تاستاندى سابيلەرگە ارنالعان جاشىك ەلىمىزدە دە پايدا بولا ما؟
الەۋمەتتىك جەلىلەر تىپتەن شۋلادى.
ءبىراق ءتيىستى مەكەمەلەر مۇنداي قادامعا امالسىزدان بارادى، دەپ جازادى «استانا اقشامى» باسىلىمى.
جالپى، نارەستەلەرگە ارنالعان بەبي-بوكستەر چەحيا، جاپونيا، كانادا، شۆەتسيا سىندى ەلدەردە پايدا بولعالى قاشان. ونى 1198 - جىلى ريم پاپاسى يننوكەنتي Ⅲ ويلاپ تاپقان دەسەدى. سول زاماندا قيىندىق كورگەن انالار ومىراۋداعى نارەستەلەرىن تيبر وزەنىنە اعىزىپ جىبەرەدى ەكەن. سۋدىڭ اعىسى جاعالاۋعا لاقتىرىپ تاستاعان ءولى سابيلەردى كورگەن ريم پاپاسى قاتتى قايعىرىپ، حرامنىڭ قابىرعاسىنا وسىنداي جاشىكتەر ورناتقىزىپتى- مىس.
چەحيالىقتار 2005 - جىلدان باستاپ، تاستاندى سابيلەرگە ارنالعان جاشىكتەر ورناتقان. بۇگىندە چەحياداعى «ءتورتبۇرىشتى ۇيلەردىڭ» سانى 50 گە جەتىپتى. ال، گەرمانيا وسىنداي جۇزدەگەن جاشىك ورناتىپ ۇلگەرگەن. تاستاندى سابيلەر پروبلەماسىنان وڭتۇستىك كورەيا دا قۇرالاقان ەمەس. جىل سايىن سەۋل كوشەلەرىندە جۇزدەگەن نارەستە تاستالادى ەكەن.
«ەلىمىزدە نارەستەلەرگە ارنالعان جاشىكتەردى ورناتۋ الماتى قالاسىنان باستاۋ الماق. باستى ماقساتى - سابيلەردىڭ ءولىمىن ازايتۋ، اناسى باس تارتقان شاقالاقتاردىڭ ءومىرىن امان ساقتاپ قالۋ. بۇل جاشىكتەردى اق حالاتتىلار «ءومىر تەرەزەسى» دەپ تە اتاپ ءجۇر.
ونىڭ ىشىندەگى تەمپەراتۋرا 30 گرادۋس بولادى. سابيلەر جايلى توسەكپەن دە جابدىقتالاتىن بولادى. شاقالاق جاشىككە تاستالىسىمەن، ونىڭ ەسىگى 30 سەكۋندتەن كەيىن اۆتوماتتى تۇردە كىلتتەنىپ قالادى. سابيلەردىڭ قاۋىپسىزدىگى ءۇشىن سولاي ىستەلەدى. سودان كەيىن مەديتسينا قىزمەتكەرىنەن باسقا ەشكىم مۇندا كىرە المايدى. ارنايى ورناتىلعان دابىل سوعىلعان ساتتە اقحالاتتىلار تاستاندى ءسابيدى الىپ كەتەدى. ارى قاراي بالالار زاڭ بويىنشا مەملەكەت قامقورلىعىنا الىنادى. ءتىپتى، بالا اسىراعىسى كەلەتىن مەيىرىمدى وتباسىلارعا بەرىلۋى دە مۇمكىن. جاشىكتەردى ورناتۋدىڭ باستى ماقساتى دا - وسى»، دەلىنگەن ماقالادا.
«كەزىندە وسىنداي بەبي-بوكستارعا قاتىستى ب ۇ ۇ-نىڭ بالا قۇقىعى جونىندەگى كوميتەتى ءوز نارازىلىقتارىن بىلدىرگەنى بار. ولاردىڭ پىكىرىنشە، ارنايى جاشىكتەرگە بالالار جاسىرىن تۇردە تاستالاتىندىقتان، ءسابيدىڭ اتى-ءجونى، اتا-اناسى بەلگىسىز بولىپ قالادى. ال بالا ەسەيە كەلە، ءوزىنىڭ اتا-اناسىن بىلۋگە قۇقى بار. وسى تۇرعىدان كەلگەندە، جاشىكتەردى ورناتۋ - بالانىڭ قۇقىعىن شەكتەۋ دەگەن ءسوز»، دەپ جازادى ەلوردالىق باسىلىم.
