زۋلفيا چينشانلو جانكۇيەرلەرىنە جىگىتىن تانىستىردى
سپورتشىنىڭ تاڭداۋى قىتايلىق اۋىر اتلەت لي يۋنچينگكە تۇسكەن ەكەن. جاس جىگىت قازاقستانعا قالىڭدىعىنا قولداۋ كورسەتۋ ءۇشىن ارنايى كەلىپتى.
«جانكۇيەرلەرىمە، سۇيىكتىمە جانە جاتتىقتىرۋشىما قولداۋ كورسەتكەنى ءۇشىن ۇلكەن العىس بىلدىرەمىن» ، - دەپ مالىمدەدى باسپا ءسوز كونفەرەنتسياسىندا ز. چينشانلو.
سپورتشى بولاشاق جارىنسىز سۋرەتكە تۇسۋدەن باس تارتىپ، ونى كامەرا الدىنا شاقىرىپ الدى.
ەستەرىڭىزگە سالا كەتەيىك، الماتىدا ءوتىپ جاتقان اۋىر اتلەتيكادان الەم چەمپيوناتىندا 53 كەلىگە دەيىنگى سالماقتا ونەر كورسەتكەن اتلەتىمىز ءزۇلفيا چينشانلو بىرىنشىلىكتىڭ التىن جۇلدەسىن جەڭىپ الدى. ءسويتىپ، سپورتشى قىزدىڭ قورجىنى الەم چەمپيوناتىنىڭ ءۇشىنشى التىنىمەن تولىقتى. العاشقى جۇلقي كوتەرۋ سىنىندا ءزۇلفيا ءۇشىنشى مۇمكىندىكتە 98 كەلىنى كوتەردى. ال سەرپە كوتەرۋ سايىسىندا وتانداسىمىز 134 كەلىنى كوتەرىپ، ءوز رەكوردىن جاڭارتتى. قورىتىندى ەسەپتە 232 ۇپاي جيناعان قازاقستاندىق سپورتشى تۇعىر بيىگىنە كوتەرىلدى.
لوندون وليمپياداسىنىڭ كۇمىس مەدال يەگەرى، تايپەي اتلەتى سيۋي شۋتسزين قورىتىندى ەسەپتە باس- اياعى 218 كەلىنى باعىندىرىپ، ەكىنشى ورىننان كورىندى. ۇزدىك ۇشتىكتى 214 ۇپايمەن قىتايلىق زىلتەمىرشى لي ياتسزيۋن تۇيىندەدى.
