وتانداسىمىز، وتانىنا ورالىپ، ءوز قارجىسىنا وقۋ ورتالىعىن اشتى
قازىر، الماتى وبلىسىنىڭ ىلە اۋدانىنا قونىس اۋدارعان تالاپتى جاس، قازاق جاستارى ءۇشىن تەگىن تىلدىك كۋرستار مەن ماتەتاتيكا ءپانىن تەرەڭ وقىتاتىن ورتالىق اشىپ وتىر. وقۋ ورنىنىڭ جۇمىسىمەن ارىپتەسىم جاراس نيازبەك تانىسىپ قايتتى.
11 جاسىندا الماتى وبلىسىنان انگليانىڭ مانچەستەر قالاسىنا قونىس اۋدارعان ازامات اراعا 12 جىل سالىپ ەلگە ورالىپتى. ءوزىنىڭ ايتۋىنشا، بىرنەشە بيىكتى باعىندىرعان، ەڭبەكككە ەرتە ارالاسقان. 20 جاسىندا لوگيستيكالىق كومپانيانىڭ تىزگىنىن دە ۇستاپتى. ەلدەن جىراقتا ءجۇرىپ انا ءتىلىن ۇمىتقانىنا ازداپ قىنجىلدى. الايدا ازامات اشقان وقۋ ورتالىعى ونى ايىپتاۋدان گورى، ماقتاۋعا تۇرارلىق.
ازامات شەرمۇحامەتوۆ، وقۋ ورتالىعىنىڭ جەتەكشىسى:
ورتالىقتى ءوز كۇشىممەن اشتىم. جالعا الاتىن عيماراتتى دا ءوزىم ىزدەپ تاپتىم. جوندەۋ جۇمىستارىن جاسادىم. بۇل ارەكەت اقشامنىڭ كوپتىگىنەن ەمەس، كىشكەنە بولسا دا ەلگە پايدام ءتيسىن دەگەن نيەتپەن ورىندالۋدا. وكىنىشكە وراي، كومەكتەسەيىن دەگەن ادامدى بايقامادىم.
ەسەسىنە تۇرعىندار قۋانا قارسى الىپتى. قوس قاباتتى مىنا عيمارات اۋىل جاستارىنىڭ تۇراقتى مەكەنىنە اينالعان. ارمانىم وسىنداي وقۋ ورتالىقتارىن رەسپۋبليكالىق دەڭگەيدە اشۋ دەيدى ازامات.
ءۇش ءتىلدى ۇيرەتىپ، ەسەپ- قيساپقا باۋليتىن مەكەمە الماتى وبلىسى ىلە اۋدانىنىڭ جاپەك باتىر اۋىلىندا ورنالاسقان. ال اعىلشىن ءتىلىنىڭ مۇعالىمى ديلياۆرۋز كۇن سايىن قالادان قاتىنايدى. ايتۋىنشا، ازاماتتىڭ قولقالاۋىمەن كەلگەن. اعىلشىن تىلىنە ىنتالى جاستار دەڭگەيىنە قاراي ءۇش توپقا بولىنگەن.
ديلياۆرۋز اجىمەتوۆا، اعىلشىن ءتىلىنىڭ مۇعالىمى:
وسىنداي وقۋ ورنىن اشتىم، ماعان كومەگىڭ كەرەك، مەنىڭ قولىم تيمەيدى، مۇندا بالالار بار اعىلشىن ءتىلىن كەرەك ەتەتىن، كومەكتەسشى دەپ سۇرادى. سوندىقتان مەن مۇندا كەلدىم، قازىر كەتكىم كەلمەيدى. بالالارعا ۇيرەنىپ قالدىم، وسى جەرگە ۇيرەنىپ قالدىم.
ازىرگە، وقۋ ورتالىعى ەلۋ- الپىس ادامعا ارنالعان. وزگە مەملەكەتتە ون ەكى جىل تۇرىپ، وتانعا ورالعان ازاماتتىڭ قايىرىمدىلىقپەن اينالىسقىسى كەلگەن ارەكەتىنە جەرگىلىكتى تۇرعىندار دا ءدان ريزا. ونىڭ بۇل ءىسى كوپكە ۇلگى دەيدى.
«31- ارنا»
