ب ق و: باتىردىڭ تويىندا تۇيە بالۋان «تەمىر تۇلپار» ءمىندى

شارا الدىمەن باتىردىڭ ماڭگىلىك مەكەنىنە اينالعان امانگەلدى اۋىلىنداعى بەيىت باسىنان باستاۋ الدى. وسى جەردە مارقۇمنىڭ رۋحىنا ارناپ اۋداندىق مەشىتتىڭ يمامى قۇران باعىشتاپ، زيالى قاۋىم زيرات باسىنا گۇل شوقتارىن قويدى.

بۇدان كەيىن مەرەيتوي سادىق جاقسىعۇلوۆ اتىنداعى ورتا مەكتەپتە جالعاستى. باتىر ەسكەرتكىشىنە گۇل شوقتارى قويىلىپ، جينالعاندار قان مايداندا قازا تاپقانداردى ءبىر مينۋت ۇنسىزدىكپەن ەسكە الدى.

مەكتەپتىڭ اكت زالىندا سادىق شاكەل ۇلى تۋرالى فيلم كورسەتىلىپ، اۋدان اكىمى سانجار اليەۆ، وبلىس اكىمىنىڭ ورىنباسارى باقتيار ماكەن جانە جاڭاقالا اۋدانىنىڭ اكىمى لاۆر حايرەتدينوۆ ءسوز سويلەپ، ەل قورعاعان ەر ەسىمى ماڭگىلىك ۇمىتىلمايتىنىن اتاپ ءوتتى.

شارا بارىسىندا ءداستۇر بويىنشا ءبىرىنشى سىنىپ وقۋشىلارى «جاس جاقسىعۇلوۆشىلار» ۇيىمىنا قابىلداندى. بالدىرعانداردىڭ وڭىرىنە وبلىس اكىمىنىڭ ورىنباسارى ب. ماكەن مەن باتىردىڭ قىزى تامارا سادىق قىزى ارنايى توسبەلگىنى تاقتى.

كەڭەس وداعىنىڭ باتىرى سادىق جاقسىعۇلوۆتىڭ 90 جىلدىعىنا ارنالعان قازاق كۇرەسىنەن رەسپۋبليكالىق ءداستۇرلى تۋرنير دە جوعارى دەڭگەيدە ۇيىمداستىرىلدى.

وبلىس اۋداندارى مەن كورشىلەس وڭىرلەردىڭ مىقتىلارى جينالعان بايراقتى باسەكەدە بالۋاندار 55, 60, 70, 80, 90 كەلى جانە اسا اۋىر سالماق دارەجەسىندە باقتارىن سىنادى. ەكى كۇنگە سوزىلعان جارىس قورىتىندىسى بويىنشا  55 كەلىدە ەرجان چۋكۋروۆ (سىرىم اۋدانى)، 60 كەلىدە الماز تۋركايەۆ (تاسقالا)، 70 كەلىدە ايبول ورازعاليەۆ (سىرىم)، 80 كەلىدە ريشاد مولداشيەۆ (تەرەكتى)، 90 كەلىدە رينات ابات ۇلى (اقجايىق)، اسا اۋىر سالماق دارەجەسىندە سۇڭعات ماحامبەتوۆ (ورال قالاسى) جەڭىمپاز اتاندى.

ءار سالماق دارەجەسى بويىنشا جەڭىمپازدار انىقتالعان سوڭ تۇيە بالۋاندىققا تالاسى بار بۋرا ساندى جىگىتتەر جەرەبە تارتىپ، قارسىلاستارىن انىقتادى. 13 بالۋان باق سىناعان بۇل بەلدەسۋلەر وتە تارتىستى ءوتتى. بۇل سىندا بارلىعىنان باعى دا، بابى دا باسىم بولعان ورالدىق بالۋان سۇڭعات ماحامبەتوۆ سايىستىڭ تۇيە بالۋانى اتاندى. ءسويتىپ باس بايگەگە تىگىلگەن «تەمىر تۇلپاردى» تاقىمىنا باستى.

سادىق جاقسىعۇلوۆتىڭ 90 جىلدىعىنا ارنالعان سالتاناتتى جيىنعا وبلىس اكىمىنىڭ ورىنباسارى باقتيار ماكەن، اۋدان اكىمى سانجار اليەۆ قاتىسىپ، اۋدان حالقىن مەرەكەمەن قۇتتىقتادى. سونداي- اق جاڭاقالا اۋدانىنىڭ اكىمى لاۆر حايرەتدينوۆ باتىردىڭ تۋعان جەرىنەن ارنايى كەلىپ، تاسقالا جۇرتىنا جاڭاقالالىقتاردىڭ ىستىق ىقىلاسىن جەتكىزدى. بۇل تەك قوس اۋداننىڭ عانا ەمەس، كۇللى قازاق ەلىنىڭ مەرەيى ەكەنىن تىلگە تيەك ەتتى. «كەلەر جىلى ۇلى جەڭىستىڭ 70  جىلدىعىنا وراي، ونوماستيكالىق كوميسسيا قۇپ كورسە، جەرلەس باتىرىمىزعا جاڭاقالا اۋدانىندا دا كوشە مەن مەكتەپ اتىن بەرەمىز»، - دەدى لاۆر راشيد ۇلى.

بۇدان كەيىن شارا مەرەكەلىك كونسەرتكە ۇلاستى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى