اتىراۋ- استراحان كۇرەجولىن جاڭعىرتۋ شەكارالىق ىنتىماقتاستىققا تىڭ سەرپىن بەرەدى - م. ءتاجين
بۇل تۋرالى استراحان وبلىسىندا جۇرگەن قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى مارات ءتاجين ءوڭىر گۋبەرناتورى الەكساندر جيلكينمەن كەزدەسۋى كەزىندە ءمالىم ەتتى.
«قازاقستان پرەزيدەنتى ءوزىنىڭ جولداۋىندا كوپ جاعدايدا ينفراقۇرىلىمدىق جوبالاردى دامىتۋعا سۇيەنەتىن جاڭا ەكونوميكالىق ساياساتتىڭ باستى باعدارلارىنا باسا نازار اۋداردى. مەملەكەت باسشىسى العا قويعان مىندەتتەردە «اتىراۋ- استراحان» كۇرەجولىن جاڭعىرتۋ جونىندە دە ءسوز قوزعالدى. ونىڭ وتكىزۋ قابىلەتى شۇعىل ارتا تۇسەتىن بولادى. بۇل شەكارالىق ىنتىماقتاستىق ءۇشىن كوپتەگەن ماتەريالدىق جانە ينفراقۇرىلىمدىق مۇمكىندىكتەرگە جول اشادى»، - دەدى م. ءتاجين.
«قازاقستان پرەزيدەنتى ايتقان «اتىراۋ- استراحان» كۇرەجولىن جاڭعىرتۋ قاجەتتىگى ءبىزدىڭ ەكى ەل ءۇشىن عانا ماڭىزدى ەمەس. بۇل جولدى وزدەرىنىڭ ترانزيتتىك اعىندارى ءۇشىن ازەربايجان مەن يران كاسىپكەرلەرى دە اسىعا كۇتىپ وتىر. بۇل جول ەۋروپالىق جۇكتەر ءۇشىن دە ماڭىزدى، ويتكەنى قازاقستان ارقىلى ورتالىق ازياعا جانە ودان ءارى قىتايعا باعىتتالاتىن جۇك تاسىمالى ءۇشىن نەعۇرلىم قىسقا جول»، - دەدى استراحان وبلىسىنىڭ گۋبەرناتورى الەكساندر جيلكين 350 شاقىرىمدىق «اتىراۋ- استاراحان» كۇرەجولىن جاڭعىرتۋ جونىندەگى قازاقستان پرەزيدەنتى تاپسىرماسىنا تۇسىندىرمە جاساي وتىرىپ.
