باتىس قازاقستاندا جۇمىسشىلار ەرەۋىلگە شىقتى- كەسكىن
ەرەۋىلگە شىعۋشىلاردىڭ تەك ءبىر تالابى بار: جالاقىنى ءوسىرۋ. «بىزگە رازرياد بويىنشا جالاقى ەسەپتەيدى، بەرەتىن سىياقىلارى دا از. ءبىز باسشىلىقتى مۇندا جالاقىمىز نەگە ءارتۇرلى ەكەنىن ءتۇسىندىرۋ ءۇشىن شاقىرىپ وتىرمىز. جالاقىمىز 45 پەن 75 مىڭ تەڭگە ارالىعىندا. بۇل وتە از اقشا. بىزگە جەتپەيدى. سوندىقتان ءبىز باس قوستىق. ءبارىمىز دە وتباسىمىزدى جەتكىلىكتى دەڭگەيدە اسىراپ، باققىمىز كەلەدى»، - دەيدى مامان باعدات بيسەنوۆ.
«مۇندا ءبارى رازريادقا بولىنەدى، 3,4,5 دەگەن رازريادتار بار. ءبىز 3-4-رازريادتاعىلاردى بەسكە كوتەرسە دەيمىز، سوندا 100 مىڭ تەڭگە جالاقى الار ەدىك. ەكى-ءۇش اي بۇرىن جالاقىمىزعا ۇستەماقى قوسۋعا ۋادە بەرىلگەن، ءبىز ونى ءالى كۇتىپ ءجۇرمىز. باسشىلىق كەلسىن دە وسى ماسەلەنى شەشىپ بەرسىن. ديرەكتور كەلدى، ءبىراق ول ەشقايسىمىزدىڭ جالاقىمىزدى كوتەرمەيتىنىن جانە دە بۇل جەر ۇناماسا جۇمىستان كەتە بەرىڭدەر دەگەندى ايتتى. ۋچاسكە باستىعى دا وسىنى مەڭزەدى. دەنساۋلىققا كەلىپ جاتقان زيان ءۇشىن بىزگە ەشكىم پۇل تولەمەيدى، ال بۇل ارادا ءۇش الاۋ لاۋلاپ تۇر، ءبىز كۇنى-ءتۇنى گازبەن تىنىستايمىز»، - دەيدى ارماتۋرا ۇستاسى الپامىس ورىنبەكوۆ.
جۇمىسشىلاردىڭ ايتۋىنشا، جالاقى بويىنشا ولارمەن كەلىسسوز ءادىل جاسالماعان. كەيبىرەۋى، ءتىپتى ول كەلىسىم-شارتقا قول قويماعان دا ەكەن، ال تاعى بىرەۋلەرى اق قاعازعا قول قويعانىن ايتادى. «مىنە، بىزدە ءۇندىس جۇمىسشىلار بار، ولاردان جالاقىڭ قانشا دەپ سۇرادىق. ولار 1 ميلليون 200 مىڭ تەڭگە دەيدى، ال بىزگە بولسا تيىن-تەبەن تولەنەدى»، - دەيدى ءبىر ەرەۋىلشى.
ەرەۋىلدەۋشىلەرگە زەلەنوۆ اۋدانى اكىمىنىڭ ورىنباسارلارى اسلان دوسجانوۆ پەن امانكەلدى توعىزبايەۆ، سونىمەن قاتار وسى اۋداننىڭ پروكۋرورى زاكاريا ساراليەۆ كەلدى. ولار جۇمىسشىلارعا ءوز تالاپتارىن قاعازعا تۇسىرۋگە كەڭەس بەردى. ءوز كەزەگىندە ولار بۇل ماسەلەنىڭ شەشىمىن قاراستىرۋعا ۋادە ەتتى.
شەندىلەر مەن جۇمىسشىلار كەزدەسۋىنەن سوڭ «قازقۇرىلىس سەرۆيستىڭ» ورالداعى فيليالىنىڭ ديرەكتورى راحمەتوللا الدامۇراتوۆ ۆاحتامەن جۇمىس ىستەيتىندەردىڭ جالاقىسىن ەشكىم وسىرمەيدى دەپ مالىمدەدى. «ءبىراق ولار وزدەرى قول قويعان كەلىسىم-شارتتا كورسەتىلگەن جالاقىلارىن الاتىن بولادى»، - دەيدى جاعدايدى تۇسىندىرگەن ديرەكتور. الدامۇراتوۆ ەرەۋىلگە شىققانداردى جۇمىستان قۋمايتىندىعىن دا ايتتى.
دەگەنمەن «موي گورود» باسىلىمىنىڭ تىلشىلەرى جۇمىسشىلار جالاقىسى وسپەيىنشە نارازىلىق اكسياسىن جالعاستىرا بەرۋگە نيەتتى ەكەنىن باسا ايتادى.
«ۋرالسكايا نەدەليا» باسىلىمى جۇمىسشىلاردىڭ بۇل باس كوتەرۋى پروكۋرورلارعا «قازقۇرىلىس سەرۆيس» كومپانياسىن تەكسەرۋگە نەگىز بەرگەن دەپ جازادى. كومپانيانى تەكسەرۋدى زەلەنوۆ اۋدانىنىڭ پروكۋراتۋراسى تالاپ ەتكەن.
