قازاقتان شىققان حوككەيشىنىڭ العاشقى توبەلەسى - كەسكىن

1995- جىلى 25- ساۋىردە تۋعان، جاسى ءالى 20 عا دا تولماعان دامير رىسبايەۆ وتكەن اپتادا رەسەيدىڭ «نەفتەحيميك» كلۋبىنىڭ ەكى ويىنشىسىن سۇلاتىپ سالعان. سودان عالامتوردا ونىڭ سول ويىنداعى توبەلەسى كىشىگىرىم حيتكە اينالدى دەسەك تە بولادى. ەستەرىڭىزگە سالا كەتەيىك، ونىڭ بويى - 187 سانتيمەتر، سالماعى - 92 كەلى.

ەندى ءبىز سىزدەردىڭ نازارلارىڭىزعا ونىڭ العاشقى توبەلەسىن ۇسىنىپ وتىرمىز. 2012- جىلى 10- قاڭتار كۇنى قازاقستان چەمپيوناتى اياسىنداعى «سارى ارقا» (قاراعاندى) جانە «بارىس-2» كلۋبتارى اراسىنداعى ويىندا قىپ-قىزىل توبەلەس بولادى.

نەگىزى، كونستانتين پۋشكارەۆ سول جىلى «سارى ارقا» ساپىندا ويناعان بريتانيا قورعاۋشىسى بەن و'كوننورمەن توبەلەسكەن ەدى. ءبىراق ءدال سول كەزدە جاسى 16 دان اسقان دامير رىسبايەۆ تا قاراپ تۇرماي، وزىنەن 10 جاس ۇلكەن انتون دۋبينينگە تاپ بەرىپ، ونىمەن توبەلەسەدى. دامير ول كەزدەقازىرگىدەي اسا ءىرى بولماعان دا شىعار، ال دۋبينين ەڭگەرزەدەي بولاتىن (بويى - 180 سانتيمەتر، سالماعى - 92 كەلى).

نەگىزى، بەينەجازباعا پۋشكارەۆ پەن و'كوننور توبەلەسى تۇسىرىلگەنىمەن، انىقتاپ قاراساڭىز، ولاردىڭ ار جاعىندا توبەلەسكەن دامير مەن دۋبينين ايقاسى دا انىق كورىنەدى. وندا، ياعني ەكىنشى توبەلەستىڭ اياعىندا دامير وزىنەن ۇلكەن حوككەيشىنى مۇزايدىنعا جىعىپ الىپ، تومپەشتەپ جاتقاندا، تورەشىلەر ايىرىپ الادى.

اۆتور: نۇرعازى ساسايەۆ

«الاش ايناسى»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى