ءبىرىنشى ليگا كوماندالارى اراسىندا ەل چەمپيوناتى مارەگە جەتتى

ءبىر تۋر بۇرىن پرەمەر-ليگا جولداماسىن جەڭىپ العان كوكشەتاۋدىڭ «وقجەتپەسى» ءوز الاڭىندا جۇلدەلى ورىننان ۇمىتكەر كوماندانىڭ ءبىرى - اقتاۋدىڭ «كاسپيىن» ءىرى ەسەپپەن (4:1) ۇتىپ، ۇپاي سانىن 64 كە جەتكىزىپ، بىرىنشىلىككە نۇكتە قويدى.

ال ەلوردادا «استانا-1964» كومانداسىنان 3:1 ەسەبىمەن باسىم تۇسكەن شىمكەنتتىڭ «قىرانى» چەمپيونات قورىتىندىسىندا 60 ۇپايمەن ەكىنشى ورىنعا كوتەرىلدى. ەندى ول پرەمەر-ليگادا 11- ورىن العان كوماندامەن جوعارى توپقا ءوتۋ ءۇشىن كۇش سىناسادى.

ءۇش كوماندا - «استانا-1964»، «كاسپي» جانە ورالدىڭ «اقجايىعى» بىردەي ۇپاي (55) جيناعانىمەن، جەڭىسى از، تەڭ ويىنى كوپ باتىس قازاقستاندىقتار بەسىنشى ورىندا قالىپ قويدى.

ورالدىقتار سوڭعى تۋردا تالدىقورعاندا جەرگىلىكتى «جەتىسۋ-سۇڭقار» كومانداسىن 1:0 ەسەبىمەن (گول سوققان الەكسەي مالتسيەۆ) تىزە بۇكتىردى.

ەگەر «اقجايىق» ءبىرىنشى اينالىمدا ءوز الاڭىندا استانانىڭ «بايتەرەگى» مەن كەيىن چەمپيوناتتان ءبىرجولا شىعىپ قالعان «گەفەستەن» جەڭىلىپ قالماعاندا، ەكىنشى ورىن ءۇشىن تالاساتىن ەدى. جالپى، ورالدىقتار العاشقى ءۇش ورىندى يەلەنگەن كوماندالارمەن جامان ويناعان جوق، تەك ءوز الاڭىندا «استانا-1964» كە ەسە جىبەردى.

ەسەسىنە جاڭاعىداي وسالداۋ كلۋبتارمەن ويىنداردا ويدا جوق جەردەن ۇپاي جوعالتتى. ەندى «اقجايىق» پرەمەر-ليگاعا قايتا ورالۋ ءۇشىن كەلەسى جىلعا ءۇمىت ارتاتىن بولادى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى