ەۋروپالىق مۋزىكانتتاردى مويىنداتقان قازاق قىزى

وتانداسىمىز، مۋزىكانت كاميلا بيسەنعاليەۆانى انگليانىڭ اتاقتى سيمفونيالىق وركەسترى شاقىردى. كاميلا ۇلكەن ونەرلى وتباسىنان شىققان.

اتا-اناسى مۋزىكانت بولماعانىمەن، اۋلەتتە ورىنداۋشىلار بار. سولاردىڭ ءبىرى -  اتاقتى سكريپكاشى مارات بيسەنعاليەۆ. كاميلانى شاقىرعان بۇل ۇجىم انگليادا اتاعى شىققان وركەستر سانالادى. وپەرالىق قويىلىمدارى مەن مۋزىكالىق سپەكتاكلدەرى تالايدى تاڭداي قاقتىرعان. وركەستر گاسترولدەرگە كوپ شىعادى. بىرنەشە حالىقارالىق جۇلدەلەردىڭ يەسى. اتاقتى كلاسيكالىق اۋەندەردى ورىندايدى.

ۇجىم قۇرامى كوپۇلتتى، الايدا قازاقستاندىق مۋزىكانت جالعىز. كاميلا -  الماتى قالاسىنىڭ تۋماسى. قولىنا سەرىك ەتكەن اسپابى گوبوي دەپ اتالادى. وركەستر قۇرامىنداعى ساناۋلى بۇل اسپاپتىڭ الار ورنى ەرەكشە.

كاميلا بيسەنعاليەۆا، مۋزىكانت:

- ارينە، وڭاي بولمادى. ءتۇرلى سىناقتاردان ءوتتىم. وتە جاقسى دايىندالۋعا تۋرا كەلدى. بىزدە مەكتەپ تاجىريبەلى. قازاقستاندىق مۋزىكانتتاردىڭ كوبى لوندوندا، گەرمانيادا، شۆەيتساريادا قىزمەت ەتىپ ءجۇر.

كاميلا وتاندىق وقۋ ءادىسىن قولدايتىنىن جاسىرمايدى. ويتكەنى وندا وقىتۋشى مەن وقۋشى اراسىنداعى قارىم-قاتىناس باستى نازاردا. مۋزىكانتقا شابىت بەرەتىن دە تۋعان جەردەگى اعايىن مەن دوس-جاران. كاميلا قازاقستاندا دا جيە ونەر كورسەتەدى جانە ونەرگە دەگەن مەملەكەتتىڭ قولداۋىن جوعارى باعالايتىنىن ايتادى.

ريچارد فەرنس، Opera North مۋزىكالىق جەتەكشىسى:

- ۇلتتىق ونەردى دامىتۋدا قازاقستاندا قىرۋار شارۋا اتقارىلىپ جاتقانى ماعان جاقسى تانىس. جاڭا وپەرا تەاترى اشىلعانىنان دا حاباردارمىز. سىزدەگى ونەرپازداردىڭ دەڭگەيى وتە جوعارى. كاميلا وسىعان دالەل بولا الادى.

مۋزىكانتپەن كەزدەسۋىمىز لوندوندا جۋىردا اشىلعان قازاقستان بەيبىتشىلىك جانە كەلىسىم سارايىندا ءوتتى. اتالعان ورتالىقتىڭ بىردەن ءبىر ماقساتى دا وتاندىق ونەرپازداردى قولداۋ بولىپ تابىلادى. بۇل جەردە ەكى ەلدىڭ مادەني سەرىكتەستىگىن بەكەمدەي تۇسەرىنە سەنىم بار. اۆتورلارى: مانشۇك ماقسۇت قىزى، بەلا قۇدايبەرگەنوۆا

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى