فۋتبول فيلوسوفياسىنا وزگەرىس اكەلگەن ارۋلار

ادەتتە، ەرلەر فۋتبولى دەسە ءبىز كوز الدىمىزعا ەر ازاماتتاردىڭ دوپ قۋالاپ جاتقانىن، تورەشىلىك جاساپ جۇرگەنىن كوز الدىمىزعا ەلەستەتەمىز.

دەسەك تە، بۇگىندە ەرلەردىڭ فۋتبولىنا ايەلدەردىڭ الاتىن ورنى زور بولىپ تۇر، دەپ جازادى «الاش ايناسى» ينتەرنەت-پورتالى.

بۇرىندارى ەرلەر فۋتبولىندا ايەل ادام ءجۇر دەگەندى ەستۋ ەرسى سەكىلدى ەدى. الايدا، قازىر بۇل دۇنيە ۇيرەنشىكتى جايت بولىپ قالعان سەكىلدى. ويتكەنى، قازىر «قارتامىس عالامنىڭ» بىرنەشە كلۋبتارىندا ايەل ادامدار جۇمىس ىستەپ جاتىر.

ونىڭ ءبىرى تورەشى بولسا، ەكىنشىسى كلۋبتىڭ باس دارىگەرى. ءتىپتى ەرلەردى جاتتىقتىراتىن ايەل دە بار، ودان بولەك بۇكىل كلۋبتى باسقارىپ وتىرعان نازىك جاندىلار دا تابىلادى.

ەرلەر فۋتبولىنا ءبىرىنشى بولىپ كەلىپ، مۇنداي دۇنيەگە كوزىمىزدى ۇيرەتكەن - ەۆا كارنەيرو شىعار. ول بۇگىندە لوندوننىڭ «چەلسي» كلۋبىنىڭ باس دارىگەرى. ارينە، باستاپقىدا ەۆانىڭ بۇل قىلىعىن جانكۇيەرلەردىڭ باسىم كوپشىلىگى ەرسى سانادى. ال، كەيىن وعان دا ۇيرەنىپ كەتتى. بۇگىنگى كۇنى ول جوزە موۋرينو جىگىتتەرىنىڭ دەنساۋلىعىن باقىلاپ، فۋتبولشىلاردىڭ ەم-دومىن جاساپ ءجۇر.

ەۆادان بولەك ەرلەر فۋتبولىندا باربارا بەرلۋسكونيدىڭ ەسىمى ءدۇيىم جۇرتقا جاقسى تانىس. اتاعى الىسقا كەتكەن ميلليونەر سيلۆيو بەرلۋسكوندىڭ كەنجە قىزى يتاليانىڭ «ميلان» ۇجىمىنىڭ باسشىلارى قاتارىندا.

دەگەنمەن، باربارا بەرلۋسكونيدىڭ الەمدەگى ەڭ تانىمال كلۋبتىڭ تىزگىنىن ۇستاپ وتىر دەگەندە تاڭ قالۋدىڭ قاجەتى جوق. مۇنداي جاعداي بۇعان دەيىن دە بولعان. الىسقا بارماي، سولتۇستىكتەگى كورشىمىز - رەسەي فۋتبولىن الىپ قارايىق. رەسەي بىرىنشىلىگىندە ونەر كورسەتەتىن ماسكەۋدىڭ «لوكوموتيۆىن» بىرنەشە جىلدان بەرى ولگا سمودورسكايا باسقارىپ كەلەدى. باستاپقىدا ولگا يۋريەۆنانىڭ بۇل ورىنعا تاعايىندالۋىنا جۇرتشىلىق نارازىلىق بىلدىرسە، ءقازىر بۇل باسشىنىڭ جۇمىسىنا بارلىعى دا ءدان ريزا. ودان بولەك مارگاريتا لۋي-درەيفۋستى دا ايتۋعا بولادى. ەۋروپاداعى ەڭ اۋقاتتى ايەلدەر قاتارىنا قوسىلاتىن مارگاريتا «مارسەل» كلۋبىنىڭ قوجايىنى.

ەستىمەگەن ەلدە كوپ دەگەندەي، بۇگىندە عالامتوردى ىزدەپ قاراساڭىز ەرلەر كلۋبىن جاتتىقتىراتىن ايەل مامانداردى دا تابا الاسىز. مىسالى كورين دياكر. ول فرانسيانىڭ ەكىنشى ديۆيزيونىندا وينايتىن «كلەرمون» كلۋبىنىڭ جاتتىقتىرۋشىسى.

ەرلەر فۋتبولىنا ارالاسىپ، بۇگىندە ءوزىنىڭ سۇلۋلىعىمەن، بىلىمىمەن كوپشىلىكتى تاڭقالدىرىپ جۇرگەن ازاماتشالار از ەمەس. ماسەلەن، سارا كاربونەرو (فۋتبول جۋرناليسى)، بيبيانا شتاينحاۋس (ەرلەر فۋتبولىنىڭ تورەشىسى)، كارين ازار (اعايىنلى ازارلاردىڭ اگەنتى) سىندى ارۋلار بۇگىندە ەرلەر فۋتبولىنىڭ قىزىعىن كىرگىزىپ جۇرگەن جايتتارى بار.

اۆتور: ءۋاليحان قوسانباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى