شايتان پايعامبارعا (س. ع. س) قانداي سىر ايتقان؟
بۇل حاديستى ساحابا يبن ابباس جەتكىزگەن. حاديستە ماعاز يبن جەبەل ديالوگتى بىلاي باياندايدى: «ءبىر كۇنى پايعامبارمەن بىرگە انسارلاردىڭ (ءمادينالىق ادامدار) ءبىرىنىڭ ۇيىندە جينالىپ، اڭگىمەگە كىرىسىپ كەتكەنبىز.
سول كەزدە سىرتتان الدەبىرەۋ: «ءۇي يەسى جانە ۇيدەگىلەر! ماعان ۇيگە كىرۋ ءۇشىن رۇقسات بەرەسىزدەر مە؟ مەنىڭ سىزدەردەن جالعىز تىلەگىم جانە ورتاعا سالاتىن ءىسىم بار»، - دەپ داۋىستادى. سوندا پايعامبار: «بۇل سويلەپ جاتقان كىم، بىلەسىزدەر مە؟» - دەپ سۇرادى. ءبىز: «ەڭ جاقسى بىلەتىن اللا جانە ونىڭ پايعامبارى»، - دەدىك.
«ول - شايتان. اللانىڭ لاعنەتى ونىڭ ۇستىندە بولسىن»، - دەپ پايعامبار ءوزىنىڭ سۇراعىنا ءوزى جاۋاپ بەردى. سول ارادا حازىرەتى ومار: «ەي، اللانىڭ ەلشىسى ماعان رۇقسات بەرىڭىز، ونى ولتىرەيىن»، - دەپ ەدى پايعامبار وعان رۇقسات بەرمەيدى.
«ءاي، ومار، توقتا! ونى سەن جاقسى بىلمەيسىڭ. وعان اللا تاعالا تاراپىنان بەلگىلى ءبىر ۋاقىتقا دەيىن مەرزىم بەرىلگەن، ولتىرەمىن دەگەندى قوي»، - دەپ پايعامبار ونى توقتاتىپ تاستادى دا، ارتىنشا: «ەسىكتى اشىڭىزدار! ول ىشكە كىرسىن. شايتان بۇل جاققا كەلۋ ءۇشىن اللادان ءامىر العان. ايتقاندارىن تۇسىنۋگە تىرىسىڭىزدار»، - دەدى. راۆي ەسىكتى اشتى، شايتان ىشكە كىردى دە، بىزگە كورىندى. ول شاشى تاقىر، كوزى قىلي كوسە شال ەكەن. يەگىندە تەك التى-جەتى قىل سالبىراپ تۇر. اتتىڭ قىلى سەكىلدى.
- سالەم، مۇحاممەد! سالەم سىزدەرگە، مۇسىلمان جاماعات! - دەپ سالەم بەردى.
- سالەم اللانىكى، لاعنەت! - دەدى پايعامبار.
- ءبىر جۇمىسپەن كەلگەنىڭدى ەستىدىم. ول قانداي جۇمىس؟
- مەن بۇل جەرگە ءوز ىقتيارىمنان تىس كەلۋگە ءماجبۇر بولدىم. قۇرمەت يەسى - راببىنىڭ جانىنان ماعان ءبىر پەرىشتە كەلىپ اللا تاعالانىڭ ماعان: «وتە سورلى ءبىر كۇيدە مۇحاممەدكە باراسىڭ. وعان ادام بالاسىن قالاي الداپ-اربايتىنىڭدى ءتۇسىندىرىپ، قالاي ادال جولدان تايدىراتىنىڭدى باياندايسىڭ. ودان كەيىن سەنەن نە سۇراسا دا، شىنىڭدى جاسىرمايسىڭ. ەگەر سوزىڭە ءبىر وتىرىك قوسساڭ، شىنىڭدى ايتپاساڭ، قۇل قىلامىن، دۇشپاندارىڭنىڭ الدىندا سەنى ويىنشىق ەتەمىن»، - دەگەن سالەمىن جەتكىزدى.
مىنە، وسى ءامىر بويىنشا ساعان كەلدىم. ماعان قوياتىن سۇراقتارىڭدى قوي. ەگەر دۇرىس جاۋاپ بەرمەسەم، دۇشپاندارىم مەنىمەن وينايدى. سول سەبەپتى مەن ءۇشىن دۇشپاندارىمنىڭ ويىنىنان ۇلكەن قيانات جوق.
- ەندەشە، سوزدەرىڭ شىنى مەن راس بولسا، سۇراقتارىما جاۋاپ بەر. جۇرت اراسىندا ەڭ جەك كورەتىن ادامىڭ كىم؟
- ەي، مۇحاممەد، سەنسىڭ! اللانىڭ جاراتقاندارىنىڭ اراسىندا سەنەن جەك كورىنىشتى ادام جوق.
- مەنەن باسقا قانداي ادامدى جاقتىرمايسىڭ؟
- بارلىق نارسەسىن اللا جولىنا ۇسىنعان جاس ادامدى.
- سودان كەيىن كىمدى جەك كورەسىڭ؟
- ءوزى سابىرلى بولا الاتىن، زيان نارسەلەردەن اۋلاق جۇرەتىن عالىمدى. تازالىق ءۇشىن ءۇش رەت جۋىناتىن ادامدى.
- ءارى قاراي ايتا بەر.
- سابىرلى، كەدەي ادامدى. وزىنە قاجەتتى زاتتى ەشكىمنەن سۇرامايتىن، ءوزىنىڭ ءحالى تۋرالى ەشكىمگە مۇڭ شاقپايتىن ادامدى.
- سەن كەدەيدىڭ سابىرلى ەكەنىن قايدان بىلەسىڭ؟
- ەي، مۇحاممەد، كەدەيلەر قاجەتتەرىن ءوزى سياقتى بىرەۋگە ايتپايدى. كىمدە-كىم ءوز زارۋلىگى تۋرالى ءوزى سياقتى بىرەۋگە ءۇش كۇن بويى نەمەسە كۇن سايىن زارلايتىن بولسا، اللا ونى سابىرلى ادامداردان سانامايدى. ونىڭ سابىرلىعىن ءوز ءحالىن ەشكىمگە ايتىپ، اللاعا شاعىنبايتىنى دەپ تۇسىنەمىن.
- سودان كەيىن كىم؟
- شۇكىرلىك ەتكەن باي ادام.
- ماقۇل، ول باي ادامنىڭ شۇكىر ەتەتىنىن قالاي بىلەسىڭ؟
- وعان انىقتاپ قاراساڭ، العانىن ادال جولمەن تابادى، ءوز جونىمەن جۇمسايدى. وسىدان ونىڭ شۇكىر ەتىپ جۇرەتىن باي ادام ەكەنىن بىلەمىن.
پايعامبار تاقىرىپتى اۋىستىرىپ، وعان باسقا ءبىر سۇراقتار قويدى.
- ماقۇل، مەنىڭ ۇمبەتىم نامازعا تۇرعاندا ساعان نە بولادى؟
- ەي، مۇحاممەد، ءار مۇسىلمان ناماز وقىعاندا ىستىعىم كوتەرىلىپ دىرىلدەيمىن.
- نەگە مۇنداي بولاسىڭ، ەي، لاعىنەت جاۋعىر؟
- ەگەر ءبىر قۇل ساجدە ەتسە، ىستىعىم ءبىر دارەجەگە كوتەرىلەدى.
- مەيلى، ولار ورازا تۇتىپ، اۋىز بەكىتكەندە قانداي بولاسىڭ؟
- بۇل كەزدە ولار اۋىز اشقانعا دەيىن مەن بايلانامىن.
- مۇسىلماندار قاجىلىققا بارعان كەزدە قانداي حال كەشەسىڭ؟
- ول كەزدە جىندى بولىپ كەتەمىن.
- ۇمبەتتەرىم قۇران وقىعان كەزدە نە بولاسىڭ؟
- ول كەزدە تۋرا وتقا بالقىعان قورعاسىن سەكىلدى ەريمىن.
- ال ساداقا بەرگەن كەزدە قانداي بولاسىڭ؟
- ءا- ءا، بۇل كەزدەگى ءحالىم وتە مۇشكىل. ساداقا بەرگەن ادام قولىنا ارانى الىپ، مەنى ەكىگە بولگەن سياقتى بولادى.
- نەگە ارامەن ەكىگە بولگەن سياقتى بولاسىڭ، ەي، لاعىنەت؟
- بۇنى دا ايتىپ بەرەيىن. ساداقادا ءتورت جاقسىلىق بار. ولار مىنالار: اللا تاعالا ساداقا بەرگەننىڭ مالىنا بەرەكەت دارىتادى، حالقىنا سۇيىكتى ەتەدى، ونىڭ بەرگەن ساداقاسىنان دوزاق اراسىندا ءبىر پەردە جاسايدى، پەندەنى بالەدەن، قيىندىقتان جانە تاعى باسقالاردان ساقتايدى جانە ولاردى جوق قىلادى.
بۇدان كەيىن پايعامبار ىبىلىسكە قىسقا-قىسقا سۇراق قويدى.
- ەي، مالعۇن، بىرگە وتىراتىن جولداسىڭ كىم؟
- ءوسىمقورلار.
- دوسىڭ كىم؟
- زيناقورلار.
- توسەكتەسىڭ كىم؟
- ماسكۇنەمدەر.
- قوناعىڭ كىم؟
- ۇرىلار.
- ەلشىڭ كىم؟
- سيقىرشىلار.
- كوزىڭنىڭ نۇرى نە؟
- زايىبىنان اجىراسقاندار.
- سۇيىكتىڭ كىم؟
- جۇما نامازىن تاستاپ كەتكەندەر.
- ەي، مالعۇن، سەنىڭ كوڭىلىڭدى نە بۇزادى؟
- اللا جولىندا كۇرەسۋگە شىققان مۇسىلمانداردىڭ مىنگەن اتتارىنىڭ كىسىنەۋى.
- سەنىڭ دەنەڭدى نە ەرىتەدى؟
- تاۋبە ەتكەننىڭ تاۋبەسى.
- باۋىرىڭدى نە ءىرىتىپ-شىرىتەدى؟
- كۇندىز-ءتۇنى اللادان كەشىرىم سۇراۋ.
- بەتىڭدى قاي ۋاقىتتا تىرجيتاسىڭ؟
- جاسىرىپ ساداققا بەرگەن كەزدە.
- كوزدەرىڭدى كور قىلاتىن نە؟
- تۇنگى ناماز.
- باسىڭدى نە يدىرەدى؟
- جاماعاتپەن كوپ رەت وقىعان ناماز.
وسىنى ايتقان ءىبىلىس پايعامبارعا: «مىنە، ساعان وسى ايتقاندارىمنىڭ ءبارى شىندىق»، - دەپ كوزدەن عايىپ بولادى.
ديدار بەگاليەۆ
Facebook-تەگى پاراقشاسىنان
Alashainasy.kz
