ءتورتىنشى مۇناي وڭدەۋ زاۋىتىنان نە ءۇشىن باس تارتتىق؟
ەسكە سالا كەتەيىك، مەملەكەت باسشىسى ن. نازاربايەۆ بيىل ۇكىمەتكە ەلىمىزدە ءتورتىنشى مۇناي وڭدەۋ زاۋىتىن سالۋ ماسەلەسىن قاراستىرۋدى تاپسىرعان بولاتىن. الايدا كەيىننەن مۇددەلى مينيسترلىكتەر مەن ۇلتتىق كومپانيالار ءتورتىنشى مۇناي وڭدەۋ زاۋىتىن سالۋدىڭ ورنىنا شىمكەنتتەگى زاۋىتتىڭ قۋاتىن ارتتىرۋدى ۇسىندى.
«نەگە ءبىز ءتورتىنشى ءموز سالۋدى ەمەس، شىمكەنتتەگى زاۋىتتىڭ قۋاتىن ارتتىرۋدى ءجون ساناپ وتىرمىز؟ ماسەلە مىنادا: ەلىمىزدەگى مۇناي ونىمدەرىنىڭ جالپى بالانسى اۋرۋحاناداعى ورتاشا تەمپەراتۋرا ىسپەتتەس. ال مۇناي ونىمدەرىن تۇتىنۋدى تۇتاستاي ارتتىرۋ ءبىرقالىپتى بولمايدى، ءارى بۇل ەلدەگى قالىپتاسقان دەموگرافيالىق احۋالمەن تىعىز بايلانىستى»، - دەدى دانيار تيەسوۆ.
بۇل رەتتە «قازمۇنايگاز» كومپانياسىنىڭ وكىلى قازاقستاندىق مۇناي ونىمدەرىن وتكىزۋدىڭ ەكى جولىن اتاپ ءوتتى، ونىڭ ءبىرىنشىسى - ىشكى نارىق، ەكىنشىسى - ەكسپورتتىق الەۋەت. ال دانيار تيەسوۆتىڭ سوزىنە قاراعاندا، ەلىمىزدىڭ وڭتۇستىك وڭىرىندە سۇرانىس جىل سايىن ارتىپ وتىر.
«ەگەر ەكسپورت ماسەلەسىنە كەلسەك، وندا اشىعىن ايتايىق، ءبىز رەسەيگە دە، قىتايعا دا ونداي مۇمكىندىك الا المايمىز. باتىستاعى ازەربايجان مەن يراندا دا مۇناي ونىمدەرى وزدەرىندە جەتكىلىكتى. ەندەشە، ەكسپورتتىق الەۋەتى زور ءبىر عانا جول - بۇل ورتالىق ازيا ەلدەرى، ول وڭىردە مۇناي ونىمدەرى دە جەتكىلىكسىز، حالىق ءوسىمى دە زور»، - دەدى د. تيەسوۆ.
اۆتور: قانات مامەتقازى ۇلى
