الماتى حالىقارالىق اۋەجايىنا تالعات بيگەلدينوۆتىڭ ەسىمىن بەرۋ ۇسىنىلدى
ۇسىنىس حاتتى ولار ازاماتتىق اۆياتسيا كوميتەتىنە، «الماتى حالىقارالىق اۋەجايى» ا ق- نا جانە مەملەكەتتىك ونوماستيكالىق كوميسسياسىنا جولدادى.
«2014 - جىلدىڭ 10 - قاراشاسىندا 93 جاسقا قاراعان شاعىندا اۆياتسيانىڭ گەنەرال- مايورى تالعات بيگەلدينوۆ قايتىس بولدى. ول كەڭەس وداعىنىڭ ەكى مارتە باتىرى اتاعىنا يە بولعان جالعىز قازاق ەدى. وسىعان بايلانىستى ءبىز الماتى حالىقارالىق اۋەجايىنا قازاقستاننىڭ اسكەري جانە ازاماتتىق اۆياتسياسىنىڭ دامۋىنا ۇلكەن ۇلەس قوسقان باتىر تالعات بيگەلدينوۆتىڭ ەسىمىن بەرۋدى ۇسىنىپ وتىرمىز»، - دەلىنگەن حاتتا.
بەلسەندىلەر تالعات بيگەلدينوۆتىڭ باسقارۋىمەن 1957 - جىلى الماتى اۋەجايىنىڭ جاڭعىرتىلعانىن، ۇشۋ- قونۋ جولاعى كەڭەيتىلگەنىن اتاپ وتەدى.
«ت. بيگەلدينوۆتىڭ الماتىلىق اۋەجايدى قازىرگى كەزدەگى دەڭگەيگە دەيىن دامىتۋعا قوسقان ۇلكەن ۇلەسى ءبىلىنىپ تۇر. بيگەلدينوۆتىڭ جەتەكشىلىك ەتۋىمەن بالقاش، استانا، پاۆلودار، اتىراۋ، ورال، ارقالىق، قىزىلوردا، تاراز، قاراعاندى جانە تاعى باسقا جەرلەردە اەرودرومدار سالىندى. ونىڭ ازاماتتىق اۆياتسيانىڭ دامۋىنا قوسقان ايتۋلى ۇلەسى باتىردىڭ ەسىمىن لايىقتى تۇردە ماڭگى ەستە ساقتاۋعا نەگىز بولۋدا»، - دەپ اتاپ وتىلەدى بلوگەرلەردىڭ ۇندەۋىندە.
الەمدىك تاريحتا حالىقارالىق اۋەجايلاردى تانىمال ۇلتتىق ۇشقىشتاردىڭ ەسىمىمەن اتاۋ مىسالدارى بار. ماسەلەن، ىستامبۇلداعى سابيحا گيەكچەن اتىنداعى اۋەجاي.
«اتالعان ۇسىنىس ءبىزدىڭ باتىرىمىزدىڭ بەينەسىن بولاشاق ۇرپاق ءۇشىن ۇمىتپاۋعا كومەكتەسەدى، ال بۇل جاس قازاقستاندىقتاردا تاريحتى باعالاۋ، پاتريوتيزم مەن اۆياتسياعا دەگەن قىزىعۋشىلىقتى ارتتىرۋ ءۇشىن قاجەت. اۋەجايعا باتىر ەسىمىن بەرۋدى الداعى جىلى اتاپ وتىلەتىن جەڭىستىڭ 70 جىلدىق مەرەيتويىن مەرەكەلەۋگە ورايلاستىرۋعا بولادى»، - دەپ ەسەپتەيدى يدەيانىڭ باستاماشىلارى.
