ەلدى الاڭداتقان ماسەلەلەر انىقتالدى
ءوز كەزەگىندە دەپۋتاتتار سايلاۋشىلارعا پارتيانىڭ سايلاۋالدى تۇعىرناماسىن، ۇدەمەلى يندۋستريالدى-يننوۆاتسيالىق دامۋ جونىندەگى مەملەكەتتىك باعدارلاماسىنىڭ ىسكە اسىرىلۋ بارىسى جانە ءبىرىڭعاي جيناقتاۋشى زەينەتاقى قورىنىڭ جۇمىسى، شاعىن جانە ورتا بيزنەستى قولداۋ ماسەلەلەرى جونىندە كەڭىنەن ءتۇسىندىرۋ جۇمىستارىن جۇرگىزدى.
كوشپەلى جۇمىس شەڭبەرىندە فراكسيا مۇشەلەرى 409 ەلدى مەكەندە بولىپ، 66 مىڭنان استام اداممەن جۇزدەستى. شىلدە-تامىز ارالىعىندا 874 كەزدەسۋ وتكىزدى. كەزدەسۋگە مەملەكەتتىك قىزمەتكەرلەر، بيۋدجەتتىك سالا وكىلدەرى، كاسىپورىن جۇمىسشىلارى، شاعىن جانە ورتا بيزنەس وكىلدەرى، ۇكىمەتتىك ەمەس ۇيىمدار مەن زەينەتكەرلەر قاتىستى.
كەيبىر كەزدەسۋلەردى دەپۋتاتتار «نۇر وتان» پارتياسىنان سايلانعان وبلىستىق، اۋداندىق جانە قالالىق ءماسليحات دەپۋتاتتارىمەن بىرلەسە وتىرىپ وتكىزدى. فراكسيا مۇشەلەرى پارتيانىڭ ايماقتىق قوعامدىق قابىلداۋ بولمەسىندە جەرگىلىكتى ازاماتتاردى قابىلداپ، تالاپ-وتىنىشتەرىنە قۇلاق ءتۇردى.
شامامەن 845 ازاماتتىڭ ءوتىنىشى قارالىپ، سونىڭ 302- شەشىمىن تاپتى. ءبىرقاتار ماسەلەلەردى دەپۋتاتتار باقىلاۋعا الدى. جەرگىلىكتى جۇرتشىلىقتىڭ كوڭىلىن كۇپتى ەتكەن ماسەلەلەردىڭ قاتارىندا زەينەتاقىمەن قامتاماسىز ەتۋ، جۇمىسقا ورنالاستىرۋ، تۇرعىن ءۇي، كوممۋنالدىق سالا، دەنساۋلىق پەن ءبىلىم بەرۋ ماسەلەسى بار.
دەپۋتاتتاردىڭ وڭىرلەردەگى اقپاراتتىق-ناسيحاتتىق جۇمىسى، كەزدەسۋلەر ناتيجەلەرى باق نازارىنان تىس قالعان جوق. بارلىق تەلە-راديو ارنالارىندا، ەلەكتروندى اقپارات قۇرالدارىندا سيۋجەتتەر شىقتى، باسپا سوزدە 395 ماقالا جارىق كوردى.
دەپۋتاتتاردىڭ كوشپەلى جۇمىسى 16 ءوڭىردى، ياعني 14 وبلىس پەن ەلوردانى جانە ءبىر رەسپۋبليكالىق ماڭىزى بار قالانى قامتىدى.
تاعى ءبىر ايتا كەتەرلىك جايت، ءساۋىر جانە مامىر ايلارى ارالىعىندا دەپۋتاتتاردىڭ وڭىرلەردى ارالاعانى بەلگىلى. سول ساپار اياسىندا كوتەرىلگەن ماسەلەلەردىڭ ءبىر پاراسى شەشىمىن تاپقانىن ايتا كەتۋىمىز كەرەك.
اتاپ ايتار بولساق، شىعىس قازاقستان وبلىسىندا سانيتارلىق-قورعاۋ ايماعىنان جانە گاۆان كەنتىندەگى اپاتتىق تۇرعىن ۇيلەردەن تۇرعىنداردى كوشىرۋ ماسەلەسى وڭتايلى شەشىمىن تاپتى. اقمولا وبلىسىنا قاراستى اتباسار قالاسىنداعى اينالما كانالدىڭ قۇرىلىسىنا قاتىستى زەرتتەۋ جۇمىستارى جۇرگىزىلۋدە. «E-learning» ەلەكتروندى وقىتۋ جۇيەسى» جوباسى قارجىلاندىرىلمايتىن بولدى. سونىمەن بىرگە استانا قالاسى ماڭىنا جۇرگىزىلەتىن اۆتوبۋستار سانى كوبەيدى.
تۇرعىن ءۇي، جۇمىسپەن قامتاماسىز ەتۋ، الەۋمەتتىك ماسەلەلەردى شەشۋ، بالاباقشا، شاعىن جانە ورتا بيزنەستى قولداۋ، اۋىلداردى گازداندىرۋ، جول قۇرىلىسى مەن جوندەۋ جۇمىستارى، سۋ قۇبىرلارىن رەتتەۋ، تاريفتەردى قۇرۋعا قاتىستى وزەكتى ماسەلەلەر وزگەرىسسىز قالىپ وتىر. سونداي-اق زاڭنامانى جەتىلدىرۋ بويىنشا ۇسىنىستار سانى 4,6 دان 13,3 پايىزعا وسكەن. كاسىپكەرلىكتى ەكونوميكالىق ىنتالاندىرۋ، ارنايى ەكونوميكالىق ايماقتار مەن كەدەندىك وداقتىڭ قىزمەتى ماسەلەلەرىنە قاتىستى قازاقستان رەسپۋبليكاسىنىڭ زاڭنامالارىنا ەنگىزۋگە ۇسىنىلعان وزگەرىستەر مەن تولىقتىرۋلار كەڭەيتىلدى. وڭىرلەردە «ارداگەرلەر تۋرالى» قازاقستان رەسپۋبليكاسىنىڭ زاڭىن قابىلداۋ جانە «مەملەكەتتىك ساتىپ الۋلار تۋرالى» قازاقستان رەسپۋبليكاسىنىڭ زاڭىن ودان ءارى جەتىلدىرۋ ماسەلەسى دە ءجيى ءسوز بولادى.
سپورتتى دامىتۋ، مۇراجايلار مەن تەاترلار سانىن كوبەيتۋ ماسەلەلەرى دە ءاردايىم وزەكتى. ساپار باراسىندا 239 پروبلەمالىق ماسەلەلەر انىقتالسا، ونىڭ 39,7 پايىزى الەۋمەتتىك سالاعا تيەسىلى. ياعني زەينەتاقىمەن قامتاماسىز ەتۋ، حالىقتى جۇمىسپەن قامتۋ، دەنساۋلىق ساقتاۋ، ءبىلىم، جاستار ساياساتى مەن مادەنيەت ماسەلەلەرى بار.
جەرگىلىكتى جۇرتشىلىقتى الاڭداتاتىن ماسەلەلەردىڭ ءبىرى ەكونوميكا ەكەنى بەلگىلى. ولاردىڭ دەنى اۋىل شارۋاشىلىعى مەن اۋىلدى قولداۋعا تىكەلەي قاتىستى. سونىمەن بىرگە وزەكتى جايتتاردىڭ قاتارىندا تۇرعىن ءۇي قاتىناستارى مەن جاڭارۋ ماسەلەلەرى دە (%4,8) بار. قۇقىقتىق ءتارتىپتى قورعاۋ مەن قوعامدىق قاۋىپسىزدىك جاعدايى (%3,4) دا ەلدى ءجيى مازالايدى. تالداۋ كورسەتىلىپ وتىرعانىنداي، حالىق ەكولوگيالىق قاۋىپسىزدىك سالاسىنداعى پروبلەمالاردى 3,7 پايىزعا كوتەردى.
ءوڭىر جۇرتشىلىعى انىقتالعان ماسەلەلەردى شەشۋ ءۇشىن زاڭنامالىق سيپاتتاعى شارالاردى قولدانۋ قاجەتتىگىن ايتادى. وسى سەبەپتى دە، قولدانىستاعى زاڭنامانى جەتىلدىرۋگە (%13,3) بايلانىستى ۇسىنىستاردى ءتيىستى زاڭ جوباسىمەن جۇمىس ىستەۋ كەزىندە «نۇر وتان» پارتياسىنىڭ فراكسياسى باستى نازارعا الۋى ءتيىس.
پارتيالىق سايلاۋالدى تۇعىرنامانىڭ ورىندالۋىن كۇشەيتۋ ماقساتىندا «نۇر وتان» پارتياسىنىڭ سايتىندا ءار ايماقتىڭ كورسەتكىشتەرى بويىنشا الەۋمەتتىك- ەكونوميكالىق احۋال كارتاسىنىڭ ينفوگرافيكاسى ورنالاستىرىلدى. اتالمىش تالدامالىق شولۋ ءماجىلىس دەپۋتاتتارى - «نۇر وتان» فراكسياسى مۇشەلەرىنىڭ ساپارلارى ناتيجەسىندە ازىرلەندى.
اينا حاسان
«ايقىن»
