ەلباسىنىڭ جاڭا ەكونوميكالىق ساياساتقا نەگىزدەلگەن جولداۋىنىڭ تاريحي ماڭىزى زور - ق. جاقىپوۆ
جيىن بارىسىندا سپيكەر كەشەگى ەلباسى جولداۋىنا توقتالا كەلە، ونىڭ تاريحي ماڭىزى جوعارى ەكەنىن جەتكىزدى.
«بۇل اۋقىمدى جولداۋ، ويتكەنى، وندا وتە ۇلكەن جوسپارلار ايتىلدى، حالىققا مەملەكەت تاراپىنان زور كومەكتەر جاسالاتىنى بەلگىلى بولدى. بيۋدجەتتەن، ۇلتتىق قوردان، شەتەلدىك ينۆەستيتسيالاردان ەكونوميكانى دامىتۋعا، جول قۇرىلىستارىن سالۋعا تارتىلاتىن قوماقتى قاراجاتتار تۋرالى ەستىدىك. حالىقتىڭ جەكەلەگەن جىگىنە، شاعىن جانە ورتا بيزنەسكە قولداۋ بولادى. بارلىعىن قوسقاندا 24 ميلليارد دوللاردى قۇرايدى. بۇل تاريحي جولداۋ، ويتكەنى ەلباسى گەوساياسي جاعدايعا ناقتى باعا بەردى، ەلىمىزدىڭ جاقىن كەلەشەكتەگى دامۋ ۆەكتورىن ايقىندادى، وسىلايشا ەل باسشىلىعىنىڭ قازاقستان تاعدىرىنا قاتىستى ساياسي جاۋاپكەرشىلىكتى وزىنە الۋعا دايىن ەكەنىن ناقتىلاي ءتۇستى»، - دەدى ق. جاقىپوۆ.
بۇدان بولەك، پالاتا ءتوراعاسى الەمدىك ەكونوميكالىق داعدارىس، الىپ دەرجاۆالاردىڭ سانكسيالىق قاقتىعىستارىنىڭ سالدارىن، ەنەرگيا تاسىمالداۋلارعا باعانىڭ قۇلدىراۋىن، ءبىرقاتار كورشىلەس ەلدەردەگى تۇراقسىزدىق ءبىزدىڭ ەلىمىزدەگى احۋالعا دا جاعىمسىز اسەر ەتەتىنىن ايتتى. ويتكەنى قازاقستان گەوساياسي قىسىمنىڭ ەپيتسەنترىندە ورنالاسقان. ال مەملەكەت باسشىسى جاقىن جىلداردىڭ ەلىمىز ءۇشىن سىناق ۋاقىتىنا اينالاتىنىن، سونىمەن قاتار بۇكىل الەم ارحيتەكتۋراسى وزگەرىسكە ۇشىرايتىنىن العا تارتقان بولاتىن. ەندەشە بۇل ساتىدان كەز كەلگەن مەملەكەت جاپا شەكپەي وتە المايتىنى ايقىن.
«مۇنداي تاريحي كەزەڭدە ەلباسى قازاقستاننىڭ تاعدىرىنا، قاۋىپسىزدىگىنە، حالقىمىزدىڭ كەلەشەگىنە الاڭداماي تۇرا المايدى. زاماننىڭ ناقتى قاتەرلەر مەن قاۋىپتەرىنەن قوعامنىڭ، ەلىمىزدىڭ ەكونوميكاسىنىڭ ورنىقتى دامۋىنا الاڭداپ، قاۋىپسىزدىكتى باستى نازاردا ۇستاپ وتىر. ەل پرەزيدەنتى «نۇرلى جول» اتتى جاڭا ءارى قۇندى باعدارلاما ۇسىندى. جاڭا ەكونوميكالىق ساياساتتىڭ وزەگى جەتى باعىت بويىنشا ينفراقۇرىلىمدىق دامۋ بولىپ تابىلادى»، - دەدى ءماجىلىس سپيكەرى.
ءسوز سوڭىندا پالاتا ءتوراعاسى ەلباسى ايقىنداعان وسى جەتى باعىت بويىنشا بۇگىننەن باستاپ ۇكىمەتپەن قويان- قولتىق جۇمىس جاساۋ كەرەكتىگىن العا تارتىپ، جوسپاردىڭ زاڭنامالىق قامتىلۋىنا بارلىق جاعداي جاساۋ كەرەكتىگىن اتاپ ءوتتى.
«بۇل ءبىزدىڭ مىندەت پەن جاۋاپكەرشىلىك. بۇل ارقىلى ءبىز قازاقستاننىڭ الەمدەگى ەڭ دامىعان وتىز ەلدىڭ قاتارىنا ەنۋىن قامتاماسىز ەتە الامىز. قازاقستاندىقتار «نۇرلى جول» اتتى جاڭا ەكونوميكالىق باعدارلامانى جان- جاقتى قولدايدى دەپ سەنەمىن» ، - دەدى ول.
اۆتور: قانات مامەتقازى ۇلى
