قازاقستاندىق جاس اكتريسا قىرعىزستاندىق رەجيسسەردىڭ فيلمىنە ءتۇستى

جاستار كومەدياسىن قىرعىزستاندا ەڭ كوپ پايدا تاپقان "سالام، نيۋ- يورك" فيلمىنىڭ رەجيسسەرى رۋسلان اكۋن ءتۇسىردى.

ايتا كەتەيىك، "مەنىڭ قۇربىمنىڭ قاھارمانى" ("گەروي موەي ديەۆۋشكي") لەنتاسىندا ءاليا تەلەباريسوۆا باس كەيىپكەردىڭ سۇيىكتىسىن وينادى. "ەكى ادام" تانىمال جوباسىنىڭ اكتەرى جەڭىش مەيرامبەكوۆ ونىڭ فيلمدەگى سەرىگى بولدى.

كينو پروكاتقا 27 - قاراشادا شىعادى. فيلم ازىرشە قىرعىزستان كينوتەاترلارىنان كورسەتىلمەك.

فيلمدە تىلەك ەسىمدى ستۋدەنتتىڭ وقيعاسى باياندالادى. ول ۋنيۆەرسيتەتتىڭ ەڭ ادەمى قىزى - قانىكەيگە عاشىق بولادى. قازاقستاندىق اكتريسا سومدايتىن قانىكەيدىڭ وعان ەش سەزىمى جوق. جىگىت ءوزىنىڭ ادالدىعىن كورسەتىپ، ونىڭ جۇرەگىن جاۋلاعىسى كەلەدى. ءبىراق وعان راسۋل ەسىمدى ءمىنسىز جىگىت قارسىلاس بولىپ، جاعدايىن قيىنداتا تۇسەدى.

"بۇل بىرەۋدىڭ ارمانىن قۋۋدىڭ قاجەتى جوق ەكەنىن، باسقا بىرەۋ بولىپ كورىنبەۋ كەرەكتىگىن ايتاتىن ىزگى ءارى جەڭىل فيلم بولادى. ماقساتىڭا جەتۋ ءۇشىن وڭاي جولدى تاڭداۋدىڭ قاجەتى جوق. ءتىپتى ومىردەگى قيىن جاعدايلاردا دا ءوزىڭدى ساقتاپ قالۋ كەرەك"، - دەدى ءفيلمنىڭ رەجيسسەرى رۋسلان اكۋن.

ايتا كەتەيىك، قازاقستاندىق اكتريسا ءاليا تەلەباريسوۆا تاياۋدا عانا قىتايلىق رەجيسسەر ينگكاي ءتسۋيدىڭ "ەكى ساۋساعى بار ادام" (Man with two faces) جوباسىنا قاتىسقان ەدى. 21 جاستاعى قىزدىڭ قورجىنىندا 10 رول بار، ونىڭ ىشىندەگى تانىمال فيلمدەر رەتىندە اقان ساتايەۆتىڭ "اعايىندى" حيكاياسى مەن "جاۋجۇرەك مىڭ بالا" فيلمدەرىن ايتۋعا بولادى.

Tengrinews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى