استانادا «شابىتتىڭ» ەڭ ۇزدىك اقىندارى انىقتالدى

استانا قالاسى اكىمدىگى استانا قالاسى مادەنيەت باسقارماسى، «ادەبيەت پورتالى» ينتەرنەت-جوباسىنىڭ ۇيىمداستىرۋىمەن وكتىزىلەتىن بايقاۋعا 150 اقىن تالاپ بىلدىرگەنىمەن قازىلار القاسىنىڭ تالقىلاۋىنان تەك 100 اقىن عانا سۋىرىلىپ شىقتى. جۇزدەن جۇيرىك شىققان 50 اقىن ەكىنشى كەزەڭگە وتكىزىلىپ، ۇزدىك ەلۋ اقىننىڭ ىشىنەن سۋىرىلىپ العا شىققان جەڭىمپاز اقىنداردىڭ ەسىمدەرى انىقتالدى.

سونىمەن، XVII حالىقارالىق «شابىت» شىعارماشىل جاستار فەستيۆالىنىڭ «ۇزدىك ادەبي شىعارما» («پوەزيا») اتالىمى بويىنشا گران-پري جۇلدەسىن تۇركىستاننان كەلگەن تالانتتى جاس اقىن باتىرحان سارسەنحان يەلەندى. جۇلدەلى 1- ورىندى اقىن ولجاس قاسىم، جۇلدەلى 2- ورىن تارازدىق تالانتتى اقىن حاميت ەسامان، جۇلدەلى 3-ورىندى قاراعاندىلىق اقىن جادىرا بايبۇلانوۆا يەلەندى.

حالىقارالىق كونكۋرستىڭ ارناۋلى سىيلىقتارىنىڭ يەگەرلەرى:

استانا قالاسى اكىمدىگىنىڭ ق ر حالىق جازۋشىسى فاريزا وڭعارسىنوۆا اتىنداعى ارنايى سىيلىعىنىڭ يەگەرى - ءاليا ىڭكاربەك

استانا قالاسى اكىمدىگىنىڭ ناعيما وتەپوۆا اتىنداعى ارنايى سىيلىعىنىڭ يەگەرى -  كاليچا جاكىپوۆا

«كازكونتەنت» ا ق «ادەبيەت پوتالى» ينتەرنەت-جوباسىنىڭ ءامىرحان بالقىبەك اتىنداعى ارنايى سىيلىعىنىڭ يەگەرى - بەكزات سماديار

«كازكونتەنت» ا ق «ادەبيەت پوتالى» ينتەرنەت-جوباسىنىڭ ءابدىلدا ايماق اتىنداعى ارنايى سىيلىعىنىڭ يەگەرى - شەرحان تالاپ

«فوليانت» باسپاسىنىڭ كاكىمبەك سالىقوۆ اتىنداعى ارنايى سىيلىعىنىڭ يەگەرى - دينارا مالىك

«ۇلت» پورتالىنىڭ تولەۋجان يسمايىلوۆ اتىنداعى ارنايى سىيلىعىنىڭ يەگەرى - نۇرجان قادىرالى

«جۇلدىز» جۋرنالىنىڭ عافۋ قايىربەكوۆ اتىنداعى ارنايى سىيلىعىنىڭ يەگەرى - سايان ەسجان

XVII حالىقارالىق «شابىت» شىعارماشىل جاستار فەستيۆالىنىڭ «ۇزدىك ادەبي شىعارما» («پوەزيا») اتالىمى بويىنشا گران-پري جۇلدەسىن يەلەنگەن تالانتتى اقىن باتىرحان سارسەنحاننىڭ ولەڭىن جاريالايمىز.

پوەزياعا ارىز

بوياۋىنا ءسانىن بەرگەن سىرلى انمەن،

جىر كىتابىن اقتارام دەپ كەي شالدىڭ.

ولەڭدەرى ولىمسىرەپ تۇرعانمەن،

تاماشا ەكەن، دەي سالدىم.

مەنىڭ جانىم جىرعا جەرىك دوسقا اسىق،

كەلشى ءىنىم، تەربەلمەگەن بەسىك پە ەڭ.

مىقتىسىڭ دەپ ءسۇيىپ تۇرىپ قوشتاسىپ،

شىعا سالا ەڭىرەدىم ەسىكتەن.

مۋزا شەشەي!

نەسىنە ونى ءماز قىلدىڭ،

مازاعىڭ با، الدە الجىعان سەرتىڭ بە.

جەتپىس بەستە زورلاپ ولەڭ جازدىردىڭ،

ءىشى پىسقان كەمپىرگە...

جاعىمپازعا قول سوققاننان شوشىپ ەم،

اقيقاتتان جانتاق جۇتتى قانشا ادام.

قايران ولەڭ، شىنىمەنەن وسى مە ەڭ،

وسى بولساڭ تۇكىرگەنىم بار ساعان.

قىران قۇستىڭ قىرقىپ العان قاناتىن،

ءبىر بەيباقتى ەسكەردى مە قارا ءتۇن.

مەن ايتقانمەن باياعى اكىم سول اكىم،

مەن ايتقانمەن باقىتسىزدىڭ ءبارى اقىن.

ازعىندىقتان ارىپ بىتسە بار الەم،

قۇنارىڭنىڭ كۇلگە اينالىپ كەتكەنى.

ازابىڭا كونەيىن، ەي، قارا ولەڭ،

مازاعىڭا اينالدىرما تەك مەنى!

كوكتاس شەبەرحاناسى

ءمارماردى قاشاپ، سابيگە،

جىلايدى زەرگەر،

قاي جەردەن قالاي وت باستى.

مۇڭىن دا شاعىپ ايتا الماي كەتتى- اۋ فانيگە،

جاساماشى اعا، كوك تاستى.

اجالىن كۇتكەن ساقالىن ارلەپ بوياۋمەن،

ادامدار قانداي جەتەسىز!

تۋىلا سالا قۇلپىتاس جاساپ قويار مە ەڭ،

ولمەيتىندەر شە،

ولمەيتىندەردى نە ەتەسىز؟

تىلەگىن جولداپ تامۇقتاعى ەلدەن،

جۇرەگىن جۇلىپ حالىققا بەرگەن.

سىيمايتىن رۋحى تابىتقا مۇلدەم،

قىرانداي كوكتە قالىقتاپ ولگەن،

قابىلانداردى قايتەسىز؟!

كۇشىگەن ويلار، ىسىگەن كەۋدە،

ىلەسىپ اردىڭ تۇسىنە ەرگەنگە.

شەشەسىن تىلدەر شوق باسسا،

اينالسىن سولار كوك تاسقا!

سۇقتانا قاراپ الا كوزدەرى،

مىنا شال ەسكە سالادى وزگەنى.

اقىنعا مۇنىڭ كەرەگى قانشا،

قالاممەن قاشاپ الادى وزدەرى...

adebiportal.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى