تۇركيا پرەزيدەنتى حالىق قازىناسىن ىسىراپ ەتتى دەپ ايىپتالۋدا

 ول مەملەكەت باسشىنىڭ جوسپارى بويىنشا انكارانىڭ كورىكتى مەكەنىندە بوي كوتەردى. رەزيدەنسيانىڭ جالپى اۋدانى 150 مىڭ شارشى مەتردى قۇرايدى. وندا 1000عا جۋىق بولمە مەن ۇلكەندى- كىشى ءماجىلىس زالدارى بار.

 جەرگىلىكتى باسىلىمدار پرەزيدەنتتىڭ جۇمىس ورنى جاسىرىن تىڭداۋلارعا قارسى زاماناۋي قوندىرعىلارمەن جابدىقتالىپ، قاۋىپسىزدىك شاراسى بارىنشا كۇشەيتىلگەندىگىن جانە ول كولەمى بويىنشا فرانسياداعى ۆەرسالدان ءتورت ەسە، ۆاشينگتونداعى اق ءۇي مەن ماسكەۋدەگى كرەملدەن دە ۇلكەن ەكەندىگىن حابارلايدى.

 وتكەن اپتادا دەپۋتاتتار ءسان- سالتاناتىنا ساي تۇرعىزىلعان ءزاۋلىم عيماراتتىڭ قۇرىلىسىنا كەتكەن شىعىندى بىلمەك بولىپ، پارلامەنتكە ەسەپ بەرۋگە كەلگەن ەلدىڭ قارجى ءمينيسترى مەحمەت شيمشەككە ساۋال قويدى. ول اق سارايدىڭ قۇرىلىسىنا مەملەكەتتىك بيۋدجەتتەن 1 ميلليارد 370 ميلليون تۇرىك ليراسى (610 ميلليون ا ق ش دوللارى) بولىنگەنىن رەسمي جاريالادى. مۇنى ەستىگەن وپپوزيسيالىق پارتيالار پرەزيدەنت تايىپ ەردوعاندى حالىق قازىناسىن ىسىراپ ەتتى دەپ ايىپتاپ ۇلگەردى.

 مىسالى حالىقتىق رەسپۋبليكا پارتياسىنىڭ ءتوراعاسى كەمال كىلىچتاروعلىنىڭ پىكىرىنشە، 3 ميلليون جۇمىسسىز جۇرگەن حالقى بار ەلدە ءزاۋلىم ساراي سالىنباۋى ءتيىس. وپپوزيتسيا كوشباسشىسى الداعى سايلاۋدا پارتياسىنىڭ جەڭىسكە جەتىپ، بيلىك باسىنا كەلگەن جاعدايدا اق ساراي رەزيدەنسياسىن انكاراداعى تانىمال جوعارى وقۋ ورىندارىنىڭ ءبىرى تاياۋ شىعىس تەحنيكالىق ۋنيۆەرسيتەتىنە تابىستايتىنىن مالىمدەدى.

جاڭا رەزيدەنسياسى توڭىرەگىندەگى تالاس- تارتىس رەسمي ساپارمەن تۇرىكمەنستاندا جۇرگەن تايىپ ەردوعانعا دا جەتتى. تۇركيا پرەزيدەنتى: «11-12  جىلدان بەرى شەتەلدىك مەيمانداردى قارسى الۋ سالتاناتتى شاراسى بىرنەشە كوشەلەردى جاۋىپ، داڭعىلدىڭ بويىندا وتكىزىلىپ كەلدى. ال قازىر بولسا، زاماناۋي رەزيدەنسياعا قاجەتتىلىك تۋىنداپ وتىر»، - دەدى. سونداي- اق ول وزىنە تانىلعان ىسىراپشىلدىق جونىندە پرەمەر- مينيستر قىزمەتى تۇسىندا ۇكىمەتتىڭ بەرگەن ۇيىندە ەمەس، كەچيورەندە پاتەر جالداپ، حالىقتىڭ قازىناسىن بارىنشا ۇنەمدەگەنىن جەتكىزدى.

 اۆتورى: ەرجان ءجۇنىس

«حابار» ارناسى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى