەسىنە سايكەس كوماندالىق سىن نەگىزىندە وتەدى. جانكۇيەرلەر 60 كەلى، 70 كەلى، 80 كەلى، 90 كەلى جانە 90 كەلىدەن جوعارى سالماق دارەجەلەرىندەگى بالۋانداردىڭ بەلدەسۋلەرىن تاماشالايتىن بولادى. وتكەن جىلمەن سالىستىرعاندا، بۇل جولى قاتىساتىن ەلدەر سانى ءبىرشاما ارتىپ وتىر. تولىعىراق ايتقاندا، رەسەي، قىتاي، تۇركيا، موڭعوليا، ءازىربايجان، گرۋزيا، ۋكراينا، پولشا، تاجىكستان، قىرعىزستان، وزبەكستان جانە قازاقستان ەلىنىڭ ەڭ ۇزدىك بالۋاندارى «ەۋرازيا بارىسى» اتاعىن يەلەنۋ ءۇشىن سىنعا تۇسەتىن بولادى.
قازىرگى تاڭدا بۇل باسەكەگە قاتىساتىن گرۋزيا مەن ءازىربايجان قۇرامالارىنىڭ بالۋاندارى بەلگىلى بولدى. ال قازاقستاننىڭ نامىسىن مۇحيت تۇرسىنوۆ، ابزال ارىستانبەكوۆ، قايرات اعىبايەۆ، ايبەك نۇعىماروۆ جانە داۋلەتحان جاقىپوۆ سىندى بالۋاندار قورعايدى.
«ەۋرازيا بارىسى» حالىقارالىق جارىسىنىڭ جالپى جۇلدە قورى - 100 مىڭ ا ق ش دوللارى شاماسىندا. جەڭىمپازدارمەن قاتار جۇلدەگە ىلىككەندەر جانە العاش سەگىزدىككە ەنگەن قۇراما كوماندالارعا اقشالاي سىياقىلار بەرىلەدى.
1-ورىن - 50 مىڭ $؛
2-ورىن - 20 مىڭ $؛
3-ورىن - 10 مىڭ $؛
4-ورىن - 6 مىڭ $؛
5-ورىن - 5 مىڭ $؛
6-ورىن - 4 مىڭ $؛
7-ورىن - 3 مىڭ $؛
8-ورىن - 2 مىڭ $؛
حالىقارالىق تۋرنيردىڭ بيلەتتەرى ساتىلىمعا شىعىپ ۇلگەردى. بيلەتتەردىڭ قۇنى: 3000, 5000, 7000, 10000 جانە 15000 تەڭگە كولەمىندە. بيلەتتەردى تاراز قالاسىنداعى «تاراز-ارەنا» سپورت سارايىنىڭ كاسساسىنان الا الاسىزدار.
بەلدەسۋلەر بارىسىندا كورەرمەندەر اراسىندا لوتورەيا ۇيىمداستىرىلىپ، باعالى سىيلىقتار ويناتىلماق. قازاق كۇرەسىنىڭ قۇرلىقتىڭ باسەكەسىن بۇرىنعىداي تىكەلەي ەفيردەن «قازاقستان» مەن «KazSport» ارناسى، رەسەيلىك «بوەتس» جانە تۇركيالىق«TRT Avaz» ارنالارى كورسەتەدى.
