قازاق قىزى «جىل جاڭالىعىنان» ۇمىتكەرلەردىڭ ءبىرى

ولاردىڭ قاتارىندا شۆەيتساريالىق بەليندا بەنچيچ، امەريكاندىق شەلبي رودجەرس، جاپونيالىق كۋرۋمي نارا جانە قازاقستاندىق زارينا دياس بار. وسى تورتەۋىنە جانكۇيەرلەر داۋىس بەرەتىن بولادى. داۋىس بەرۋ قورىتىندىسى 17- قاراشا كۇنى جاريالانباق.

2013-جىلى كانادالىق ەجەني بۋشار «جىل جاڭالىعى» بولىپ تانىلعان ەدى. 2005-جىلدان بەرى تابىس ەتىلىپ كەلە جاتقان بۇل ماراپاتتى ءار جىلدارى سونداي-اق، كەيىن الەمنىڭ ۇزدىك راكەتكالارى قاتارىنا كوتەرىلگەن اگنەشكا رادۆانسكا، كارولين ۆوزنياتسكي، پەترا كۆيتوۆا يەلەنگەن بولاتىن.

2014-جىل جيىرما ءبىر جاستاعى قازاق قىزى، الماتى قالاسىنىڭ تۇلەگى زارينا دياس ءۇشىن اسا تابىستى بولعانى ءمالىم. اسىرەسە، ول الەم بىرىنشىلىكتەرىمەن تەڭ دەۋگە بولاتىن ۋيمبلدون تۋرنيرىندە، اۆستراليا مەن ا ق ش-تىڭ اشىق چەمپيوناتىندا ءبىرشاما ءساتتى ونەر كورسەتتى.

سونداي-اق، وساكا جارىسى سىندى WTA تۋرنيرىندە تۇڭعىش رەت فينالعا دەيىن جەتتى.

وسىنداي جەتىستىكتەردىڭ ناتيجەسىندە قازاقستاننىڭ ءبىرىنشى راكەتكاسى اتانعان ز. دياس الەمنىڭ ۇزدىك 34 تەننيسشىسىنىڭ قاتارىنا ەندى. ول وسى اپتادا دۇنيەجۇزىلىك رەيتينگتە تاعى ءبىر ساتىعا، 33-ورىنعا كوتەرىلدى. قازىرگى تاڭدا زارينا الداعى جىلى بۇدان دا بيىك تابىستارعا قول جەتكىزۋ ءۇشىن دايىندالۋدا.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى