قازاقستاندىق ستۋدەنتتەر كانادانىڭ الدىڭعى قاتارلى ۋنيۆەرسيتەتتەرىندە ءبىلىم الادى

الەمنىڭ الدىڭعى قاتارلى جوعارى وقۋ ورىندارىندا مىڭداعان ەل ازاماتتارى ءبىلىم الىپ ءجۇر.

ال كانادالىق رەيتينگ بويىنشا ەڭ ۇزدىك جانە الەمدە بەسىنشى قاتاردا تۇرعان تورونتو ۋنيۆەرسيتەتىندە قازاقستاننىڭ جۇزدەگەن ازاماتى وقيدى.

ولاردىڭ اراسىندا «بولاشاق» ستەپيندياتتارى مەن ءوز قالتاسىنان تولەپ وقىپ جۇرگەندەر دە بار. دەگەنمەن ولاردىڭ العا قويعان ماقساتتارى ءبىرى -  ول قازاقستانعا ورالىپ، ءوز ەلىنە ەڭبەك ەتۋ. بۇگىندە كانادانىڭ تورونتو ۋنيۆەرسيتەتىندە جۇزگە جۋىق قازاقستاندىق ستۋدەنت ءبىلىم الىپ جاتىر.

بۇل جوعارى وقۋ ورنىنىڭ ديپلومىن الۋ - ءار ستۋدەنتتىڭ ارمانى. وسىدان التى جىل بۇرىن قازاقستاندىق ستۋدەنتتەر قاۋىمداستىعى اشىلعان. جىل سايىن كاناداعا ءبىلىم الۋعا كەلگەن ازاماتتاردى قولداۋ ءبىزدىڭ باستى باعىتىمىز دەيدى قاۋىمداستىق پرەزيدەنتى.

ايدانا  قىزىلوۆا، قازاقستان ستۋدەنتتەرى قاۋىمداستىعىنىڭ پرەزيدەنتى:

- بىزدە فەيسبۋك توبى اشىلعان، بۇل توپقا كەز كەلگەن ازامات كىرىپ، قىزىقتىرعان سۇراقتارىندا قويا الادى. كوبىنەسە كانادادا ءبىلىم الۋعا بەت العان ستۋدەنتتەرمەن وسى جۇيە ارقىلى سۇحباتتاسامىز. ستۋدەنتتىڭ كەلەتىن ۋاقىتىن، قايدا ورنالاساتىنىن سۇراپ ءبىلىپ، قارسى الامىز. ءبىزدىڭ ۇيىمنىڭ ماماندارى ءارقاشان كومەك كورسەتۋگە دايىن.

زەينوللا ازات، تورونتو ۋنيۆەرسيتەتىنىڭ ستۋدەنتى:

- ءبىز ءبىر وتباسىنىڭ بالالارىنداي وتە تاتۋمىز. قازاقستاننان كەلگەن ءار ستۋدەنت ءوزىن باسقا ەلدە ءجۇرمىن دەپ الاڭداماۋى ءۇشىن قولىمىزدان كەلگەن كومەكتى ايامايمىز. ءتىپتى كەي كەزدە قارجىلىق ماسەلەلەرى بولىپ جاتسا دا، شەشۋگە تىرىسامىز. كانادانىڭ كليماتى قازاقستانعا وتە ۇقساس. وتاندىق ستۋدەنتتەرىمىز وزگە ەلدە تاتۋ-ءتاتتى جانە بىرلىكتە ءومىر سۇرۋگە تىرىسادى. ناۋرىز، تاۋەلسىزدىك كۇنى مەرەكەلەرىندە ۇيىمشىلدىق تانىتىپ، ءتۇرلى قايىرىمدىلىق شارالارىن ۇيىمداستىرادى.

ايدانا  قىزىلوۆا، قازاقستاندىق ستۋدەنتتەر قاۋىمداستىعىنىڭ پرەزيدەنتى:

- بيىل ءبىزدىڭ قاۋىمداستىقتىڭ مۇشەسى ايگەرىم قۇسايىنوۆا قازاقستانداعى ناۋقاس، اق قان اۋرۋىنا شالدىققان قىزدى تاۋىپ، وعان كومەكتەسۋ جولدارىن بىرگە قاراستىردىق. ءبارىمىز جينالىپ، باۋىرساق، شەلپەك، توقاشتار ءپىسىرىپ ۋنيۆەرسيتەتكە اپارىپ ساتتىق. ساتىلىمنان تۇسكەن اقشانى ناۋقاس قىزعا اۋداردىق. كاناداداعى ستۋدەنتتەردىڭ العا قويعان ماقساتتارى دا ءبىر. ول -  جوعارى وقۋ ورنىن ۇزدىك ءبىتىرىپ، تۋعان جەرگە ورالۋ.

زەينوللا ازات، تورونتو ۋنيۆەرسيتەتىنىڭ ستۋدەنتى:

- كانادادا كورىپ، بىلگەنىمدى، جيناعان تاجىريبەمدى قازاقستانعا كەلىپ جۇزەگە اسىرسام دەگەن ويدامىن. ارمانىم -  ەلگە قىزمەت ەتۋ.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى