الەم قازاقتىڭ ۇلتتىق زياتكەرلىك ويىنىنا قۇمارتىپ وتىر
قازاقتىڭ ۇلتتىق زياتكەرلىك ويىنى الەمدىك پورتالداردا تانىمالدىعى جاعىنان العا شىعىپ، ينتەرنەت ارقىلى جۇزدەن استام ەلدە وينالۋدا.
بۇل تۋرالى جاقىندا قىتايدان قازاقتىڭ جاڭا زياتكەرلىك ويىنىمەن تانىسىپ قايتقان دۇنيەجۇزىلىك توعىزقۇمالاق قاۋىمداستىعىنىڭ باس حاتشىسى، توعىزقۇمالاقتان ق ر ەڭبەك سىڭىرگەن جاتتىقتىرۋشىسى ماقسات شوتايەۆ ايتتى، دەپ جازادى «ايقىن» گازەتى.
ونىڭ ايتۋىنشا، قازىرگى كەزدە توعىزقۇمالاققا تەك قىتايدا عانا ەمەس، دۇنيەجۇزىندە دە قىزىعۋشىلىق ارتىپ وتىر. ۇلتتىق ويىننىڭ زياتكەرلىك قاسيەتتەرى رۋحاني مۇرامىزدىڭ تانىمالدىلىعىن ارتتىرۋدا. سونداي-اق توعىزقۇمالاقتىڭ جەكە تۇلعانىڭ وزىق قاسيەتتەرىن قالىپتاستىرۋداعى ورنى ەرەكشە. سوندىقتان بولار، ينتەرنەت كەڭىستىگىندەگى iggamecenter.com سايتىندا توعىزقۇمالاق تانىمال 145 ويىننىڭ اراسىندا ءبىرىنشى ورىندا تۇر.
ال قىتايداعى سەمينار ءۇرىمجى جانە التاي قالاسىندا ءوتىپ، وعان شىنجاڭ قازاق مادەنيەت قوعامى باسشىلىق جاسادى.
«جالپى، توعىزقۇمالاقتى مەكتەپ باعدارلاماسىنا ەنگىزۋ ماسەلەسى تەك قىتايدا عانا ەمەس، موڭعوليا، رەسەي، قىرعىزستاندا دا كوتەرىلۋدە. ءتىپتى تۇركيادا دا ءبىرقاتار تۇرىك جاناشىرلارى ۇلتتىق ويىندى مەكتەپ باعدارلاماسىنا ەنگىزۋدىڭ جوباسىن جاساۋدا. سونداي-اق زياتكەرلىك مۇرامىزدى ەۋروپادا دامىتىپ وتىرعان بىردەن-ءبىر مەملەكەت - چەحيادا مەكتەپ وقۋشىلارىنىڭ اراسىندا جارىستار وتكىزىلۋدە.
بيىلعى جىلى ۇلتتىق ويىندار بويىنشا بىشكەكتە I «ۇلى دالا ويىندارى» وتكىزىلدى. بۇل باسەكە كەزىندە ونعا جۋىق ۇلتتىق سپورت ويىندارى، ونىڭ ىشىندە جەكپە-جەك، اسىق، توعىزقۇمالاق، كۇرەس، كوكپار، قىز قۋۋ، بايگە جانە تاعى باسقا ويىنداردان سايىستار ءوتتى. ياعني ءبىز ۇلتتىق ويىندار وليمپياداسىن وتكىزىپ ۇلگەردىك. ەندىگى مەجەمىز - الەمدىك وليمپيادالارعا ۇلتتىق ويىندارىمىزدى ەنگىزۋ»، - دەيدى م. شوتايەۆ.
