قازاقستاندىق سپورتشىلار تۇرىكتىڭ ۇلتتىق ويىنىن ۇيرەنبەك
انتاليا قالاسىندا جيريت ويىنىنان تۇركيا رەسپۋبليكاسىنىڭ اشىق چەمپيوناتى اياقتالدى. قازاقستاندىق دەلەگاتسيا ويىن بارىسىن تولىق تاماشالاپ، ماراپاتتاۋ راسىمىنە قاتىستى. تۇركيا بويىنشا جيريتپەن شۇعىلداناتىن 78 كوماندادان ىرىكتەلىپ شىققان 4 كوماندا اقتىق سىنعا ءتۇستى. جەڭىستى ەرزرۋم قالاسىنىڭ كومانداسى ەنشىلەدى.
ايتا كەتەيىك، جيريت كوماندالىق ويىن. قىسقاشا ەرەجەسى - كوماندا مۇشەسى قارسى جاقتىڭ الاڭىنا اتپەن شاۋىپ بارىپ سىزىلعان شەڭبەردىڭ ورتاسىنا قاراي نايزاسىن لاقتىرىپ جىبەرەدى، سوسىن بىردەن كەرى قاشىپ ارنايى سىزىققا جەتكەنشە قۋعىنشىنىڭ وزىنە لاقتىرعان نايزاسىن دارىتپاي كەتۋى كەرەك. وسىلاي كەزەكتەسەدى. بۇل ات سپورتى ويىنىن تۇرىكتەر ورتا عاسىردان بەرى ويناپ كەلەدى. XVI عاسىردا بۇل ويىن اسكەري جاتتىعۋ رەتىندە جۇرەتىن.
ال ⅩⅨعاسىردا وسمان يمپەرياسىنىڭ سارايىندا تاماشالاناتىن ەڭ تاڭدامالى ويىن بولدى. ول وتە قاۋىپتى، جىگىتتەن مەرگەندىك پەن ەپتىلىك، شەبەرلىك پەن اتبەگىلىك سەكىلدى كوپ قاسيەتتى تالاپ ەتەتىن ويىن. ءبىر كەزدەرى سۇلتان IIماحمۇت جيريتكە تىيىم سالعانىمەن، ۇلتتىق ويىن ۇزاماي قايتا جاڭعىرىپ، ەل ىشىندە كەڭىنەن تارادى.
تۇركيا رەسپۋبليكاسى ۇلتتىق سپورت ويىندارى قاۋىمداستىعىنىڭ باسشىسى ارىپاسلان دجەيلان ارنايى شاقىرتۋ جىبەرىپ، قازاقستاندىق ارىپتەستەرىنىڭ تۇرىكتىڭ ۇلتتىق ويىنىن ءوز كوزدەرىمەن كورۋىن قالاپتى.
بۇگىندە تۇركى حالىقتارىنىڭ ۇلتتىق ويىندارى جاپپاي دامىپ كەلەدى، ءبىراق قاي سپورت ءتۇرى بولسا دا، ءبىر ەلدىڭ كولەمىندە شەكتەلسە، تانىمالدىعى ارتپايدى، جانكۇيەرلەرى بولمايدى. تۇرىك اعايىندار بايگە، كوكپار، اۋدارىسپاق ويىندارى سەكىلدى جيريت ويىنى دا حالىقارالىق دەڭگەيدە وتكەنىن قالايدى. سوندىقتان قازاقستانعا ارنايى باپكەرلەردى جىبەرىپ، جيريت ويىنى كوماندالارىن قۇرىپ، ويىن ءتاسىلىن ۇيرەتپەككە كەلىسىم جاسالدى.
تۇركيا تاراپى قازاقستاندىق ارىپتەستەرىنىڭ ۇلتتىق سپورتتى دامىتۋ، ناسيحاتتاۋدا تاجىريبەسى مول دەپ سانايدى جانە بىرلەسىپ اۋقىمدى شارالاردى جۇزەگە اسىرا الاتىندارىنا سەنىمدى. سونداي شارانىڭ ءبىرى - كەلەسى جىلى تۇركيادا وتەتىن كوكپاردان ازيا چەمپيوناتىن وتكىزۋ بارىسى تۋرالى ارنايى كەلىسسوز جۇرگىزىلىپ، ءبىراز ماسەلەنىڭ ءتۇيىنى تارقاتىلدى.
