باتىس قازاقستاندا قازاق تىلىندە ءبىلىم بەرەتىن مەكتەپتەر سانى ارتىپ كەلەدى
بۇل تۋرالى وبلىس اكىمىنىڭ ورىنباسارى باقتيار ماكەننىڭ ءتوراعالىق ەتۋىمەن وسى ماسەلەنى تالقىلاعان ۇيلەستىرۋ كەڭەسىنىڭ وتىرىسىندا ءمالىم ەتىلدى.
ب. ماكەننىڭ اتاپ وتكەنىندەي، ەلباسى تاپسىرماسىنا سايكەس قازاقستاندا مەملەكەتتىك تىلگە ايرىقشا كوڭىل بولىنۋدە. بۇل ماسەلەگە پرەزيدەنت ۇلىتاۋ تورىندەگى تولعانىسىندا دا ەرەكشە نازار اۋداردى. سوندىقتان مەملەكەتتىك ورگانداردا، سونداي-اق باسقا ءتۇرلى مەنشىك نىسانىنداعى مەكەمە-كاسىپورىنداردا قازاق تىلىندە ءىس جۇرگىزۋدى تيىسىنشە جولعا قويۋ اسا ماڭىزدى مىندەت بولىپ تابىلادى.
سونىڭ ىشىندە ءبىلىم سالاسىندا مەملەكەتتىك ءتىلدىڭ قولدانىلۋى كۇندەلىكتى باقىلاۋدا بولۋى كەرەك. سەبەبى، بارلىق ءبىلىم مەن تاربيە وسى مەكتەپتەن باستالادى. مەكتەپتە جاس جەتكىنشەكتىڭ وي-ساناسى دۇرىس قالىپتاسسا، ءارى قاراي دا ول دۇرىس باعىتپەن كەتەدى.
وبلىستىق ءبىلىم باسقارماسىنىڭ باسشىسى ايگۇل مىڭبايەۆانىڭ ايتۋىنشا، 2009 - جىلدان بەرى وبلىس بويىنشا 7276 ورىنعا ارنالعان 16 مەكتەپ جاڭادان سالىنىپ، پايدالانۋعا بەرىلسە، سونىڭ 12 سى مەملەكەتتىك تىلدە ءبىلىم بەرەدى.
وبلىس بويىنشا قازاق تىلىندە ءبىلىم بەرەتىن مەملەكەتتىك جالپى ءبىلىم بەرەتىن مەكتەپتەردىڭ ۇلەسى ءوستى. ايتالىق، 2009-2010 وقۋ جىلىندا جالپى ءبىلىم بەرەتىن مەكتەپتەردىڭ 65,19 پايىزى مەملەكەتتىك تىلدە ءبىلىم بەرسە، 2014-2015 وقۋ جىلىندا بۇل كورسەتكىش 67,76 پايىزعا جەتتى.
2004-2005 وقۋ جىلىنان باستاپ وبلىس بويىنشا ارالاس ءتىلدى 29 مەكتەپ مەملەكەتتىك تىلدە وقىتاتىن مەكتەپكە، ورىس ءتىلدى 27 مەكتەپ ارالاس تىلىندە وقىتاتىن مەكتەپتەرگە اۋىستىرىلدى.
سونىمەن قاتار مەكتەپتەردە مەملەكەتتىك تىلدە ءبىلىم الۋشىلاردىڭ دا سانى ارتىپ كەلەدى. 2009-2010 وقۋ جىلىندا بارلىق وقۋشىلاردىڭ 66,05 پايىزى مەملەكەتتىك تىلدە ءبىلىم السا، 2014-2015 -جىلى بۇل كورسەتكىش 69,1 پايىزدى قۇرايدى. وڭىردە مەملەكەتتىك تىلدە ءبىلىم الاتىن ۇلتى قازاق بالالارىنىڭ سانى كوبەيدى.
2009-2010 وقۋ جىلىندا ۇلتى قازاق بالالارىنىڭ 80,53 پايىزى مەملەكەتتىك تىلدە ءبىلىم السا، 2014-2015 وقۋ جىلىندا بۇل كورسەتكىش 84,75 پايىزعا كوتەرىلدى. ال قازاق تىلىندە وقيتىن وزگە ۇلت بالالارىنىڭ سانى - 568.
«ءتىل تۋرالى» ق ر زاڭىنا سايكەس 23921 بالانى قامتىعان 161 بالاباقشادا جانە 250 شاعىن ورتالىقتا وقۋ-تاربيە جۇمىسى قازاق تىلىندە جۇرگىزىلەدى، ياعني ول 88,4 پايىز. مەملەكەتتىك ءتىل مارتەبەسىنىڭ ارتۋى تاربيە مەن وقىتۋ قازاق تىلىندە جۇرگىزىلەتىن مەكتەپكە دەيىنگى ۇيىمداردا ۇلتى قازاق ەمەس بالالار سانىنىڭ وسۋىنە ىقپال ەتتى.
بۇگىندە وسى بالاباقشالاردا 1049 ورىس جانە وزگە ۇلتتىڭ 331 بالاسى تاربيەلەنۋدە.
ۇيلەستىرۋ كەڭەسىنىڭ وتىرىسىندا وڭىرگە تانىمال ۇستاز، اقىن داريعا مۇشتانوۆاعا شاكىرت تاربيەلەۋدەگى ۇزاق جىلعى جەمىستى ەڭبەگى ءۇشىن ق ر مادەنيەت جانە سپورت مينيسترلىگىنىڭ قۇرمەت گراموتاسى تابىس ەتىلدى.
اۆتور: ەلجان ەرالى
