مەرۋەرت تۇسىپبايەۆا ەلگە قالاي تانىلدى؟ - كەسكىن
ءشومىشباي ساريەۆتىڭ سوزىنە جازىلعان جاڭا ءان اكادەميانى ەندى عانا بىتىرگەن جاپ- جاس تەاتر اكتريساسىن ۇلكەن ونەر ايدىنىنا قالاي الىپ شىقتى؟
مۋحامەدجانوۆ- بالا كۇنىمدە روزا رىمبايەۆانىڭ ورىنداۋىنداعى «قۇس جولى» دەيتىن ءانىن ەسىم كەتە تىڭداپ، قوسىلا شىرقاپ، وسكەندە ءانشى بولسام، وسى كومپوزيتور ماعان ارناپ ءان جازسا عوي دەپ ارماندايتىن ەدىم. قازىر تاڭ قالامىن، ادامدار ارمانداسا، ارماندار ورىندالادى ەكەن، - دەيدى ءانشى مەرۋەرت تۇسىپبايەۆا.
ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنا اكتريسا بولىپ قابىلدانعان كەزىمدە سپەكتاكلدە مەن وينايتىن كەيىپكەر ءان ايتاتىن بولدى. ال ول ءاندى تولەگەن مۇحامەدجانوۆ جازاتىن بولدى. ول كىسى سول كەزدە مەنىڭ داۋىسىمدى تىڭداپ كورىپ: «مەرۋەرت، مەندە ءبىر ءان بار. ءبىراز تانىمال انشىلەر ونى ورىنداۋعا سۇراپ ءجۇر. بۇل انگە جاڭا داۋىس كەرەك، جاڭا ءبىر لەپ بولسا ەكەن دەپ وتىرمىن. ول ءاندى تانىمال بولماعان ءبىر ءانشى جاڭا ءبىر كەلبەتپەن الىپ شىقسا دەپ ءجۇر ەدىم» ، دەدى.
مۋزىكا مەترى مەنى ۇمىتتەندىرگەنىمەن دە، ءما ساعان بەردىم بۇل ءاندى، ورىنداي بەر دەگەن اڭگىمە بولعان جوق. ويتكەنى، كومپوزيتوردى دا تۇسىنۋگە بولاتىن ەدى. ول كەزدە ينستيتۋتتى ەندى عانا ءبىتىرىپ كەلگەنمىن، ەشكىم تانىمايتىن اكتريسامىن. وعان قوسا، بۇل ءاندى تاعى ءبىر جاس ءانشى ورىنداعىسى كەلىپ، دايىندالىپ ءجۇر ەكەن.
ال كومپوزيتور ءوزىنىڭ جاڭا انىنە ىشتەي «كاستينگ» جۇرگىزىپ ءجۇرىپتى. قىسقاسى، وسى ءاندى ايتىپ كورۋگە رۇقسات بەرگەن سياقتى بولعانىمەن، ماعان تۇبەگەيلى سەنگەن جوق. وسىلايشا ەكى ايداي وسى انگە دايىندالىپ، ەكى ءانشى دە جازاتىن بولدىق. ءاننىڭ سازى، ءسوزى، وڭدەۋى بىردەي، ورىندايتىن ادام - ەكەۋ ەدىك. ەكىنشى ءانشىنىڭ داۋىسى وتە ليريكالىق بولدى. ال مەنىڭ قوڭىر داۋىسىمدا دراما بار.
سونىمەن، ول كەزدە قازىرگىدەي ەكى بۇرىشتىڭ بىرىندە دىبىس جازۋ ستۋدياسى جوق. تەك «قازاقفيلم» كينوستۋدياسىندا عانا ۇلكەن دىبىس جازۋ ستۋدياسى مەن ءبىر عانا ءالىم بايعارين دەگەن ادام بولاتىن. سونىمەن، بۇل ءاندى تۇسكە دەيىن رانو اتتى ءانشى، تۇستەن كەيىن مەن بارىپ جازدىم. ءان دايىن بولعان سوڭ راديودان عانا بەرىلىپ ءجۇردى.
ال بۇل «تاماشا» ويىن- ساۋىق وتاۋىنىڭ اتى دۇركىرەپ تۇرعان كەزى بولاتىن. ونىڭ ساحناسىندا ءان سالۋ ەكى ءانشىنىڭ بىرىنە بۇيىرمايتىن باقىت. قىسقاسى، مەن دە وسى «تاماشادا ءان سالۋدى ارمانداپ، باعىمدى سىناپ كورۋگە كىرىستىم. ءوزىم دە جاقسىمىن، ءانىم دە جاقسى دەپ، جەلپىلدەپ «تاماشاعا» بارسام، جارايدى دەپ بىردەن الدى. ەكى كۇن قاتارىنان رەپەتيتسيالارىنا قاتىسىپ، تانىس بىتكەنگە «تاماشادا» ءان ايتاتىن بولدىم دەپ، قۇلاقتارىن شۋلاتىپ قۋانىپ ءجۇرمىن. ءدال كونتسەرت بولاتىن كۇنى ەتەك- جەڭىم جەلبىرەپ، كونتسەرتكە جەتىپ بارسام، «تاماشانىڭ» باعدارلاماسىندا جوقپىن. بۇل - ۇلكەن ساحناعا شىعاتىن بولدىم دەپ جەلكىلدەپ كەلگەن جاس ءانشىنىڭ العاش ماڭدايى تاسقا سوعىلۋى بولاتىن.
ءبىراق، جاستىققا ءتان البىرتتىقپەن، «جوق، جەڭىلمەيمىن» دەدىم مەن. ءوزىمنىڭ توقتامايتىنىمدى ءبىلدىم. ويتكەنى، بۇل كەرەمەت ءان كۇندەردىڭ كۇنىندە تىڭدارماننىڭ جۇرەگىنە جول تاباتىنىنا كامىل سەندىم. ءبىزدىڭ جۇرگەنوۆ اكادەمياسىندا كليپ تۇسىرەتىن ءبىر تالانتى جىگىتتىڭ بار ەكەنىن ەستىگەن ەدىم. ول كەزدە كوپ ادام كليپ دەگەننىڭ نە ەكەنىن دە بىلمەيتىن. سونىمەن، الگى بالانى اكادەميادان تاۋىپ الدىم. وعان ءاندى ۇسىنعان كەزىمدە ۇناسا تەگىن ءتۇسىرىپ بەرەتىندىگىن ايتتى. ول قازىرگىدەي ۇيالى تەلەفون دەيتىن جوق زامان ەدى، ءبىر كۇنى تەاتردا جۇمىستا جۇرسەم، دانيار كەلىپ، ەرتەڭ كليپتى تۇسىرەمىز، دەدى.
ال مەن كليپ تۇسىرۋگە دايىن ەمەس ەكەندىگىمدى، ءتىپتى، كويلەگىم دە جوق ەكەنىن ايتىپ جاتىرمىن. ول كامەرانى ءبىر كۇنگە عانا جالعا العانىن ايتىپ، مۇنداي مۇمكىندىكتى جىبەرمەي، سول ساتتە كليپكە تۇسەتىن جىگىت ىزدە، دەدى. سول ارادا ءبىر اكتريسانىڭ كويلەگىن سۇراپ الىپ، ەر ادامدى قايدان تابارىمدى بىلمەي، دراما تەاترىنىڭ اكتەرى كەڭەس نۇرلانوۆتى تاۋىپ الماق بولعانمىن. بۇل ارەكەتىمنەن تۇك شىقپاعان سوڭ، قىسىلتاياڭ ۋاقىتتا كۇيەۋىمدى كليپكە تۇسۋگە كوندىرىپ، ەرتەسىنە كليپ تۇسىرۋگە كىرىسىپ كەتتىك. دانياردىڭ قاسىندا كومەكشىسى بار ەدى. سوعان: «ۆەتەر» دەپ ايعايلاسا ول ستۋدەنت ۇلكەن كارتون قاعازبەن شاشىمدى جەلپي جونەلەدى. «سولنتسە» دەسە اينانى شاعىلىستىرىپ، بەتىمە جارىق تۇسىرەدى. قازىرگىدەي ارنايى ەففەكتىلەر، مۋزىكالىق تەحنولوگيالار اتىمەن جوق. مىنە، «قيماي سەنى بارامىن» ءانى وسىلاي ءبىر كۇندە دۇنيەگە كەلدى.
سول دانيار چۋنكەنەيەۆ 23 جاسىندا مەنىڭ اتىمدى شىعارىپ، ءبىر جىلدان كەيىن قايتىس بولىپ كەتتى. سول ءبىر تالانتتى ادام ءبىر عانا بەينەبايانىمەن مەنىڭ اتىمدى شىعاردى دا، ومىردەن وزدى.
ەڭ كۇلكىلىسى، ارەڭ تاپقان كويلەگىمنىڭ بەينەكليپتە سۇلباسى دا جوق. بۇل دا چۋنكەنەيەۆتىڭ تالانتىنىڭ جەمىسى. وسىلايشا، مەنىڭ ورىنداۋىمدا بۇل ءان ءبىر عانا كليپپەن ەلگە تانىلىپ كەتتى.
سول جىلدارى كليپ قايتا- قايتا «31 - تەلەارنادان» بەرىلىپ جاتتى. كليپتىڭ بارلىق جەردە قويىلىپ جاتاتىندىعى سونشالىقتى، سول جىلدارى «ۇتىكتى قوسساڭ دا مەرۋەرت تۇسىپبايەۆا ءان ايتادى» دەيتىن قاعىتپا قالجىڭ بولاتىن.
كومپوزيتور مەن ءانشىنىڭ شىعارماشىلىق تاندەمىندە «قيماي سەنى بارامىن» انىنەن كەيىن دە «جانىم- اۋ، الدىڭ باۋراپ» ، «ساعىنعان جوقپىن» ، «سەنى عانا سۇيەمىن» ، «كەشىر، انا» سياقتى ءبىرقاتار تاماشا اندەر دۇنيەگە كەلدى.
«شىنىمدى ايتسام، تولەگەن مۇحامەدجانوۆتىڭ «قيماي سەنى بارامىن» ءانى ماعان تاعدىردىڭ تارتۋى بولاتىن» ، دەيدى ءانشى.
ايناش ەسالي،
«ەگەمەن قازاقستان» .
