قىسقى وليمپيادانى قابىلداۋعا بەيجىڭنىڭ مۇمكىندىگى جوعارى
وتكەن سەنبى كۇنى شياڭگاڭدا ۇلتتىق وليمپيادا كوميتەتتەرى قاۋىمداستىعىنىڭ باس اسسامبلەياسىنىڭ وتىرىسى ءوتتى. بۇل جيىندا ۇمىتكەر ەكى قالانىڭ وكىلدەرى قىسقى وليمپيادانى قابىلداۋعا قانداي جۇمىستار اتقارىلىپ جاتقانىن پرەزەنتاتسيا تۇرىندە كورسەتتى.
«Reuters» اگەنتتىگى تاراتقان اقپارات بويىنشا، جيىن سوڭىندا قىسقى ويىنداردى قابىلداۋا بەيجىڭنىڭ مۇمكىندىگى جوعارى تۇرعانى بەلگىلى بولىپتى. سەبەبى، قازاقستانعا قاراعاندا قىتايدىڭ ەكونوميكالىق مۇمكىندىكتەرى جوعارى ەكەن. ودان بولەك، بەيجىڭنىڭ 2008-جىلعى جازعى وليمپيادا ويىندارىن قابىلداعان تاجىريبەسى دە بۇل ەلدىڭ مۇمكىندىگىن تاعى ءبىر ساتى كوتەرگەن.
سونداي-اق بەيجىڭنىڭ بار مۇمكىندىگىن تانىستىرۋ ءۇشىن شياڭگاڭدا قالانىڭ ءمەرى ۆان انشۋن ارنايى ات باسىن بۇرىپتى. وتىرىس بارىسىندا ۆان انشۋن قىسقى وليمپيادا ويىندارىن قابىلداۋعا قالانىڭ بارلىق ينفروقۇرىلىمدارى دايىن ەكەنىن، قىتاي باسشىلارى 2022-جىلعى اق ويىنداردى وتكىزۋگە تولىق كومەك كورسەتۋگە نيەتتى ەكىنىن جەتكىزگەن.
راسىندا، قىتاي استاناسى 2022-جىلعى وليمپيادا ويىندارىن قابىلداۋعا بىلەك سىبانا دايىندالىپ جاتقان كورىنەدى. ول ءۇشىن قىتاي دەلەگاتسياسى امەريكالىق ەڭ مىقتى دەگەن PR- كومپانياسىن جالداپ، بەيجىڭنىڭ تاپسىرىسىن تانىستىرار بۇرىن شياڭگاڭداعى ەڭ مىقتى قوناق ۇيلەردىڭ بىرىندە ارنايى باسپا ءسوز جيىنىن وتكىزىپ، بۇل باسەكەنى 4 جانە 20- اقپان ارالىعىندا قابىلداي الاتىنىن قاداپ تۇرىپ ايتقان.
ال، الماتى قالاسىنىڭ اكىمى احمەتجان ەسىموۆ بۇل جيىنعا بارماعان. ءتىپتى الماتى قالاسىنىڭ پرەزەنتاتسياسى كورسەتىلەر بۇرىن ارنايى باسپا ءسوز جيىنى دا وتپەگەن. ءبىزدىڭ تاپسىرىستى بۇل ماجىلىستە ««ۋنيۆەرسيادا الماتى-2017» اتقارۋشى ديرەكتسياسىنىڭ باسشىسى يليا ورازاقوۆ كورسەتكەن.
پرەزەنتاتسيا بارىسىندا يليا ورازاقوۆ الماتى قالاسىنداعى سپورتتىق عيماراتتاردىڭ ءبىر-بىرىنە جاقىن ورنالاسقاندىعىنا باسا نازار اۋدارىپ، وليمپيادا ويىندارىن وتكىزۋگە قاجەتتى 13 عيماراتتىڭ 8 ءى باسەكەلەردى قابىلداۋعا تولىق دايىن ەكەنىن، تاعى ءۇش عيمارات 2017-جىلعى ۋنيۆەرسيادانى قابىلداۋ ءۇشىن سوعىلىپ جاتقانىن تىلگە تيەك ەتكەن.
ەكى ۇمىتكەردىڭ دە 2022-جىلعى قىسقى وليمپيادا ويىندارىن قابىلداۋعا ارنالعان رەسمي تانىستىرىلىمدارى ءوتتى. ەندى بۇل پرەزەنتاتسيالاردى ۇلتتىق وليمپيادا كوميتەتتەرى قاۋىمداستىعىنىڭ مۇشەلەرى مۇقيات تەكسەرەتىن بولادى. ال سوڭعى شەشىمدى حالىقارالىق وليمپيادا كوميتەتى كەلەر جىلدىڭ 31- شىلدەسىندە جاريالايتىن بولادى.
اۆتور: ۋاليحان قوسانباي
